Ge William Nushy a šetše a tlwaelane le maemo kabelong ya gagwe, o ile a lemoga gore bagoeledi ba bangwe ba be ba sa phele ka go dumelelana le melao ya Jehofa ya mabapi le lenyalo. Banyalani ba bangwe ba be ba nyalane ka setšo, gomme ba dula gotee eupša ba se ba ngwadiša manyalo a bona ka semolao. Ba bangwe ba be ba latela setšo sa moo sa gore monna ga a nyale mosadi go fihlela a ima, ba re ba kgonthišetša pele gore lenyalong la bona go tla ba le bana.

Ka gona ka May 1953, ofisi ya lekala e ile ya ngwalela phuthego e nngwe le e nngwe lengwalo gomme ya hlalosa ka mo go kwagalago pono ya Beibele ka lenyalo. (Gen. 2:24; Baroma 13:1; Baheb. 13:4) Banyalani ba ile ba newa sebaka sa gore ba ngwadiše manyalo a bona. Ge ba be ba ka se dire bjalo, ba be ba tla ntšhwa ka phuthegong.—1 Bakor. 5:11, 13.

Bagoeledi ba bantši ba ile ba thabišwa ke phetogo ye. Lega go le bjalo, ba bangwe ba ile ba ngongorega. Bagoeledi ba ka godimo ga seripa ba diphuthegong tše pedi ba ile ba tlogela mokgatlo wa Jehofa. Lega go le bjalo, bao ba ilego ba dula ba botega ba ile ba oketša tirelo ya bona go bontšha gore Jehofa o be a ba šegofatša.

Ka morago ga gore bana babo rena ba dire maiteko a magolo, go ile gwa hwetšwa gore Holo ya Mmušo ya Freetown e be  e swanelega go ka dirišetšwa go ngwadiša manyalo ao. Ka September 3, 1954, bana babo rena ba ile ba nyadiša banyalani ba pele semmušo. Ka morago, mmušo o ile wa kgetha bana babo rena dileteng tše šupago nageng ka bophara gore e be banyadiši. Se se ile sa dira gore batho ba bantši bao ba thabelago ba ngwadiše manyalo a bona semolao le go swanelega go ba bagoeledi ba ditaba tše dibotse.

 Batho ba bantši ba ba thabelago bao ba bego ba nyetše basadi ba bantši le bona ba ile ba gata megato ya go phela ka go dumelelana le melao ya Modimo. Samuel Cooper, yoo ga bjale a dulago kua Bonthe o re: “Ka 1957, ke ile ka thoma go ya dibokeng le basadi ba ka ba babedi gomme go se kgale ka ngwadiša Sekolong sa Bodiredi sa Pušo ya Modimo. Ka letšatši le lengwe, ke ile ka abelwa polelo yeo e bego e bolela ka lenyalo la Bakriste. Ge ke dutše ke dira nyakišišo ka polelo yeo, ke ile ka lemoga gore ke swanetše go lokolla mosadi wa bobedi. Ge ke be ke botša ba leloko taba yeo, ka moka ga bona ba ile ba se kwane le nna. Mosadi wa ka wa bobedi o be a mpelegetše ngwana, mola wa pele e be e le moopa. Eupša ke be ke feditše le pelo gore ke nyaka go phela ka melao ya motheo ya Mangwalo. Mosadi wa ka wa bobedi o ile a dumela go boela gae gomme ka šala ke maketše ge mosadi wa ka wa pele a thoma go ba le bana. Gona bjale mosadi wa ka yo e bego e le moopa o mpelegetše bana ba bahlano.”

Ge Honoré Kamano, yo le yena a bego a thabela gomme a dula ka mošola wa mollwane kua Guinea a be a lokolla ba babedi ba basadi ba gagwe ba bararo, mosadi wa gagwe wa pele o ile a reta kgato yeo a e tšerego ke moka a thoma go tšeela therešo godimo. Le ge yo mongwe wa basadi ba gagwe ba banyenyane a be a nyamile gore o boela gae, le yena o ile a reta Honoré Kamano ka go tšeela ga gagwe godimo melao ya motheo ya Beibele. O ile a kgopela go swarelwa thuto ya Beibele gomme ka morago a ineela go Jehofa.

Lehono, Dihlatse tša Jehofa di tsebja kudu Sierra Leone le Guinea e le batho bao ba hlomphago lenyalo. Go botega ga tšona lenyalong go kgabiša thuto ya Modimo le go mo tumiša e le Mothomi wa thulaganyo ya lenyalo.—Mat. 19:4-6; Tito 2:10.

Ka 1956, dialoga tše dingwe tše pedi tša Gilead e lego Charles le Reva Chappell, ba ile ba goroga Freetown. Ge ba le tseleng ya go ya legaeng la baromiwa, ba ile ba šala ba ahlame ge ba bona leswao le legolo leo le bego le tsebatša polelo ya Beibele yeo e bego e tla newa Holong ya Wilberforce Memorial. Charles o re: “Seboledi e be e tlo ba C.N.D. Jones, e lego moemedi wa ‘Ecclesia of Jehovah’s Witnesses.’”

Jones yo a bego a ipolela gore ke yo mongwe wa batlotšwa, o be a etelela pele sehlotswana seo se bego se hlanogetše phuthego ya kua Freetown nywaga e mmalwa pejana. Sehlotswana sa gagwe se be se ipolela gore ke sona dihlatse tša Jehofa tša therešo gomme se kwera baromiwa le bao ba bego ba botegela baemedi ba mokgatlo ka gore ke “baradia” le “merwalo ya go tšwa Gilead.”

Maemo a ile a mpefala ge Jones le ba bangwe ba bathekgi ba gagwe ba be ba kgaolwa. Chappell o re: “Tsebišo yeo e ile ya tšhoša bana babo rena ba bangwe bao ba bego ba thekga go se nene bangongoregi bao. Ba bangwe ba bona ba ile ba ngongorega phatlalatša. Bona le ba bangwe ba ile ba tšwela pele ba dirišana le marabele ao gomme ba leka go šitiša diboka le dithulaganyo tša tirelo ya tšhemo. Bangongoregi bao ba be ba dula gotee ka dibokeng karolwaneng yeo e ilego ya feleletša e bitšwa gore ke ya bangongoregi. Ba bantši ba bona ba ile ba feleletša ba tlogetše therešo. Eupša ba bangwe ba bona ba ile ba hlaphogelwa moyeng gomme ya ba bagoeledi ba mafolofolo.”

Go botega ga ba bantši go ile gwa dira gore moya wa Modimo o dule o šoma ntle le tšhitišo. Ge molebeledi yo a etelago makala e lego Harry Arnott a be a etetše Freetown ngwageng o latetšego, o ile a re: “Ye ke koketšego e kgolo yeo re sa kago ra e bona mo Sierra Leone nywageng e mentši e fetilego. Se se re kgonthišetša gore dikgolo di sa etla.”

Gateetee ka morago ga ketelo ya Ngwanabo rena Arnott, Charles Chappell o ile a amogela lengwalo le le tšwago go  ngwanabo rena yo mongwe wa Liberia yeo e lego kgauswi le Sierra Leone. Ngwanabo rena yoo o be a nyaka gore ba leloko la gabo kua Sierra Leone ba botšwe ditaba tše dibotse. E be e le wa morafo wa Makisi, e lego morafo woo o bego o dula dithabeng tše di tletšego dithokgwa le meedi yeo e kopanyago Sierra Leone, Liberia le Guinea. Go bonagala eka batho ba bantši bao ba bego ba bolela Sekisi ba be ba nyaka go ithuta Beibele.

Ka ge Makisi a mantši a be a sa kgone go bala le go ngwala, bana babo rena ba ile ba rulaganya diklase tša go ithuta go bala le go ngwala kua Koindu gore ba rute Makisi ao dithuto tša motheo tša Beibele. Barutwana ba bantši ba ile ba kgeregela diklaseng tšeo. Charles o gopola ka gore: “Go se kgale, sehlopha seo ke ge se šetše se na le bagoeledi ba bafsa ba 5, ya ba ba 10, ba 15 gomme ya feleletša e le ba 20. Batho ba be ba amogela therešo ka lebelo moo ke ilego ka ba ka belaela gore ke bagoeledi ba kgonthe. Ke be ke fošitše. Ga se feela gore ba bantši ba bona ba be ba botega, eupša ba be ba bile ba fišega!”

Go se go ye kae, bagoeledi bao ba bafsa ba mafolofolo ba ile ba phatlalatša ditaba tše dibotse le metseng e mengwe ka ntle ga Koindu gomme ba feleletša ba di bolela le nageng ya kgauswi ya Guinea. Ba be ba sepela diiri tše dintši go phatša meboto ba bolela ditaba tše dibotse dipolaseng le metsaneng. Eleazar Onwudiwe, yo e bego e le molebeledi wa tikologo mehleng yeo o re: “Go be go feta dibekebeke, ka dinako tše dingwe dikgwedikgwedi, re sa kwe modumo wa koloi.”

Ge bana babo rena ba Makisi ba dutše ba gaša peu ya Mmušo le go e nošetša, Modimo o be a e godiša. (1 Bakor. 3:7) Ge lesogana le lengwe la sefofu le be le ekwa therešo, le ile la swara ka hlogo pukwana ya matlakala a 32 ya “This Good News of the Kingdom.” Ka morago, le be le kgona go gopola serapa se sengwe le se sengwe ge le le bodireding le ge le swere dithuto tša Beibele. Le be le šia batho ba tlabegile. Mosadi yo mongwe wa sefoa yo a ilego a amogela therešo o ile a dira diphetogo tše dikgolo  moo mogadibo wa gagwe a ilego a thoma go tla dibokeng, a sepela ka maoto dikhilomithara tša ka godimo ga tše lesome go ya moo.

Modiro wa boboledi morafong wa Makisi o ile wa gola ka lebelo la mmutla. Go ile gwa hlongwa phuthego e nngwe, go tloga moo tša hlongwa ka go latelana. Bagoeledi ba e ka bago ba 30 ba ile ba tšea bobulamadibogo. Kgoši ya motseng wa Koindu e ile ya kgahlwa ke therešo gomme ya re nea setsha gore re age Holo ya Mmušo. Ka morago ga gore batho ba ka godimo ga ba 500 ba be gona kopanong ya tikologo kua Kailahun, go ile gwa hlongwa phuthego le gona moo. Go se go ye kae, seripagare sa Dihlatse kua Sierra Leone e be le tša morafo wa Makisi, gaešita le ge morafo wo o be o le ka tlase ga pedi lekgolong ge o bapetšwa le badudi ba moo.

Tšwelopele ye ga se ya ka ya kgahla bohle, kudukudu baetapele ba bodumedi ba Makisi. Ba tletše lehufa, ba ile ba ikemišetša go kgaotša modiro wa bana babo rena ba. Potšišo e be e le gore: Ba be ba tla dira seo bjang, le gona neng?