Juana Ventura o ile a thoma go ithuta Beibele ge modiro wa rena o be o thibetšwe nageng ye, gomme a kolobetšwa ka 1960 Nokeng ya Ozama. Lebakeng le lengwe, moruti yo mongwe kua Santo Domingo o be a nyaka gore kgaetšedi yo a golegwe ka gobane o be a re “o kgeloša batho kerekeng ya gagwe.” E le ge a nyaka go bontšha ditho tša kereke ya gagwe gore Dihlatse tša Jehofa di bolela maaka le go nyaka go senya Juana leina, moruti yo o ile a mo laletša kerekeng ya gagwe gore a tlo araba dipotšišo tša mabapi le tumelo ya gagwe e mpsha.

Juana o anega ka gore: “Moruti yoo o ile a mpotšiša dipotšišo tše di latelago tše tharo: ‘Ke ka baka la’ng lena le sa boute? Ke ka baka la’ng le sa ye ntweng? Ke ka baka la’ng le ipitša Dihlatse tša Jehofa?’ Ge ke be ke araba potšišo e nngwe le e nngwe ke diriša Beibele, ditho ka moka tša kereke ya gagwe  di be di bula Dibeibele tša tšona gomme tša makatšwa ke seo di bego di se bala. Ba bantši ba bona ba ile ba lemoga gore ba hweditše therešo. Batho bao ka moka ba ile ba thoma go ithuta Beibele, gomme mafelelong ba 25 ba bona ba ineela go Jehofa.” Tiragalo ye e makatšago e ile ya dira gore modiro wa boboledi o gole ka lebelo kua Santo Domingo.

Ka morago ga gore Trujillo a bolawe, go ile gwa tsoga dikgaruru nageng ye. Yearbook ya 1963 e begile gore: ‘Mašole a be a tletše diterateng, gomme letšatši le letšatši go eba le diseteraeke le bosenyi.’ Go sa šetšwe mathata ao a dipolotiki, modiro wa boboledi le wa go dira barutiwa o ile wa gatela pele, gomme ge ngwaga wa tirelo wa 1963 o fela, go be go fihleletšwe tlhora ya bagoeledi ba 1 155.

Ge Nathan Knorr yo a tšwago ntlongkgolo a be a etetše Dominican Republic ka 1962, o ile a rulaganya gore go rekwe lefelo leo go bego go tlo agwa moago o mogolwanyane moo go bego go tla okamelwa modiro wa boboledi wo o bego o gatela pele ka lebelo. Go ile gwa agwa moago wa mabato a mabedi le Holo ya Mmušo lefelong leo le lefsa. Ka Mokibelo, October 12, 1963, Frederick Franz, yo le yena a bego a etšwa ntlongkgolo, o ile a nea polelo ya go neela meago yeo e mefsa ya lekala. Go be go le molaleng gore Dihlatse tša Jehofa di be di ikemišeditše go dula Dominican Republic. Ka moragonyana ga go neelwa ga meago ye, Harry le Paquita Duffield ba ile ba fihla nageng ye, e lego baromiwa bao ba ilego ba rakwa mafelelong kua Cuba.

Ka April 24, 1965, naga ye e ile ya aparelwa ke dikgaruru tša dipolotiki. Matšatšing a thata ao a ilego a latela, batho ba Jehofa ba ile ba gatela pele kudu moyeng. Ka 1970, go be go na le bagoeledi ba 3 378 diphuthegong tše 63. Batho ba ka godimo ga seripa sa palo yeo ba be ba amogetše therešo  nywageng e mehlano e fetilego. Yearbook ya 1972 e begile gore: “Ba be ba etšwa maemong ka moka a bophelo: Ba bangwe e be e le bomakheniki, balemi, baotledi ba dinamelwa tša batho bohle, bao ba šomago dipankeng, baagi, bao ba šomago ka mapolanka, boramolao, dingaka tša meno le bao e kilego ya ba boradipolotiki; ka moka ga bona ba tlile ka mokgatlong ka baka la go rata therešo le Jehofa.”