THUTO 60

Tšwela Pele o Tiiša Segwera sa Gago le Jehofa

BAPALA

Ga e sa le o thoma go ithuta puku ye, o ithutile dilo tše dintši ka Jehofa. Dilo tšeo o ithutilego tšona di go dirile gore o rate Jehofa kudu, e bile mohlomongwe o šetše o ineetše go yena le go kolobetšwa. Ge e ba o se wa tšwa o ineela go Jehofa le go kolobetšwa, mohlomongwe o nagana go dira bjalo e se kgale. Eupša se ga se bolele gore ge o kolobeditšwe, napile go fedile. O swanetše go tšwela pele o tiiša segwera sa gago le Jehofa. O ka dira seo bjang?

1. Ke ka baka la’ng o swanetše go tšwela pele o tiiša segwera sa gago le Jehofa?

Re swanetše go šoma ka thata gore re tšwele pele re tiiša segwera sa rena le Jehofa. Ka baka la’ng? Ka gobane ga re nyake go “gogolega,” goba go tlogela go mo hlankela. (Baheberu 2:1) Ke’ng seo se ka re thušago gore re tšwele pele re hlankela Jehofa ka go tshepega? Re ka thušwa ke go dula re swaregile ka go bolela ditaba tše dibotse, le go dira dilo tše dingwe go oketša nako yeo re e fetšago re hlankela Jehofa. (Bala Bafilipi 3:16.) Go go na selo seo se thabišago kudu go swana le go hlankela Jehofa!—Psalme 84:10.

2. Ke dilo dife tše dingwe gape tšeo o swanetšego go tšwela pele o di dira?

Le ge o fetša go bala puku ye, se ga se bolele gore go fedile. Beibele e re re swanetše go ‘apara semelo se sefsa.’ (Baefeso 4:23, 24) Ge o tšwela pele o ithuta Beibele e bile o eya dibokeng, o tlo ithuta dilo tše difsa ka Jehofa le ka dika tša gagwe. Ipotšiše gore o ka ekiša Jehofa bjang bophelong bja gago. Tšwela pele o fetoša bophelo bja gago gore o thabiše Jehofa.

3. Jehofa o tlo go thuša bjang gore o tšwele pele o tiiša segwera sa gago le yena?

Beibele e re: ‘Modimo o tla feleletša go go tlwaetša. O tla go tiiša, e bile o tla go matlafatša.’ (1 Petro 5:10) Ka moka ga rena re fela re lekega go dira diphošo. Eupša Jehofa o re fa dilo tšeo re di hlokago gore re fenye diteko tšeo. (Psalme 139:23, 24) O go tshepiša gore o tla go nea kganyogo le matla a go dira dilo tšohle tšeo a di ratago.—Bala Bafilipi 2:13.

ITHUTE KA MO GO TSENELETŠEGO

Ekwa gore o ka dira eng gore o tšwela pele o tiiša segwera sa gago le Jehofa, le gore Jehofa o tlo go šegofatša bjang.

4. Dula o boledišana le Mogwera wa gago yo mogolo

Go rapela ka mehla le go ithuta Beibele go go thušitše gore o be mogwera wa Jehofa. Dilo tše di ka go thuša bjang gore o tiiše segwera sa gago le Jehofa le go feta?

Balang Psalme 62:8, gomme le boledišaneng ka potšišo e latelago:

O ka kaonefatša bjang tsela yeo o rapelago ka yona e le gore o tiiše segwera sa gago le Jehofa?

Balang Psalme 119:97, gomme le boledišaneng ka potšišo e latelago:

O ka kaonefatša bjang tsela yeo o ithutago Beibele ka yona e le gore o tiiše segwera sa gago le Jehofa?

O ka dira’ng gore o holege kudu ge o ithuta Beibele? E le gore o kwe dilo tše o ka di dirago, bapalang BIDIO ye, gomme le boledišaneng ka dipotšišo tše di latelago:

BIDIO: Kaonefatša Tsela Yeo o Ithutago Beibele ka Yona (5:22)

Ke dilo dife tšeo go boletšwego ka tšona mo bidiong ye tšeo o ka di dirago ge o ithuta Beibele?
Ke ditaba dife tša ka Beibeleng tšeo o ka ratago go ithuta ka tšona?

5. Ipeele dilo tšeo o nyakago go di dira

Ge o dula o na le dilo tšeo o nyakago go di dira gore o hlankele Jehofa, seo se tlo go thuša gore o tšwele pele o tiiša segwera sa gago le yena. Bapalang BIDIO ye, gomme le boledišaneng ka potšišo e latelago:

BIDIO: Bophelo bjo bo Kgahlišago e le Ruri (3:31)

Bidiong ye, Cameron o ile a holega bjang ka ge a ile a ipeela dilo tšeo a nyakago go di dira gore a fetše nako e ntši a hlankela Jehofa?

Ga se batho ka moka bao ba ka kgonago go hudugela nageng e nngwe gore ba yo bolela ditaba tše dibotse. Eupša ka moka ga rena go na le dilo tšeo re ka di dirago e le gore re fetše nako e ntši re hlankela Jehofa. Balang Diema 21:5, gomme o ipotšiše gore ke dilo dife tšeo o ka nyakago go di dira . . .

ka phuthegong.
tšhemong.

Keletšo yeo e lego lengwalong le e ka go thuša bjang gore o kgone go dira dilo tšeo o nyakago go di dira?

Dilo tše dingwe tšeo o ka lekago go di dira

Kaonefatša tsela yeo o rapelago ka yona.
Bala Beibele ka moka.
Tseba batho ka moka ka phuthegong ya geno.
Thoma go ithuta le motho Beibele.
Tšea bobulamadibogo bja go thuša goba bja ka mehla.
Ge e ba o le ngwanabo rena, šoma ka thata gore o swanelege go ba mohlanka wa bodiredi.

6. Thabela bophelo go ya go ile!

Balang Psalme 22:26, gomme le boledišaneng ka potšišo e latelago:

O ka dira’ng gore o thabele bophelo gona bjale le nakong e tlago?

O ITHUTILE ENG?

Tšwela pele o tiiša segwera sa gago le Jehofa, o be o ipeele le dilo tšeo o nyakago go di dira gore o fetše nako e ntši o hlankela Jehofa. Ge o ka dira bjalo, o tlo thabela bophelo go ya go ile!

Dipotšišo

Ke’ng seo se go dirago gore o tshepe gore ka nnete Jehofa o tlo go thuša gore o mo hlankele ka go tshepega?
O ka tiiša bjang segwera sa gago le Jehofa?
Ge o ipeela dilo tšeo o nyakago go di dira gore o fetše nako e ntši o hlankela Jehofa, se se tlo go thuša bjang gore o tiiše segwera sa gago le yena?

Re feditše go bala puku ye ka di:

Seo o ka se dirago

Bala puku ya Batamela Kgaufsi le Jehofa le ya ‘Tlaa o be Molatedi wa ka.’ Dipuku tše di tlo go thuša gore o tšwele pele o tiiša segwera sa gago le Jehofa le Morwa wa gagwe.

ITHUTE KA MO GO OKETŠEGILEGO

Na Jehofa o thaba kudu ge re mo tshepagaletše gatee ka tsela e kgahlišago goba ge re mo tshepagalela letšatši le letšatši?

Botega go Swana le Aborahama (9:20)

Le bahlanka ba Jehofa bao ba tshepegago ka dinako tše dingwe ba ka felelwa ke lethabo. Ekwa gore re ka thušwa ke eng gore re boele re thabe gape.

Go Hwetša Lethabo Gape ka go Ithuta le go Naganišiša (5:25)

Ekwa gore o ka dira eng gore o ipeele dilo tše o nyakago go di dira gore o fetše nako e ntši o hlankela Jehofa, le gore o ka dira eng gore o feleletše o kgonne go di dira?

“Ipeele Dipakane tša Moya Bakeng sa go Tumiša Mmopi wa Gago” (Morokami wa July 15, 2004.)