KA Mokibelo wa October 5, 2013, batho ba 257 294 ba dinageng tše 21 ba bile gona sebokeng sa bo-129 sa ngwaga le ngwaga sa Watch Tower Bible and Tract Society of Pennsylvania, ba bangwe ba be ba le lefelong leo se bego se swaretšwe go lona gomme ba bangwe ba se bogetše go dirišwa Inthanete. Ka moragonyana mafelobekeng ona ao, dihlopha tše dingwe tša Dihlatse di ile tša bogela lenaneo le leo le bego le rekhotilwe. Ka go re’alo, palomoka ya bao ba thabetšego lenaneo le e bile batho ba 1 413 676 ba dinageng tše 31—e lego seboka se segologolo sa Dihlatse tša Jehofa go fihla ga bjale.

Ga e sa le go tloga ka bo-1920, Dihlatse tša Jehofa di be di gaša mananeo a dikopano di diriša megala le diradio tše dintši e le gore batho ba dinageng tše dingwe ba kwe lenaneo. Ga  bjale thekinolotši e dira gore le batho ba mafelong ao a lego thoko ba kgone go kwa le go bogela ditiragalo ge di dutše di direga goba gateetee ge di se na go direga.

Ditho tša makala a mmalwa a Dihlatse tša Jehofa di šomile ka lebaka le le fetago ngwaga go lokišeletša seboka se gore se tle se bontšhwe go dirišwa Inthanete. Mafelobekeng ao seboka se se swerwego ka lona, ditsebi tša thekinolotši di be di hlokometše go gašwa ga lenaneo leo dikhomphutheng kua Brooklyn, New York gomme di šoma bošego le mosegare ka ge lenaneo leo le be le bontšhwa mafelong ao a šianago ka dinako.