Ka March 23, re letetše go ba le baeng ba ka godimo ga dimilione tše 12 goba go feta moo Segopotšong. Ruri se e tla ba sebaka se sebotse sa go nea bohlatse ge seboledi se tla be se bolela ka mpho ya Jehofa ya topollo le tše dingwe tša ditšhegofatšo tša nakong e tlago tšeo batho ba tlago go di thabela! (Jes 11:6-9; 35:5, 6; 65:21-23; Joh 3:16) Lega go le bjalo, ga se seboledi feela seo se tlago go nea bohlatse tiragalong ye e kgethegilego. Ka moka ga rena re ka tšea karolo ka go amogela baeng ba rena ka borutho. (Rom 15:7) Ka mo tlase go lokeleditšwe ditšhišinyo tšeo re ka di dirišago.

• Go e na le gore o fihle o dule fase o letele gore lenaneo le thome, amogela baeng le bao ba tapilego ka go myemyela ka borutho le ka go ba dumediša ka bogwera

• Gaešita le ge o tla šetša ka mo go kgethegilego bao o ba tlwaetšego bao o ba laleditšego, šetša le ba bangwe bao ba ka bago ba tlile ka ge ba laleditšwe nakong ya lesolo. Laletša bao ba thomago go tla gore ba dule le wena. Badišana le bona Beibele ya gago le go opela le bona ka kopelo ya gago

• Ka morago ga polelo, iphe nako ya go araba dipotšišo tša bona. Ge e ba go se na nako ka ge phuthego ya gabo lena e swanetše go šuthelela phuthego e nngwe, gona dira dithulaganyo tša go etela motho yoo ka morago ga matšatši a sego kae. Ge e ba o se na tsela yeo o ka ikgokaganyago le yena ka yona, o ka re: “Nka thabela go kwa seo o se naganago ka polelo ye. Na go na le tsela yeo nka ikgokaganyago le wena ka yona?”