Jehofa o bopile mosadi wa pele e lego Efa gomme a mo tšea a mo nea Adama gore e be mosadi wa gagwe.​—Genesi 2:21, 22.

Jehofa o be a ba bopile ba ena le menagano le mebele e phethagetšego, yeo e se nago phošo le e nyenyane.

Legae la bona la Paradeise e be e le serapa sa Edene—seo e bego e le lefelo le lebotse kudu leo le nago le noka, dihlare tša dienywa gotee le diphoofolo.

Jehofa o be a boledišana le bona; o be a ba ruta. Ge nkabe ba ile ba mo theetša, ba be ba tla phela ka mo go sa felego Paradeiseng mo lefaseng.

Jehofa o ile a bontšha Adama le Efa sehlare se sengwe sa dienywa moo tšhemong gomme a ba botša gore ge ba be ba ka ja dienywa tša sona, ba be ba tla hwa.

Yo mongwe wa barongwa o ile a rabela kgahlanong le Modimo. Morongwa yoo yo kgopo ke Sathane Diabolo.

Sathane o be a sa nyake gore Adama le Efa ba kwe Jehofa. Ka gona o ile a diriša noga go botša Efa gore ge a be a ka ja dienywa tša sehlare seo o be a ka se hwe, eupša o be a tla swana le Modimo. Ke therešo gore ao e be e le maaka.​—Genesi 3:1-5.