1. Go tla direga’ng ge e ba re ‘batamela kgaufsi le Modimo’?

JEHOFA o rata bao ba mo hlankelago. Ge e ba o rapela Jehofa, o tla go šegofatša gona bjale le nakong e tlago. Beibele e re: “Batamêlang [“kgaufsi le,” NW] Modimo, le Yêna a Le batamêlê.”—Jakobo 4:8.

2. Re ka batamela bjang kgaufsi le Modimo, gomme se se tla kgoma bjang dithapelo tša rena?

² Gore o batamele kgaufsi le Modimo, o swanetše go bala le go diriša Lentšu la gagwe. Ge o rapela ka go dumelelana le thato ya gagwe, Jehofa o tla kwa dithapelo tša gago gomme o tla di araba. Moapostola wa Mokriste Johane o ngwadile gore: “Xomme kholofêlô ye e tiilexo, ye re holofetšexo [Modimo] ka yôna, ké xe re tseba xore ó a re kwa xe re kxopêla se se amanaxo le thatô ya xaxwe. Xomme xe re tseba xobane ó a re kwa xe re tla le kxopêlô efe le efe, xôna re tseba le xore, tše re di kxopetšexo re šetše rè na natšô.”—1 Johane 5:14, 15.

3-7. Re ka hwetša bjang bohlale bjo bo tšwago go Modimo, gomme bo ka re thuša bjang?

³ Go oketša moo, ge o dutše o batamela kgaufsi le Modimo, o tla go nea bohlale bja go lebeletšana le mathata a letšatši le letšatši a bophelo. Beibele e re: “Xe mo xo lena xo ka ba le e a hlaêlwaxo ke bohlale, a a bo kxopêlê xo Modimo.”—Jakobo 1:5.

⁴ Bohlale bjo bo tšwago go Modimo bo ka go thuša bjang? Gare ga dilo tše dingwe, bo ka go thuša go tseba dilo tšeo di sa kgahlišego Jehofa. O ka ba wa ithuta lebaka leo ka lona dilo tše e lego tše fošagetšego le seo o ka se dirago gore o pheme go di dira. Tsebo e bjalo e ka go šireletša mathateng a mantši ao a tlaišago batho ka kakaretšo. Ka mohlala, go kwa keletšo ya Modimo ya gore re hlweke boitshwarong go thuša go šireletša batho ba Modimo malebana le boimana bjo bo sa nyakegego, malwetši ao a fetetšwago ka dikopano tša botona le botshadi le manyalo ao a se nago lethabo goba ao a thubegago.

⁵ Ke’ng se sengwe seo o ka se direlwago ke bohlale bjo bo tšwago go Modimo? Bo ka go dira gore o kgone go hwetša mehola e megolo bophelong. Bo ka go thuša gore o dire diphetho tše bohlale mathateng a kgonthe, a bjalo ka go laola tšhelete ya gago. O tla kgona go phegelela dipakane tšeo di nago le mohola le go gana dipakane tšeo di se nago mohola o swarelelago.

⁶ Le gona, bohlale bjo bo tšwago go Modimo bo ka go thuša ditswalanong tša gago le ba bangwe. O ka ba le bophelo bja lapa bjo bo thabilego kudu. O ka aga segwera seo se swarelelago le sa kgonthe le ba bangwe, gomme o ka hwetša hlompho gaešita le go bao ba sa hlankelego Modimo.

⁷ Go oketša moo, go ba ga gago le bohlale bjo bo tšwago go Modimo go tla kaonefatša pono ya gago ka bophelo. Go tla go thuša go lebeletšana le mathata a bophelo le manyami. Le gona, o tla ba le pono yeo e leka-lekanego le kholofelo e botse ka bokamoso. Ka morago, pono e botse e tla tlaleletša bophelong bja gago bjo bo botse bja monagano le bja mmele.—Diema 14:30; Jesaya 48:17.

8. Ge e ba o hlankela Modimo, ke eng tšeo o ka se kego wa di boifa?

⁸ Ge e ba o hlankela Modimo wa therešo, o tla lokologa dipoifong tšeo di tlaišago bao ba sa mo hlankelego. Ka gobane o a tseba  gore bahu ga ba phele ka lebitleng, o ka se ke wa boifa bao ba hwilego. Ka gobane o bota kholofetšo ya Modimo ya go tsoša bahu, o ka se ke wa boifa go hwa. Le gona ka ge o tseba gore Modimo o na le matla ka moka, o ka se ke wa boifa boloi goba bonoge.—Johane 8:32.

9-11. Ke bomang bao ba tlago go phela Paradeiseng, gomme ke bomang bao ba ka se kego ba phela go yona?

⁹ Ge e ba o batamela kgaufsi le Modimo, o ka se ke wa boifa bokamoso. Go etša ge re bone, Beibele e boletše e sa le pele ka mathata a mantši ao re a bonago lefaseng lehono. Jehofa o re botša gore dilo tše ke tša lebakanyana feela; Mmušo wa Modimo kgaufsinyane o tla dira lefase le paradeise.—Luka 21:10, 11, 31; 23:43.

¹⁰ Ke feela bao ba batamelago kgaufsi le Jehofa le go mo hlankela bao ba tlago go phela Paradeiseng. Beibele e re: “Xo se xokae e mobe ó tlo ba a ile O tlo bôxa lešope, yêna à se xôna. Ba bolêta e tlo ba bôná beng ba naxa ba tlo thaba ka botlalô bya moláô.”—Psalme 37:10, 11.

¹¹ Bao ka manganga ba ganago go theetša melao ya Modimo ya go loka ba tla lahlegelwa ke maphelo a bona sa ruri. (2 Ba-Thesalonika 1:8, 9) Ba ka se sa hlwa ba e-ba gona. Ba tla latela Sathane le batemona ba gagwe lehung la ka mo go sa felego. (Kutollo 20:10, 14) Eupša bao ba ithutago ka Jehofa le go mo hlankela ba tla hwetša lethabo le legolo Paradeiseng lefaseng.

12. Ke’ng seo Beibele e se bolelago ka bokamoso?

¹² Jehofa o na le dilo tše di kgahlišago kudu tšeo a di boloketšego bao ba mo ratago! Anke o lebelele seo Lentšu la gagwe le se bolelago ka bophelo lefaseng la Paradeise:

• Mohora wa dijo: “Xo tlo ba le mohora wa mabêlê [goba dijo] mo naxeng; ’phoxong tša thaba meré ya dienywa e tlo xwaša.”—Psalme 72:16.

• Nywako e swanetšego: “Nywakô ye ba e axaxo ba tlo dula mo xo yôna.”—Jesaya 65:21.

• Mošomo wo o thabišago: “Ba tlo phela ka tše ba itiretšexo tšôna, tša tlo bá tša ba ônalêla diatleng. Ba ka se itapiše, ’me ya ba lefêla.”—Jesaya 65:22, 23.

• Go ka se be le bolwetši: “Mo xo ba ba axilexo fá xo ka se bê le e a rexo: Ke a babya!”—Jesaya 33:24.

• Go ka se be le magole: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ke mo dixôlê di tl’o xo taboxa bo-ka thsêpê, xwa tlo hlalala ’leme la semuma.”—Jesaya 35:5, 6.

• Go ka se be le bohloko, manyami le lehu: “Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:4.

• Go ka se be le ntwa: “[Modimo ke] Mo-fediša-dintwa xo fihla mafelong a lefase.”—Psalme 46:9.

• Bophelo bjo bo sa felego: “Baloki e ba beng ba naxa, ba dula mo xo yôna ka mehla le ka mehla.”—Psalme 37:29.

13. Ke mang feela yo a ka dirago lefase le paradeise, gomme ka baka la’ng?

¹³ Batho le ka mohla ba ka se kgone go tliša dilo tše di swanago le tše, eupša Jehofa o na le matla a go dira selo le ge e le sefe seo a bolelago gore o tla se dira. Ga go selo seo se ka mo thibelago go dira seo a nyakago go se dira. Beibele e re: “Xobane Modimo, xa xo se se sa kxônexexo xo Yêna.”—Luka 1:37.

14. O ka tsena bjang tseleng e išago bophelong bjo bo sa felego?

¹⁴ Ka Dihlatse tša gagwe, Jehofa o nea batho kae le kae sebaka sa go “Tsêna ka kxôrô e pitlaxanexo” le go sepela ka tsela e išago bophelong bjo bo sa felego. Eka o ka ba gare ga batho ba thabilego bao ba amogelago taletšo yeo. Eka o ka diriša bodumedi bja therešo gomme o thabele ditšhegofatšo tša Jehofa ka mo go sa felego!—Mateo 7:13, 14.