1 Chronicles 10:1-14
10 Áko Filístiya dineʼé éí Ízrel dineʼé yikʼiijééʼ, áádóó Ízrel dineʼé bisiláo Filístiya dineʼé yikʼee dadínéezhchą́ąʼgo Dził Gilbówa bighą́ąʼgi nidabiʼdiztseed.
2 Nítʼééʼ Saul áádóó hayeʼké éí Filístiya dineʼé tʼáá íiyisí haatįįh yikaigo Jánathan áádóó Abínadab índa Malkishúwa éí Saul yiyeʼké danilı̨́įgo Filístiya dineʼé nidabistseed.
3 Áko Saul hakʼijįʼ tʼáá íiyisí anaaʼ hazlı̨́įʼgo daʼdiłtʼohii dahaskahgo bikʼee tízhdiilyaa.
4 Nítʼééʼ Saul éí bee naʼabaahí há neijaahii ábijiní, Nidiltłish handzı̨́įsgo shighá níłgééd. Áko díí doo bąąh nídahineeshgizhii doo ákódashidoolíiłgo shá nidahodoołtʼih da. Nidi bee naʼabaahí há neijaahii doo íinízin da, háálá tʼáá íiyisí yináldzid. Éí bąą Saul tʼáá hó hadiltłish hadzíídzı̨́įzgo bikʼijįʼ tséʼyaa ízhʼdoolgoʼgo haghá níjilgo dadziztsą́.
5 Áko bee naʼabaahí há neijaahii Saul daaztsą́ągo yiyiiłtsą́, bí ałdóʼ bidiltłish yikʼijįʼ tséʼyaa íʼdoolgoʼgo bighá níjilgo daaztsą́.
6 Kótʼéego Saul daaztsą́ áádóó biyeʼké táltʼéego ałdóʼ daneezná áádóó haghandóó danilíinii tʼáá łahjįʼ ałtso daneezná.
7 Áádóó honítsʼaaʼ góyaa Ízrel dineʼé tʼáá ałtso kéédahatʼíinii éí Ízrel dineʼé bisiláo yóóʼadahineezhchą́ʼígíí índa Saul éí biyeʼké bił nidabiʼdiztseedígíí yaa ákódaniizı̨́įʼgo bikin hadaasʼáii yóóʼadeideezʼą́ągo bí ałdóʼ yóóʼaheezhjééʼ, áko Filístiya dineʼé nidahaaznáago ákwii kéédahatʼı̨́ı̨́ nítʼééʼ.
8 Áko biiskání éí nidabiʼdiztseedígíí bindaalyeʼé yąąh dayídóobeeł yiniyé Filístiya dineʼé yíkai; nítʼééʼ Dził Gilbówa bighą́ąʼgi Saul áádóó biyeʼké nidabiʼdiztseed lá.
9 Áádóó yąąh daʼííbı̨́įʼgo bitsiitsʼiin nideiʼdiiʼą́ índa bibéésh ééʼ yee naabaahii yaa deidiinilgo Filístiya dineʼé bikéyahgóó idaʼiisʼaʼgo edaʼalyaii yichʼįʼ nidahałáhígíí índa diné ałdóʼ yił dahoolneʼ.
10 Áko bidiyin dabidiʼníinii bá kin góneʼ habéésh ééʼ yah adeizhjaaʼ áádóó Déígan bichʼįʼ sohodizin bá kin góneʼ hatsiitsʼiin dahidíʼą́ągo ádayiilaa.
11 Nítʼééʼ Jéíbesh-gíliyad dineʼé tʼáá ałtso Filístiya dineʼé danilíinii Saul ádayííłʼįįdígíí tʼáá átʼé yaa dahodiiztsʼą́ąʼgo
12 diné doo nídanilyéesii tʼáá ałtso dah diikaigo Saul bitsʼíís índa biyeʼké dabitsʼíís ałdóʼ dah deidiijaaʼgo Jéíbeshjįʼ nídeizhjaaʼgo chéchʼil biyaagi dahatsʼin yóóʼádayiilaa índa tʼáadoo daʼayání tsostsʼid jı̨́ azlı̨́ı̨́ʼ.
13 Saul tʼáá hó Bóhólníihii bibee hazʼáanii kʼízhnítiʼgo Bóhólníihii bizaad bikʼijįʼ dzizlı̨́įʼgo índa chʼı̨́įdii yábiiłtiʼii jííkeedgo ałdóʼ biniinaa dadziztsą́,
14 áádóó Bóhólníihii tʼáadoo naízhdééłkid da, éí bąą hwiisxı̨́ índa bee hóhólníihii Jésii biyeʼ David baa deetʼą́.
