1, 2. Ke papišo efe yeo e bontšhago go nyakega ga tekanyetšo bakeng sa go dira phetho ditabeng tša bodumedi?

RE KA tseba Modimo bjang? Na ke ga bohlokwa gore re hlahlobe dithuto ka moka tša madumedi a mantši? Seo se ka se kgonege. Gaešita le ge re ka kgona go dira seo, ke bjang re bego re ka tseba gore ke thuto efe yeo e nepagetšego?

² Ka kgonthe, ka baka la dikgopolo ka moka tšeo di fapa-fapanego ka Modimo, re nyaka tsela ya go tseba seo e lego therešo, tekanyetšo yeo batho ba ka dumelelanago ka yona. Ka mohlala: A re re go na le ngangišano mmarakeng mabapi le botelele bja lešela. Morekiši o bolela gore lešela ke la botelele bja dimithara tše tharo, eupša moreki o nagana gore le ka tlase ga moo. Taba ye e ka rarollwa bjang? Ka go ela lešela ka thapo ya go ela.

3. Ke ka baka la’ng Beibele e ile ya ngwalwa?

³ Na go na le thapo ya go ela, tekanyetšo, bakeng sa go dira phetho ditabeng tša bodumedi? Ee, ke Beibele. Modimo o ile a dira gore Beibele e ngwalwe e le gore batho kae le kae ba kgone go ithuta therešo ka yena. Go gatišitšwe dikopi tše dikete tše dimilione. E fetoletšwe ka moka ga yona goba ka karolo ya yona ka maleme ao a fetago 2 100. Mo e ka bago motho yo mongwe le yo mongwe a ka bala therešo ka Modimo ka leleme la gagwe.

4. Ke tsebišo efe yeo Beibele e e huperego?

⁴ Beibele ke mpho e bohlokwa e tšwago go Modimo. E hlalosa dilo tšeo ka ntle le yona re bego re ka se di tsebe le ka mohla. E re  botša ka bao ba phelago lefelong la moya. E utolla dikgopolo tša Modimo, semelo sa gagwe le morero wa gagwe. E re botša ka ditirišano tša gagwe le batho ka nywaga yeo e fetago e dikete. E bolela ka dilo tšeo di tlago go direga nakong e tlago. Le gona e bontšha kamoo re ka hwetšago tsela e išago bophelong bjo bo sa felego.

5. Ke mohlala ofe wo o bontšhago gore Beibele e dumelelana le thutamahlale?

⁵ Go na le mabaka a mantši ao ka wona o ka dumelago gore Beibele ka kgonthe ke Lentšu la Modimo. Lebaka le lengwe ke gore Beibele e dumelelana le thutamahlale. Mehleng ya bogologolo batho lefaseng ka moka ba be ba nagana gore lefase le be le thekgilwe ke selo se sengwe. Ka mohlala, ka nako e nngwe kua Afrika Bodikela batho ba ile ba dumela gore lefase le be le thekgilwe ke noga yeo e tataganego, yeo e tataganego ga 3 500 ka godimo ga lefase le yeo e tataganego ga 3 500 ka tlase ga lona. Lega go le bjalo, ka go dumelelana le thutamahlale, mongwadi wa Beibele o ile a ngwala nywageng e 3 500 e fetilego gore Modimo ‘lefase o le fegile go se na dithekgo.’—Jobo 26:7.

6. Ke bohlatse bofe bjo bogolo bja gore Beibele e tšwa go Modimo?

⁶ Bohlatse bjo bogolo bja gore Beibele ka kgonthe e tšwa go Modimo ke pego ya yona e phethagetšego ya go bolela bokamoso e sa le pele. Ka go se swane le dinoge, Modimo ka kgonthe o tseba bokamoso; se sengwe le se sengwe seo a se bolelago ka mehla e ba sa therešo.

7. Ke diporofeto dife tše dingwe tša Beibele tšeo di ilego tša phethagatšwa nakong e fetilego?

⁷ Diporofeto tša Beibele tše makgolo-kgolo di ile tša phethagatšwa mehleng ya bogologolo. Ka mohlala, nywageng e 700 e sa le pele Beibele e ile ya bolela ka go nepa gore Jesu o be a tla belegelwa motseng wa Betlehema, gomme seo ke se se ilego sa direga. (Mika 5:2; Mateo 2:3-9) Go tlaleletša diporofetong tše dintši tša mabapi le Jesu, Beibele e bile e ile ya bolela e sa le pele gore o be a tla belegwa ke kgarebe le gore mafelelong o be a tla ekwa ka disilifera tše 30. Diporofeto tšeo le tšona di ile tša phethagala. Ka kgonthe ga go motho yo a bego a ka bolela dilo tšeo e sa le pele!—Jesaya 7:14; Sakaria 11:12, 13; Mateo 1:22, 23; 27:3-5.

8. Ke diporofeto dife tše dingwe tša Beibele tšeo di phethagalago mehleng yeno, gomme di hlatsela eng?

 ⁸ Diporofeto tše dintši tša Beibele di phethagala mehleng ya rena. Mo ke tše sego kae tša tšona:

• “Sethšaba se tlo tsoxêla sethšaba; mmušô o tlo tsoxêla mmušô. Xo tlo ba le dithšišinyêxô tše kxolo kua le kua, le ditlala le dinkhu.”—Luka 21:10, 11.

• Go tla ba le “go ata ga go hloka molao.”—Mateo 24:12, NW.

• “Mehleng ya bofêlô . . . Batho e tlo ba ba xo ithata, ba mexabaru, . . . ba xo se kwe batswadi, . . . ba ba sa tsebexo xo ithswara, manaba a tše boló, . . . baikxanthši ba xo iphsina ba lahlile Modimo.”—2 Timotheo 3:1-5.

Na ga o dumele gore dilo tše ke tšeo di diregago mo nakong ye? Go rereša le go nepagala ga boporofeta bja Beibele go bontšha gore Beibele ga se feela puku yeo e tlwaelegilego. Ke Lentšu leo le buduletšwego la Modimo!—2 Timotheo 3:16.

9, 10. Ke eng seo se bontšhago gore Modimo ga se a dumelela batho gore ba fetoše Beibele?

⁹ A re tšee gore o mong wa feketori le gore o ngwadile lelokelelo la melao bakeng sa bašomi ba gago. Ge e ba lenaba le itšego le fetotše seo o se ngwadilego, o be o tla dira’ng? Na o be o ka se lokiše seo se fetotšwego? Ka mo go swanago, Modimo ga a dumelele batho gore ba fetoše therešo ya Lentšu la gagwe, Beibele.

¹⁰ Bao ba ilego ba leka go fetoša dithuto tša Lentšu la Modimo ga se ba atlega. Ge re bapiša Beibele yeo re nago le yona lehono le dikopi tša bogologolo tša Beibele, di a swana. Se se bontšha gore Beibele ga se ya ka ya fetošwa go theoša le nywaga.