1 Chronicles 22:1-19
22 Nítʼééʼ David ání, Díí Bóhólníihii Diyin God bikin biiʼ sohodizin átʼé, áádóó díí bikááʼ nááʼiiniihí bikáaʼjįʼ didlidgo nááhániihii Ízrel dineʼé bá átʼé.
David éí kin biiʼ sohodizin yá hashtʼedinééh
2 Áádóó David éí Ízrel dineʼé bikéyahgi déʼéyóní nidaakaígíí áłah ádoolníiłgo yee nihoníʼą́ áádóó tsé bee kin ádoolnííł biniyé tsé hashtʼeʼniyídaʼiitseełii yitsʼéinínil.
3 Áko David éí yah aʼatiingi dáńʼdítı̨́hí biniyé ił adaalkaałí índa bee ahídaʼiilchaʼii ádadoolnííł biniyé béésh dootłʼizh áłah ájiilaa, áádóó béésh łitsoii tʼóó ahayóí tʼáadoo dah dahidiidleehí áłah ájiilaa,
4 áádóó ałdóʼ dilkʼistsoh tsin neheeshjííʼ tʼóó ahayóí, háálá Sáídan índa Táir kin haalʼáádóó dilkʼistsoh tsin neheeshjííʼ tʼóó ahayóí David yaa deiznil.
5 Nítʼééʼ David ádííniid, Shiyeʼ Sálaman wolyéii ániid naaghá índa tʼah ditʼódí, áádóó Bóhólníihii bá kin nitsaago índa naashchʼąąʼgo ádoolnííł; éí kéyah tʼáá ałtsogóó baa haneʼ doo, áádóó baa haʼniih doo biniyé ádoolnííł. Éí bąą kʼad, biniyé hashtʼedideeshnííł. Áko David dazhdootsaałígíí tʼáá bítsé ląʼígóó hashtʼezhdiidzaa.
6 Áko hayeʼ Sálaman wolyéii hágo bizhdííniid, áádóó Ízrel dineʼé biBóhólníihii Diyin God bá kin ázhdoolíiłgo bee hóhodzoosnííʼ.
7 Áádóó David éí Sálaman ííłní, Shiyeʼ nílíinii, Bóhólníihii shiDiyin God bízhiʼ baa haʼniih doo biniyé kin ádeeshłííł nisin nítʼééʼ.
8 Nidi Bóhólníihii tʼáá bí bizaad yee shichʼįʼ haadzíiʼgo kóní, Diné ląʼí bidił bitsʼádaazlı̨́įgo íinilaa, áádóó ayóó átʼéego nisíníbaaʼ. Shízhiʼ baa haʼniih doo biniyé kin doo ádíílíił da, háálá nahasdzáán bikáaʼgi shinááł diné ląʼí nisíníłtseed.
9 Jó, ashkii ná doochííł, éí diné bił hashtʼehodítʼéii nilı̨́į doo; bikéyah binaagóó biʼanaʼí doo anadabiłʼı̨́ı̨́góó ádeeshłííł. Sálaman bee yídóojiił. Bíyoołkááł biyiʼ Ízrel dineʼé bichʼįʼ hózhǫ́ǫgo áádóó bił hodéezyéelgo ádeeshłííł.
10 Éí shízhiʼ baa haʼniih doo biniyé shá kin íidoolííł, áádóó shiyeʼ nilı̨́į doo índa shí bizhéʼé nishłı̨́į doo, áádóó aláahgo bee bóhólníihgo bił hazʼą́ągi bikááʼdóó nahatʼáii chánah ádeeshłíiłgo Ízrel dineʼé yinantʼáago ahoolʼáa doo.
11 Kʼad, shiyeʼ nílíinii, Bóhólníihii nił hólǫ́ǫ leʼ, áádóó yáʼátʼéehii łaʼ danileʼ doo áádóó Bóhólníihii niDiyin God tʼáá yee naa yááłtiʼígi átʼéego bá kin ádíílííł.
12 Tʼáá hazhóʼó Bóhólníihii éí bee hódzáanii áádóó bee akʼidiʼyiitįįhii neididooʼáałgo Ízrel dineʼé binantʼáa dooleeł biniyé Bóhólníihii niDiyin God bibee hazʼáanii bikʼeh honíłʼı̨́į doo.
13 Bóhólníihii éí Ízrel dineʼé bídéétʼiʼgo yee nihwiizʼáanii índa yee nihodiizʼáanii Mózes bee bichʼįʼ haʼoodzíiʼii hazhóʼó bikʼeh honíłʼı̨́įgo yáʼátʼéehgo nichʼįʼ áhooníił doo. Nidziilgo íʼdíínílzin, áádóó yéego chánah nílı̨́; tʼáadoo nił yéʼí índa doo nidi nídíníílyis da.
14 Jó, kʼad tʼáá shizááká Bóhólníihii bikin biiʼ sohodizin biniyé hashtʼediisdzaa; óola tálent wolyéhígíí neeznádiindi mííl dah adiidloh bíighahgo áádóó béésh łigaii tálent wolyéhígíí mííltsoh dah adiidloh bíighahgo índa béésh łitsoii áádóó béésh dootłʼizh tʼóó ahayóí tʼáadoo dah dahidiidleehí shóiséłtʼeʼ, índa tsin neheeshjííʼ áádóó tsé ałdóʼ hashtʼeishłaa; éí łaʼ bínéidííʼnił.
15 Áádóó ałdóʼ diné nidaalnishii ląʼí nił hólǫ́; tsin neheeshjííʼ áádóó tsé hashtʼedeiłʼíinii índa diné naanish ałʼąą átʼéii dayiichįįhii dahólǫ́.
16 Óola áádóó béésh łigaii áádóó béésh łitsoii índa béésh dootłʼizh doo jóołtaʼ ánéelą́ąʼ da. Éí bąą nídiidáahgo binanilnish, áádóó Bóhólníihii nił hólǫ́ǫ leʼ.
17 David éí Ízrel dineʼé binanitʼaʼí danilíinii tʼáá ałtso hayeʼ Sálaman wolyéii yíká adoojahgo yee haadzíiʼgo kóní,
18 Bóhólníihii nihiDiyin God nilíinii nihił hólǫ́ áádóó tʼáá ałtsodę́ę́ʼ nihił hashtʼehodítʼéego áyiilaa, háálá kéyah yikááʼ kéédahatʼíinii tʼáá ałtso shílákʼeidííʼą́, éí kéyahgi kéédahatʼínígíí Bóhólníihii áádóó bidineʼé binááł bikʼeh dahodeesdlı̨́ı̨́ʼ.
19 Kʼad nihijéí índa nihiiʼ naazíinii bee Bóhólníihii nihiDiyin God hádaohtʼı̨́; éí bąą kʼad, dah dohkáahgo Bóhólníihii Diyin God bihodiyingo hazʼą́ ádaahłééh, áko Bóhólníihii bízhiʼ baa haʼniih doo biniyé kin ádoolníłígíí biiʼ góneʼ tsitsʼaaʼ dílzinii Bóhólníihii bibee ahaʼdeetʼáanii biiʼ sinilii yah adootʼááł, áádóó Diyin God bá chodaoʼíinii dílzinii yah adoojih.
