1 Chronicles 27:1-34
27 Ízrel dineʼé bitahdóó azhéʼé aláahgo bídahólníihii danilíinii áádóó siláo mííl daníjaaʼii áádóó siláo neeznádiin daníjaaʼii binanitʼaʼí danilíinii índa bídahólníihii danilíinii, éí aláahgo naatʼáanii yá nidaalʼaʼgo yah ahikááh áádóó chʼéédahakáahgo nínádíziʼgo nídahidizíidgo nináháhááh. Ninádajilnishígíí naadiin dı̨́įdi mííl ázhnéelą́ąʼgo nínádíziʼjįʼ nahjįʼ hadajiikáahgo ałkééʼ hodisʼnil.
2 Alą́ąjįʼ nídízííd binih Zábdiyel biyeʼ Jashóbiyam éí áłtsé siláo dah yinéełii naadiin dı̨́įdi mííl ánéelą́ąʼgo yinantʼáá nítʼééʼ.
3 Jashóbiyam éí Píírez dineʼé bitahdóó nilíinii átsé nídízííd binih ałdóʼ siláo dah yinéełii bindanitʼaʼí tʼáá ałtso binazhnitʼáá nítʼééʼ.
4 Naaki nídízííd binih Dódai éí Ahówah dineʼé nilı̨́įgo siláo dah yinéełii bee bóhólnííh nítʼééʼ. Míklath ałdóʼ bóhólníihgo siláo naadiin dı̨́įdi mííl ánéelą́ąʼgo yinantʼáá nítʼééʼ.
5 Tááʼ nídízííd binih Jehóíyada aláahgo nááʼiiłniihii nilíinii biyeʼ Biinéíyah éí tááʼ góneʼ siláo dah yinéełii yinanitʼaʼí nilı̨́įgo siláo naadiin dı̨́įdi mííl ánéelą́ąʼgo yinantʼáá nítʼééʼ.
6 Díí Biinéíyah éí siláo tádiin daníjaaʼii bitahdóó diné ayóó ábóodziilii jílı̨́įgo éí siláo tádiinígíí bá aląąjįʼ sizíinii jílı̨́. Biinéíyah biyeʼ Amízabad éí siláo dah yinéełii yitah hólǫ́.
7 Dı̨́ı̨́ʼ nídízííd binih Jóʼab bitsilí Éísahel éí dı̨́ı̨́ʼ góneʼ siláo dah yinéełii yinanitʼaʼí nilı̨́įgo áádóó bikéédę́ę́ʼ biyeʼ Zebadáíyah éí siláo naadiin dı̨́įdi mííl ánéelą́ąʼgo yinantʼáá nítʼééʼ.
8 Ashdlaʼ nídízííd binih Ízrah dineʼé Shámhath éí ashdlaʼ góneʼ siláo dah yinéełii yinanitʼaʼí nilı̨́įgo éí naadiin dı̨́įdi mííl ánéelą́ąʼgo yinantʼáá nítʼééʼ.
9 Hastą́ą́h nídízííd binih Tekówahdóó dineʼé Íkesh biyeʼ Áíra éí hastą́ą́h góneʼ siláo dah yinéełii yinanitʼaʼí nilı̨́įgo naadiin dı̨́įdi mííl ánéelą́ąʼgo yinantʼáá nítʼééʼ.
10 Tsostsʼid nídízííd binih Pélan hoolyéédóó Íífreiyim dineʼé łaʼ Híílez éí tsostsʼid góneʼ siláo dah yinéełii yinanitʼaʼí nilı̨́įgo naadiin dı̨́įdi mííl ánéelą́ąʼgo yinantʼáá nítʼééʼ.
11 Tseebíí nídízííd binih Zíírah dineʼé bitahdóó Húsha dineʼé łaʼ Síbiikai éí tseebíí góneʼ siláo dah yinéełii yinanitʼaʼí nilı̨́įgo naadiin dı̨́įdi mííl ánéelą́ąʼgo yinantʼáá nítʼééʼ.
12 Náhástʼéí nídízííd binih Ánathath kin haalʼáádóó Bénjamin dineʼé łaʼ Éíbiyíízer éí náhástʼéí góneʼ siláo dah yinéełii yinanitʼaʼí nilı̨́įgo naadiin dı̨́įdi mííl ánéelą́ąʼgo yinantʼáá nítʼééʼ.
13 Neeznáá nídízííd binih Niitófah kin haalʼáádóó Zíírah dineʼé łaʼ Maharéíyai éí neeznáá góneʼ siláo dah yinéełii yinanitʼaʼí nilı̨́įgo naadiin dı̨́įdi mííl ánéelą́ąʼgo yinantʼáá nítʼééʼ.
14 Łaʼtsʼáadah nídízííd binih Pírathan kin haalʼáádóó Íífreiyim dineʼé łaʼ Biinéíyah éí łaʼtsʼáadah góneʼ siláo dah yinéełii yinanitʼaʼí nilı̨́įgo naadiin dı̨́įdi mííl ánéelą́ąʼgo yinantʼáá nítʼééʼ.
15 Naakitsʼáadah nídízííd binih Niitófah kin haalʼáádóó Áthniyel dineʼé łaʼ Héldeiyai éí naakitsʼáadah góneʼ siláo dah yinéełii yinanitʼaʼí nilı̨́įgo naadiin dı̨́įdi mííl ánéelą́ąʼgo yinantʼáá nítʼééʼ.
16 Nááʼáłdóʼ Ízrel dineʼé yinanitʼaʼí danilíinii kódaolyé: Zíkrai biyeʼ Eliyíízer éí Rúben dineʼé yinantʼáá nítʼééʼ. Méíyakah biyeʼ Shefatáíyah éí Símiyan dineʼé yinantʼáá nítʼééʼ.
17 Kémyuʼel biyeʼ Hashabáíyah éí Líívai dineʼé yinantʼáá nítʼééʼ. Zéídak éí Éran dineʼé yinantʼáá nítʼééʼ.
18 David bínaaí łaʼ Iiláíhu éí Júdah dineʼé yinantʼáá nítʼééʼ. Máíkel biyeʼ Ámrii éí Ísakar dineʼé yinantʼáá nítʼééʼ.
19 Obadáíyah biyeʼ Ishméíyah éí Zébyulan dineʼé yinantʼáá nítʼééʼ. Ázriyel biyeʼ Jériimath éí Náftalai dineʼé yinantʼáá nítʼééʼ.
20 Azaráíyah biyeʼ Hoshíya éí Íífreiyim dineʼé yinantʼáá nítʼééʼ. Piidéíyah biyeʼ Jówel éí Manáseh dineʼé ałnííʼdóóígíí yinantʼáá nítʼééʼ.
21 Zekaráíyah biyeʼ Ído éí Gíliyad nahósʼaʼgi Manáseh dineʼé ałnííʼdóóígíí yinantʼáá nítʼééʼ. Ábner biyeʼ Jéísiyel éí Bénjamin dineʼé yinantʼáá nítʼééʼ.
22 Jiiróham biyeʼ Azéíriyel éí Dan dineʼé yinantʼáá nítʼééʼ. Díí éí Ízrel dineʼé yinanitʼaʼí danilı̨́ı̨́ nítʼééʼ.
23 Nidi David éí naadiindóó yaago dinééh béédááhaígíí tʼáadoo yiyííłtaʼ da, háálá Ízrel dineʼé sǫʼígi ánéelą́ąʼgo kʼeeʼąą yidínóołtʼı̨́įłgo Bóhólníihii yee nihoníʼą́.
24 Zerowáíyah biyáázh Jóʼab wolyéii diné yiʼííníiłtaʼ nidi tʼáadoo ałtso yiyííłtaʼ da; biʼízhníiłtaʼígíí biniinaa Ízrel dineʼé bikʼijįʼ hóóchįʼgo atídabiʼdiilyaa áádóó jííłtaʼígíí éí aláahgo naatʼáanii David binaaltsoos Kránikals wolyéii doo bikʼinídadzíízoh da.
25 Áádóó Éídiyel biyeʼ Azméíveth éí aláahgo naatʼáanii biyódí ádaatʼéii bee bóhólnííh. Áádóó Azáíyah biyeʼ Jiihánathan éí halgaidi áádóó kin hadaasʼáagi áádóó kin dah naazhjaaʼgi índa yadaʼiitłʼingo bikááʼdóó haʼíídéesʼı̨́ʼí bił nahazʼą́ągi kin biiʼ nooh nídaʼachíihii bee bóhólnííh.
26 Kíílab biyeʼ Ézrai éí dádaʼakʼehgóó ninádahwiiłdlaʼígíí bee bóhólnííh.
27 Réímath kin haalʼáádóó Shímiyai éí chʼil naʼatłʼoʼii deílʼáhígíí yaa áhályą́ą́ nítʼééʼ áádóó Shíífam hoolyéédóó Zábdai éí wáin biiʼ nooh nídaachíhígíí yaa áhályą́ą́ nítʼééʼ.
28 Gííder hoolyéédóó Béíyal-héínan éí áliv tsin naazkaadígíí áádóó síkamor tsin naazkaadígíí wóyahgo dahoníteelgóó dahólónígíí yaa áhályą́ą́ nítʼééʼ. Jóʼash éí áliv bikʼah nooh nídaachíihii yaa áhályą́ą́ nítʼééʼ.
29 Shéran nahósʼaʼdóó Shítrai éí Shéran nahósʼaʼgi dibé yaa áhályą́ą́ nítʼééʼ. Adléíyai biyeʼ Shéífat éí honítsʼaaʼ góyaa béégashii yaa áhályą́ą́ nítʼééʼ.
30 Íshmeiyel dineʼé nilíinii Óbil éí ghą́ą́ʼaskʼidii yaa áhályą́ą́ nítʼééʼ. Miirónath nahósʼaʼdóó Jedíyah éí télii yaa áhályą́ą́ nítʼééʼ.
31 Héíger dineʼé łaʼ Jéíziz éí dibé yaa áhályą́ą́ nítʼééʼ. Díí éí tʼáá ałtso aláahgo naatʼáanii David binaalyeʼé baa áháyą́ągi yindantʼáá nítʼééʼ.
32 Jánathan éí David bahastóí jílı̨́įgo kótʼé nínígíí jílı̨́, diné hóyáanii áádóó naaltsoos ííłʼíní jílı̨́ áádóó Hákmonai biyeʼ Jiiháíyel éí aláahgo naatʼáanii biyeʼké neinitin nítʼééʼ.
33 Ahíthofel éí aláahgo naatʼáanii bikótʼé nínígíí nilı̨́ áádóó Árkai dineʼé łaʼ Húshai éí aláahgo naatʼáanii yikʼis nilı̨́įgo yił naʼahilyéé nítʼééʼ.
34 Biinéíyah biyeʼ Jiihóíyadah áádóó Abáíyathar éí Ahíthofel bitsʼáskʼehgi naʼakʼíyáłtiʼii silı̨́įʼgo dah nááneezké índa aláahgo naatʼáanii bisiláo dah deínéehii binanitʼaʼí Jóʼab wolyéé nítʼééʼ.
