THUTO 46
Ke ka Baka la Eng go le Bohlokwa Gore o Ineele go Jehofa le go Kolobetšwa?
Ge o ineela go Jehofa, o a mo rapela gomme o mo tshepiša gore o tlo hlankela yena feela le go dira gore a tle pele bophelong bja gago. (Psalme 40:8) Ka morago ga gore o ineele go yena, o a kolobetšwa. Ge o kolobetšwa o tla be o bontšha batho ba bangwe gore o ineetše go Jehofa. Ge re ineela go Jehofa, re dira phetho e bohlokwa kudu bophelong. Ke’ng seo se ka dirago gore o dire phetho ye e bohlokwa kudu, yeo e tlago go fetoša bophelo bja gago?
1. Ke eng seo se dirago gore motho a ineele go Jehofa?
Re ineela go Jehofa ka gobane re mo rata. (1 Johane 4:10, 19) Beibele e re: “O rate Jehofa Modimo wa gago ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.” (Mareka 12:30) Re bontšha gore re rata Modimo ka dilo tšeo re di bolelago le tšeo re di dirago. Ka mohlala, go bontšha gore monna le mosadi ba ratana kudu, re tlo bona ge ba nyalana. Le rena go bontšha gore re rata Jehofa, re tlo ineela go yena gomme ra kolobetšwa.
2. Ke dilo dife tšeo Jehofa a di direlago batho ba gagwe bao ba kolobeditšwego?
Ge o kolobetšwa o tlo ba karolo ya lapa la Jehofa leo le thabilego. Jehofa o tlo go bontšha ka ditsela tše dintši gore o a go rata, e bile o tlo ba mogwera wa gagwe yo mogolo go feta gona bjale. (Bala Maleaki 3:16-18.) E bile ga go felele moo, o tlo hwetša bana babo rena le dikgaetšedi bao ba ratago Jehofa lefaseng ka moka, e bile le wena ba tlo go rata kudu. (Bala Mareka 10:29, 30.) Eupša go na le dilo tšeo o swanetšego go di dira pele o kolobetšwa. O swanetše go ithuta ka Jehofa, o mo rate e bile o dumele go Morwa wa gagwe, ke moka o ineele go yena. Ge o ka dira dilo tše ka moka gomme wa kolobetšwa, o ka tla wa thabela bophelo go ya go ile mo lefaseng. Beibele e re: ‘Kolobetšo e a le phološa.’—1 Petro 3:21.
ITHUTE KA MO GO TSENELETŠEGO
Leka go tseba gore ke ka baka la eng go le bohlokwa gore o ineele go Jehofa le go kolobetšwa.
3. Ka moka ga rena re swanetše go kgetha gore re nyaka go hlankela mang
Mehleng ya Baisiraele, batho ba bangwe ba be ba nagana gore ba ka rapela Jehofa le modimo wa maaka e lego Baali ka nako e tee. Eupša Jehofa o ile a romela moporofeta wa gagwe Eliya gore a ba phošolle. Balang 1 Dikgoši 18:21, gomme le boledišaneng ka potšišo e latelago:
-
Baisiraele ba ile ba swanelwa ke go kgetha’ng?
Go swana le Baisiraele, le rena re swanetše go kgetha gore re nyaka go hlankela mang. Balang Luka 16:13, gomme le boledišaneng ka dipotšišo tše di latelago:
-
Ke ka baka la’ng go sa kgonege gore re hlankele Jehofa le motho yo mongwe goba selo se sengwe ka nako e tee?
-
Re bontšha Jehofa bjang gore re kgetha go hlankela yena?
4. Naganišiša ka dilo tšeo Jehofa a go diretšego tšona go bontšha gore o a go rata
Jehofa o re file dimpho tše dintši tše dibotse. Bjale rena re ka mo direla eng? Bapalang BIDIO ye.
Ke dilo dife tše dingwe tšeo Jehofa a go diretšego tšona go bontšha gore o a go rata? Balang Psalme 104:14, 15 le 1 Johane 4:9, 10, gomme le boledišaneng ka dipotšišo tše di latelago:
-
Ke dimpho dife tšeo Jehofa a go filego tšona tšeo o di ratago kudu?
-
Dimpho tšeo di dira gore o ikwe bjang ka Jehofa?
Ge motho a re file mpho yeo re e ratago kudu, re tlo dira dilo tše itšego go mmontšha gore re a mo leboga. Balang Doiteronomio 16:17, gomme le boledišaneng ka potšišo e latelago:
-
Ge o nagana ka dilo ka moka tšeo Jehofa a go diretšego tšona, o ikwa o hlohleletšega go mo direla’ng?
5. Ge re ineela go Jehofa o tlo re direla dilo tše dintši tše dibotse
Batho ba bantši ba nagana gore ge ba ka tuma, ba šoma mešomo ya maemo goba ba ba le tšhelete e ntši kudu, ba tlo thaba. Na seo ke nnete? Bapalang BIDIO ye, gomme le boledišaneng ka dipotšišo tše di latelago.
-
Le ge ngwanabo rena wa mo bidiong ye a be a rata go bapala ball, ke ka baka la’ng a ile a e tlogela?
-
O ile a tlogela go phelela go bapala ball gomme a ineela go Jehofa. Na o nagana gore o dirile phetho e botse? Ke ka baka la’ng o re’alo?
Pele moapostola Paulo e eba Mokriste, o be a šoma mošomo wa maemo. O be a rutilwe molao wa Sejuda ke morutiši wa go tuma kudu wa mehleng yeo. Eupša o ile a tlogela mošomo woo gore e be Mokriste, na o kile a itshola? Balang Bafilipi 3:8, gomme le boledišaneng ka dipotšišo tše di latelago:
-
Ke ka baka la’ng Paulo a ile a re dilo tšeo a bego a di dira pele e eba Mokriste e be e le “maudi” goba ditlakala?
-
O ile a holega bjang ka morago ga gore e be Mokriste?
-
O nagana gore go ka ba le selo se sekaone go feta go hlankela Jehofa?
Ka morago ga gore Paulo e be Mokriste, o ile a hwetša dilo tše dintši tše bohlokwa kudu go feta tšeo a di lobilego
BATHO BA BANGWE BA RE: “Ke a tseba gore bodumedi bja lena bo ruta nnete, eupša nka se kgone go phela ka tsela yeo le phelago ka yona.”
-
Ke ka baka la’ng o nagana gore go bohlokwa gore re neele maphelo a rena go Jehofa?
O ITHUTILE ENG?
Go rata Jehofa go re hlohleletša gore re ineele go yena gomme re kolobetšwe.
Dipotšišo
-
Ke ka baka la’ng re swanetše go rata Jehofa ka dipelo tša rena ka moka le go hlankela yena a feela?
-
Ke dilo dife tše dibotse tšeo Jehofa a di direlago batho ba gagwe bao ba kolobeditšwego?
-
Na o nyaka go ineela go Jehofa?
ITHUTE KA MO GO OKETŠEGILEGO
Ekwa gore ke eng seo se ilego sa dira gore mosadi yo e bego e le seopedi le monna yo e bego e le sebapadi sa football ba kgethe go ineela go Jehofa.
Bafsa ba a Botšiša—Ke tla Dira Eng ka Bophelo bja ka?—Ge ke Lebelela Morago (6:54)
Ekwa ka mabaka a mangwe ao a dirago gore re ineele go Jehofa.
“Ke ka Baka La’ng o Swanetše go Ineela go Jehofa?” (Morokami wa January 15, 2010.)
Bidiong ya koša ye, bona kamoo batho bao ba ineelago go Jehofa ba thabago ka gona.
E le gore o kwe gore mosadi yo mongwe o ile a thušwa ke eng go tseba dilo tšeo di swanetšego go tla pele bophelong bja gagwe, bala sehlogo seo se rego, “Ke Tšere Nywaga e Mentši ke Ipotšiša Gore, ‘Ke ka Baka la Eng re le mo?’”
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
