Gantši ge re na le bana babo rena le dikgaetšedi, re ikwa go swana le Kgoši Dafida yo a ilego a re: “Ke mo gobotse le mo go kgahlišago gakaakang ge bana ba motho ba dudišana ka botee!” (Psalme 133:1) Botee bjo re nago le bjona ka phuthegong, ga re be le bjona ka mohlolo. Ka moka ga rena re swanetše go šoma ka thata gore go dule go na le botee ka phuthegong.

1. Ke eng seo se kgahlišago ka Dihlatse tša Jehofa?

Ge o ka ya dibokeng nageng e nngwe, o tlo ikwa o le gae ga mahlaku le ge o sa tsebe le leleme la moo. Ka baka la’ng? Ka gobane ka moka ga rena re ithuta Beibele re šomiša dikgatišo tša go swana. E bile re šoma ka thata gore re dule re ratana. Go sa šetšwe gore re dula kae, ka moka ga rena re ‘bitša leina la Jehofa e bile re mo hlankela ka botee.’​—Tsefanya 3:9.

2. Wena o ka dira eng gore ka phuthegong go dule go na le botee?

Beibele e re: “Ratanang ka mo go tseneletšego go tšwa pelong.” (1 Petro 1:​22) O ka diriša keletšo ye bjang? O se ke wa dula o nagana ka diphošo tša batho ba bangwe, eupša dula o nagana ka dilo tše dibotse tšeo ba di dirago. Go e na le gore o gwerane feela le batho bao wena le bona le ratago dilo tša go swana, leka go tseba bana babo rena le dikgaetšedi ba bangwe. Re swanetše go šoma ka thata gore re se ke ra ba le kgethollo.​—Bala 1 Petro 2:​17. a

3. O swanetše go dira eng ge e ba o na le dikgakgano le Mokristegotee wena?

Ke nnete gore re na le botee, eupša re fela re dira diphošo. Ka gona, re tlo fela re gatana dikhontshe. Ke ka baka leo Beibele e re botšago gore re ‘tšwele pele re lebalelana.’ E bile e re: ‘Go etša ge Jehofa a re lebaletše ka bolokologi, le rena re dire bjalo.’ (Bala Bakolose 3:​13.) Re dula re direla Jehofa diphošo eupša o a re lebalela. Le yena o nyaka gore re lebalele bana babo rena. Ge e ba o bona gore o kwešitše yo mongwe bohloko, eba wa mathomo wa go lokiša ditaba.​—Bala Mateo 5:​23, 24. b

 ITHUTE KA MO GO TSENELETŠEGO

4. O se ke wa ba le kgethollo

Re nyaka go rata bana babo rena le dikgaetšedi ka moka ga bona. Eupša ka dinako tše dingwe re ka thatafalelwa ke go amogela motho yo a sa swanego le rena. Ke’ng seo se ka re thušago? Balang Ditiro 10:​34, 35, gomme le boledišaneng ka dipotšišo tše di latelago:

• Jehofa o amogela batho ka moka gore e be Dihlatse tša gagwe. Na wena o ka mo ekiša bjang tseleng yeo o ikwago ka yona ka batho bao ba sa swanego le wena?

• Batho ba bantši ba moo o dulago gona ba na le kgethollo ya mohuta mang, yeo wena o sa nyakego go ba le yona?

Balang 2 Bakorinthe 6:​11-13, gomme le boledišaneng ka potšišo e latelago:

• O ka dira’ng gore o ithute go rata bana babo rena le dikgaetšedi ka moka?

5. Lebalela ba bangwe ka bolokologi e bile o dire khutšo

Jehofa o re lebalela ka bolokologi le ge yena a ka se tsoge a nyakile gore re mo lebalele. Balang Psalme 86:​5, gomme le boledišaneng ka dipotšišo tše di latelago:

• Jehofa o lebalela batho go fihla bokgoleng bofe?

• Ke ka baka la’ng o rata tsela yeo Jehofa a lebalelago ka yona?

• Ke maemong afe ao go ka bago thata gore re dule re na le khutšo le ba bangwe?

Re ka ekiša Jesu bjang gomme ra dula re na le khutšo le bana babo rena le dikgaetšedi? Balang Diema 19:​11, gomme le boledišaneng ka potšišo e latelago:

• Ge motho yo mongwe a ka go tena goba a go kweša bohloko, o ka dira’ng gore le dule le na le khutšo?

 Ka dinako tše dingwe le rena re kweša ba bangwe bohloko. Ge seo se direga, re swanetše go dira’ng? Bapalang BIDIO ye, gomme le boledišaneng ka potšišo e latelago:

• Kgaetšedi wa bidiong ye, o ile a dira’ng gore a dire khutšo?

 O ITHUTILE ENG?

O ka dira gore ka phuthegong go dule go na le botee ka go rata bana babo rena le dikgaetšedi ka moka le go ba lebalela.

Dipotšišo

• O ka dira’ng gore o se ke wa ba le kgethollo?

• O swanetše go dira’ng ge o ka ba le dikgakgano le Mokristegotee le wena?

• O ka ekiša Jehofa bjang tabeng ya go lebalela ba bangwe?