Ka 1991, nna le mosadi wa ka Satta re ile ra tšhaba ge mašole a marabele a be a hlasela motse wa gabo rena kua Koindu, Sierra Leone. Nywaga e seswai e latelago, re ile ra dula dikampeng tše di fapafapanego tša bafaladi. Dikampeng tšeo go be go na le tlhaelelo e kgolo ya dijo, malwetši gomme batho bao re bego re dula le bona ba se na boitshwaro.

Kampeng e nngwe le e nngwe yeo re bego re eya go yona re be re kgopela mmušo setsha sa go aga Holo ya Mmušo. Ka dinako tše dingwe o be o re dumelela, ka dinako tše dingwe o be o gana. Lega go le bjalo, re be re dula re rulaganya mafelo a borapedi. Re be re ikemišeditše go hlankela Jehofa. Mafelelong, re ile ra aga Diholo tša Mmušo tše nne moo dikampeng.

Ge ntwa e fela, ga se ra ka ra boela gae. Nywaga ya ntwa e tlogetše Koindu e le lešope. Ka gona, re ile ra romelwa kampeng e nngwe ya bafaladi kgauswi le Bo. Ge re fihla moo, ka thušo ya ditšhelete go tšwa ofising ya lekala, re ile ra aga Holo ya Mmušo ya bohlano.