NYWAGA-SOME e sa le pele, barutwana ba Beibele ba ile ba goeletša gore go be go tla ba le ditiragalo tše bohlokwa ka 1914. Ditiragalo tše e be e le dife, gomme ke bohlatse bofe bjo bo šupago 1914 e le ngwaga o bjalo o bohlokwa?

Bjalo ka ge go begilwe go Luka 21:24, Jesu o ile a re: “Jerusalema  e tla gatakelwa ke ditšhaba go fihla ge dinako tše di beilwego tša ditšhaba [“mabaka a bantlê,” Beibele ya Sepedi] di phethega.” Jerusalema e be e le motse-mogolo wa setšhaba sa ba-Juda—sedulo sa bogoši sa lešika la dikgoši go tšwa go ba ngwako wa Kgoši Dafida. (Psalme 48:1, 2) Lega go le bjalo, dikgoši tše e be e le tša moswana-noši gare ga baetapele ba ditšhaba. Di ile tša dula ‘sedulong sa bogoši sa Jehofa’ e le baemedi ba Modimo ka boyena. (1 Koronika 29:23) Ka gona Jerusalema e be e le seka sa pušo ya Jehofa.

Lega go le bjalo, ke neng le gona bjang moo pušo ya Modimo e ilego ya thoma go “gatakelwa ke ditšhaba”? Se se diregile ka 607 B.C.E. ge Jerusalema e fenywa ke ba-Babilona. Ga go yo a ilego a dula ‘sedulong sa bogoši sa Jehofa,’ gomme lešika la dikgoši tšeo di tšwilego go Dafida le ile la šitišwa. (2 Dikxoši 25:1-26) Na go “gatakelwa” mo go be go tla tšwela pele ka mo go sa felego? Aowa, ka gobane boporofeta bja Hesekiele bo boletše malebana  le kgoši ya mafelelo ya Jerusalema e lego Tsedekia gore: “Tloša seala, O rolê mphapahlôxô! . . . Fêla, e ka se bê moka. Xo tlo bá xwa tla e a swanetšwexo ke wôna ka o nea yêna.” (Hesekiele 21:31, 32) Yo a “swanetšwexo” ke go dula sedulong sa bogoši sa Dafida ke Kriste Jesu. (Luka 1:32, 33) Ka gona go “gatakelwa” go be go tla fela ge Jesu a e-ba Kgoši.

Tiragalo yeo e kgolo e be e tla direga neng? Jesu o ile a bontšha gore ba-Ntle ba be ba tla buša ka tekanyo e itšego ya nako e beilwego. Pego e lego go Daniele kgaolo 4 e hupere senotlelo sa go re tsebiša gore nako yeo e be e tla ba e telele gakaakang. E hlalosa ka toro ya boporofeta yeo e ilego ya lorwa ke Kgoši Nebukadinetsara wa Babilona. O ile a bona sehlare se segolo kudu seo se ilego sa rengwa. Kutu ya sona e be e ka se gole ka gobane e be e tlemilwe ka tšhipi le koporo. Morongwa o ile a bolela gore: “Xo bê xo fetê mabaka a šupaxo.”—Daniele 4:10-16.

Ka Beibeleng, dihlare ka dinako tše dingwe di dirišetšwa go emela pušo. (Hesekiele 17:22-24; 31:2-5) Go etša ge go bontšhitšwe ke dikgoši tša Jerusalema e le baemedi ba Modimo, go rengwa ga sehlare sa seswantšhetšo go bontšha kamoo pušo ya Gagwe e bego e tla šitišwa ka gona. Lega go le bjalo, pono e bontšhitše gore go ‘gatakelwa mo ga Jerusalema’ e be e tla ba ga lebakanyana—nako e ka bago “mabaka a šupaxo.” Yeo ke nako e telele gakaaka’ng?

Kutollo 12:6, 14 e bontšha gore mabaka a mararo le seripa a lekana le “matšatši a sekete makgolo-pedi-masome-tshela.” Ka gona “mabaka a šupaxo” a be a tla tšea lebaka la makga a badilwego gabedi, goba matšatši a 2 520. Eupša ditšhaba tša ba-Ntle ga se tša ka tša tlogela go ‘gatakela’ pušo ya Modimo lebaka feela la matšatši a 2 520 ka morago ga go wa ga Jerusalema. Ka gona, go molaleng gore boporofeta bjo bo akaretša nako e telele kudu. Motheong wa Numeri 14:34 le Hesekiele 4:6, tšeo di bolelago ka “letšatši letee, bakeng sa ngwaxa o tee,” “mabaka a šupaxo” a tla akaretša nywaga e 2 520.

Nywaga e 2 520 e thomile ka October 607 B.C.E. ge Jerusalema e fenywa ke ba-Babilona gomme kgoši yeo e bego e le lešikeng la dikgoši tše di tšwilego go Dafida e be e tlošwa sedulong sa yona sa bogoši. Nako yeo e ile ya fela ka October 1914. Ka nako yeo, “dinako tše di beilwego tša ditšhaba” di ile tša fela, gomme Jesu  Kriste o ile a bewa e le Kgoši ya Modimo ya legodimong. *—Psalme 2:1-6; Daniele 7:13, 14.

Bjalo ka ge Jesu a ile a bolela e sa le pele, “go ba gona” ga gagwe e le Kgoši ya legodimong go swailwe ke ditiragalo tše di tšhošago tša lefase—ntwa, tlala, ditšhišinyego tša lefase le mauba a malwetši. (Mateo 24:3-8; Luka 21:11) Ditiragalo tše bjalo di bontšha bohlatse bjo matla tabeng ya gore 1914 ka kgonthe e swaile go hlongwa ga Mmušo wa Modimo wa legodimong le mathomo a ‘mehla ya bofelo’ bja tshepedišo ye e kgopo ya gona bjale ya dilo.—2 Timotheo 3:1-5.