THUTO 36

Tshepega Dilong ka Moka

BAPALA

Ka moka ga rena re nyaka go ba le bagwera ba go tshepega. Jehofa le yena o nyaka gore bagwera ba gagwe ba tshepege. Eupša ga go bonolo go tshepega matšatši a, ka gore batho ba bantši ga ba sa tshepega. Re tlo holega bjang ge e ba re tshepega dilong ka moka?

1. Ke ka baka la eng re swanetše go tshepega?

Lebaka ke gore ge re tshepagalela ba bangwe, re bontšha Jehofa gore re a mo rata e bile re a mo hlompha. Nagana ka taba ye: Jehofa o tseba dilo ka moka tšeo re di naganago le tšeo re di dirago. (Baheberu 4:13) O a re bona ge re tshepega, e bile re a mo thabiša ge re dira bjalo. Beibele e re: “Motho wa moradia o šišimiša Jehofa, eupša Modimo o gwerana kgauswi le baloki.”—Diema 3:32.

2. Ke dilo dife tšeo re ka di dirago go bontšha gore re a tshepega?

Jehofa o nyaka gore ka moka ga rena ‘re botšane therešo.’ (Sakaria 8:16, 17) Se se ra gore’ng? Se ra gore ge re bolela le batho ba gabo rena, bao re šomago le bona, bana babo rena le dikgaetšedi goba batho ba mmušo, ga se ra swanela go ba botša maaka goba go ba botša nnete ya go se felele. Batho bao ba tshepegago ga ba utswetše ba bangwe goba go ba ropa. (Bala Diema 24:28 le Baefeso 4:28.) E bile ba patela metšhelo ka moka yeo ba e kolotago. (Baroma 13:5-7) Ge re dira dilo tše le tše dingwe, re bontšha gore re “itshwara ka go botega dilong tšohle.”—Baheberu 13:18.

3. Re holega bjang ge re tshepega?

Ge re tumile ka go tshepega, batho ba bangwe le bona ba tlo re tshepa. Re tlo dira gore batho ka moka ka phuthegong ba ikwe ba le gae ga mahlaku. Le gona re tlo ba le letswalo le lebotse. Ge re tshepega re “[kgabiša] thuto ya Mophološi wa rena, Modimo.” E bile re tlo dira gore batho bao e sego Dihlatse tša Jehofa ba nyake go ithuta ka Jehofa.—Tito 2:10.

ITHUTE KA MO GO TSENELETŠEGO

Ekwa gore ge o tshepega o tlo holega bjang le gore Jehofa yena o ikwa bjang, o be o kwe le gore o ka bontšha bjang gore o a tshepega dilong ka moka.

4. Jehofa o a thaba ge re tshepega

Balang Psalme 44:21 le Maleaki 3:16, gomme le boledišaneng ka dipotšišo tše di latelago:

O nagana gore ke ka baka la’ng re sa swanela go ipotša gore re ka utela Jehofa dilo tšeo re di naganago le tšeo re di dirago?
O nagana gore Jehofa o ikwa bjang ge re kgetha go bolela nnete le ge go le thata?

Ge bana ba bolela nnete ba thabiša batswadi ba bona. Le rena ge re bolela nnete, re thabiša motswadi wa rena yo Mogolo e lego Jehofa

5. Tshepega ka dinako ka moka

Batho ba bantši ba nagana gore ga go kgonege gore re dule re tshepega. Eupša ekwa gore ke ka baka la eng re swanetše go dula re tshepega ka dinako ka moka. Bapalang BIDIO ye.

BIDIO: Ke Eng Seo se Tlišago Lethabo?—Letswalo le le Hlwekilego (2:32)

Balang Baheberu 13:18, gomme le boledišaneng ka gore re ka bontšha bjang gore re a tshepega . . .

ka lapeng.
mošomong goba sekolong.
le dilong tše dingwe.

6. Ge re tshepega go holega rena

Ka dinako tše dingwe go tshepega go ka re tsentšha mathateng. Eupša ge re ka no dula re tshepega le ge go le thata, re ka se tsoge re itshotše. Balang Psalme 34:12-16, gomme le boledišaneng ka potšišo e latelago:

Go tshepega go go hola bjang?

Banna le basadi bao ba tshepegago manyalo a bona a a tia
Ge bašomi ba tshepega le bahiri ba bona ba tlo ba tshepa
Ge batho ba tshepega, le mmušo wa gabo bona o tlo ba tshepa

BATHO BA BANGWE BA RE: “Go bolela maaka a manyenyane ga go tshwenye.”

O nagana gore ke ka baka la’ng Jehofa a hloile maaka ka moka?

O ITHUTILE ENG?

Jehofa o nyaka gore bagwera ba gagwe ba tshepege dilong ka moka tšeo ba di bolelago le tšeo ba di dirago.

Dipotšišo

Re ka bontšha bjang gore re a tshepega?
Ke ka baka la’ng re sa swanela go ipotša gore re ka utela Jehofa dilo tšeo re di dirago?
Ke ka baka la’ng o nyaka go dula o tshepega ka dinako ka moka?

Re feditše go bala thuto ye ka di:

Seo o ka se dirago

Ipotšiše gore, ‘Na Jehofa ge a ntebeletše o mpona ke le motho wa go tshepega?’ Leka go bona moo o swanetšego go fetoga gona

Dilo tše dingwe:

Your other goal