1. Ke’ng seo re swanetšego go se dira gore re kgahliše Modimo?

GORE re thabele tswalano e borutho le e lerato le Modimo, ga se ra swanela go itswalanya le bodumedi bja maaka. Re swanetše go diriša bodumedi bja therešo. Lehono dimilione tša batho lefaseng ka moka ba dira seo.

2. Ke kae moo Dihlatse tša Jehofa di ka hwetšwago gona, gomme modiro wa tšona ke ofe?

² Bjalo ka ge Beibele e boletše e sa le pele, barapedi ba therešo ba dira “lešaba le lexolo” leo le tšwago go “dithšaba ka moka, le meloko ka moka, le merafô ka moka, le maleme ka moka.” (Kutollo 7:9) Dinageng tše 235, Dihlatse tša Jehofa tše dimilione di thuša ba bangwe ka mafolofolo go ithuta ka ditsela tša Jehofa tše lerato le tšeo a di nyakago.

3. Ke mang yoo Dihlatse di lebišago borapedi bja tšona go yena, gomme ke mehuta efe ya borapedi yeo di e phemago?

³ Dihlatse di dumela gore Jehofa ke yena feela a swanetšwego ke borapedi. Di gana go khunamela medimo e šele goba diswantšho tša bodumedi. (1 Johane 5:21) Ga di hlomphe bahu ka go tšea karolo meletelong goba ditirelong tše dingwe tšeo di godišago ditumelo tša bodumedi bja maaka le “dithuto tša batemona.” (1 Timotheo 4:1, NW) Lega go le bjalo, di homotša bao ba lahlegetšwego ke baratiwa ba bona ka lehu ka go hlalosa kholofetšo ya Modimo ya gore bahu ba tla tsošetšwa lefaseng la paradeise.—Johane 5:28, 29; Ditiro 24:15.

4. Boemo bja batho ba Modimo ke bofe mabapi le maleatlana?

⁴ Dihlatse ga di itswalanye le maleatlana, bonoge goba boloi ka ge di tseba gore dilo tše di tšwa go Diabolo. Ga di holofele gore maleatlana a tla di šireletša—kholofelo ya tšona e go Jehofa.—Diema 18:10.

5. Ke ka ditsela dife Dihlatse tša Jehofa e sego “karolo ya lefase”?

⁵ Jesu o itše barutiwa ba gagwe e ka se be “karolo ya lefase.” (Johane 17:16, NW) Jesu ka boyena o ile a gana go tšea karolo dipolitiking tša mehleng ya gagwe. (Johane 6:15) Ka mo go swanago, Dihlatse ga di tšee karolo dipolitiking, botšhabeng le dintweng tša go lwela maemo tša lefase le. Lega go le bjalo di lefa metšhelo ya tšona le go kwa melao ya naga yeo di dulago go yona.—Johane 15:19; Ba-Roma 13:1, 7.

6. Ke ditaelo dife tšeo bahlanka ba Modimo ba di latelago mabapi le lenyalo le tlhalo?

⁶ Ka ge di e-kwa ditaelo tša mmušo, Dihlatse di kgonthišetša gore manyalo a tšona a ngwadišwa ka molao. (Tito 3:1) Di kwa tlhahlo ya Modimo, ka gona di phema lenyalo la segadikane. (1 Timotheo 3:2) Go oketša moo, ka ge di diriša melao ya motheo ya Beibele maphelong a tšona, bahlanka ba Modimo ga se gantši ba lebeletšanago le tlhalo manyalong a bona.

7. Dihlatse di bontšhana lerato bjang?

⁷ Dihlatse di a ratana. Lerato le, gotee le lerato la tšona la go rata Modimo, le di kopanya borwarreng bja kgonthe gaešita le ge e le tša merafo le ditšhaba tše dintši. Ge kotsi e direga goba go tšwelela dinako tšeo go nyakegago thušo, Dihlatse di dula di ikemišeditše go thušana. Dihlatse di bontšha lerato ka tsela yeo di phelago ka yona.—Johane 13:35.

8. Ke mekgwa efe e mebe yeo batho ba Modimo ba e phemago?

⁸ Batho ba Jehofa ba šoma ka thata go phela maphelo a go botega le a go loka. Ba phema go utswa, go bolela maaka, boitshwaro bjo bo gobogilego, botagwa le go diriša mekgwa ya kgwebo ya go se botege. Banna ga ba bethe basadi ba bona. Pele e e-ba Dihlatse, ba bangwe ba be ba diriša mekgwa ye, eupša ka thušo ya Jehofa ba kgaoditše. Ba “hlatswitšwe” mahlong a Modimo.—1 Ba-Korinthe 6:9-11.

9. Ke’ng seo puku e nngwe e se boletšego ka dikereke tša moya tša Afrika?

⁹ Ke therešo gore madumedi a mantši a ipolela gore a na le therešo. A ka šupa medirong e makatšago bakeng sa go thekga boipolelo bja wona. Ka mohlala, mabapi le seo se bitšwago dikereke tša moya Afrika, puku e nngwe e re: “Karolo ya ramalea goba ngaka ya ditaola e tšeetšwe legato ke [dihlopha tše difsa tša Bakriste]. . . . Di ipolela gore di a porofeta le go dira mehlolo. Baporofeta bao ba lego gare ga tšona ba bolela dipono le go hlatholla ditoro. Ba diriša meetse a makgethwa, makhura a makgethwa, melora, dikerese le diorelo bakeng sa go fodiša le go thibela malwetši.”

10, 11. Ke ka baka la’ng seo se bitšwago mehlolo lehono se sa bontšhe gore bodumedi bo tšwa go Modimo?

¹⁰ Ditho tša madumedi a di bolela gore mehlolo yeo e bontšha gore bodumedi bja tšona bo šegofaditšwe ke Modimo. Eupša seo se bitšwago mehlolo ga se bontšhe gore bodumedi bo amogelwa ke Jehofa. Sathane o nea barapedi ba bangwe ba maaka matla a go dira “matete.” (2 Ba-Thesalonika 2:9) Go oketša moo, Beibele e boletše e sa le pele gore dimpho tša go dira mehlolo tše di tšwago go Modimo, tše bjalo ka go porofeta, go bolela ka maleme le tsebo e kgethegilego, “di tlo fêla.”—1 Ba-Korinthe 13:8.

¹¹ Jesu o ile a lemoša ka gore: “Mmušong wa maxodimo xo ka se kê xwa tsêna bao bohle, ba e rexo xe ba ra Nna, ba re: Morêna! Morêna! Xo tlo tsêna ba ba diraxo thatô ya Tate wa maxodimong. Ké ba bantši, ka mohla woo bà tl’o xo nthêra ba re: Morêna! Morêna! A xa ra ka ra porofeta ka leina la xaxo? A xa ra ka ra lêlêka meôya e mebe ka leina la xaxo? A xa ra ka ra dira matete ka leina la xaxo? Ké mo Nna ke tl’o xo fetola ka la-ka ka re: Xa ke ešo ka ba ka Le tseba; ntloxeleng lena ba-dira-bokxôpô!”—Mateo 7:21-23.

12. Ke bomang bao ba tlago go tsena Mmušong wa magodimo?

¹² Ka gona, ke bomang bao ba tlago go tsena Mmušong wa magodimo? Ke bao ba dirago thato ya Jehofa.

13. Ke modiro ofe woo Modimo a laelago batho ba gagwe gore ba o dire lehono, gomme ke bomang bao ba o dirago?

¹³ Thato ya Modimo ke efe ka batho ba gagwe lehono? Jesu o itše: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka.” (Mateo 24:14, NW) Wo ke modiro woo Dihlatse tša Jehofa di o phethago ka mafolofolo.

14. Mmušo wa Modimo ke eng, gomme ke bomang bao ba tlago go buša Mmušong wo?

¹⁴ Lefaseng ka moka “leo go agilwego go lona,” Dihlatse tša Jehofa di tsebatša Mmušo wa Modimo e le mmušo wa legodimong woo o tlago go buša lefase ka moka ka go loka. Di ruta gore Jehofa o kgethile Kriste Jesu gore e be Kgoši ya Mmušo woo gotee le ba 144 000 bao e lego babuši-gotee le yena ba ba kgethilwego bathong.—Daniele 7:14, 18; Kutollo 14:1, 4.

15. Ke’ng tšeo Mmušo o tlago go di fediša?

¹⁵ Di diriša Beibele, Dihlatse di bontšha batho gore Mmušo wa Modimo o tla fediša tshepedišo ka moka ya Sathane. Seo se tlago fedišwa e tla ba bodumedi bja maaka le dithuto tša bjona tšeo di hlomphollago Modimo gomme di godiša Diabolo! (Kutollo 18:8) Mebušo ka moka ya batho le yeo e lego kgahlanong le Modimo le yona e tla be e fedišitšwe!—Daniele 2:44.

16. Ke bomang bao e tlago go ba balata ba Kriste Jesu, gomme ba tla phela kae?

¹⁶ Go oketša moo, Dihlatse tša Jehofa di tsebatša gore Kriste Jesu o tla tliša mehola e kgahlišago go bohle bao ba dirago seo Modimo a se nyakago. E tla ba balata ba gagwe lefaseng. Beibele e holofetša gore: “Ó tlo hlakodiša modiitšana xe a lla, le mohlaki xe a hlôka monamodi. O tlo xauxêla mosenyi le mohloki; meôya ya bahumanexi ó tlo e phološa.”—Psalme 72:12, 13.

17. Ke bomang feela bao ba tsebatšago Mmušo wa Modimo?

¹⁷ Ga go na sehlopha se sengwe sa batho seo se dirago thato ya Modimo ka go bolela ditaba tše dibotse tša Mmušo. Ke Dihlatse tša Jehofa feela tšeo di tsebatšago Mmušo wa Modimo lefaseng ka bophara.