1 Chronicles 29:1-30
29 Áádóó aláahgo naatʼáanii David ałdóʼ diné áłah nilínígíí tʼáá ałtso yichʼįʼ haadzíiʼgo ání, Shiyeʼ Sálaman tʼáá sáhí Diyin God nábidiiłtínígíí ániid naaghá áádóó tʼah bíniʼ ditʼódí, índa naanish tsʼídá ayóó átʼé, háálá díí kin biiʼ sohodizin éí doo diné bá álnéeh da, nidi Bóhólníihii Diyin God bá álnééh.
2 Kʼad shiDiyin God bikin biiʼ sohodizin hadidooníłígíí biniyé hashtʼediisdzaa: óola bee ádoolníłígíí bá óola sinil áádóó béésh łigaii bee ádoolníłígíí bá béésh łigaii sinil áádóó béésh łitsoii bee ádoolníłígíí bá béésh łitsoii sinil áádóó béésh dootłʼizhii bee ádoolníłígíí bá béésh dootłʼizhii sinil áádóó tsin neheeshjííʼ bee ádoolníłígíí bá tsin neheeshjííʼ sinil áádóó tsé nitłʼizii ániks wolyéii áádóó tsé nitłʼizii biih dahidooʼniłígíí áádóó tsé bitsʼádaʼdeezlídígíí áádóó nitłʼiz ałtaasʼéí áádóó tsé daʼílíinii ałʼąą ádaatʼéii índa tsé dildǫʼii márbel wolyéii dziilí bee ląʼí áłah íishłaa.
3 Nááʼáłdóʼ shiDiyin God bikin biiʼ sohodizin baa shił hózhǫ́ǫgo bąą tʼáá átʼé áádóó díí bóóltąʼgo tʼáá shí shiyódí óola áádóó béésh łigaii shee hólǫ́ǫgo shiDiyin God bikin biiʼ sohodizin baa diníʼą́; tʼáá áchą́hwíídéeniʼgo tʼáá ałtsojįʼ bilááh honeeʼą́ągo kin diyinii ádoolnííł biniyé hashtʼediisdzaa.
4 Óola éí táadi mííl tálent* bíighahgo Ófer nahósʼaʼdóó óola yáʼátʼéehii áádóó béésh łigaii bąąh hadoolyı̨́įʼii tʼáá bízhání éí tsostsʼidi mííl tálent bíighahgo kin góneʼ bikʼídooltih biniyé baa diníʼą́.
5 Áádóó óola tʼáá bízhánígo óola yee ádeidoolíłígíí índa béésh łigaii tʼáá bízhánígo béésh łigaii yee ádeidoolíłígíí éí diné nidaʼachʼąąh dayiichįįhii tʼáá ałtso yindadoolnishgo nideidoochʼąh. Áko háishąʼ tʼáá bí íinízingo díí jı̨́ diyingo ídiʼdoolníiłgo Bóhólníihii yá naalʼaʼ doo?
6 Nítʼééʼ daʼazhéʼé yę́ę aláahgo bídahólníihii áádóó Ízrel dineʼé binanitʼaʼí danilíinii áádóó siláo mííl daníjaaʼii áádóó siláo neeznádiin daníjaaʼii binanitʼaʼí danilíinii éí aláahgo naatʼáanii binaanish bee bídahólníihii bił tʼáá bí ádeinízingo biyódí łaʼ áajįʼ ádayiiznil.
7 Óola éí ashdladi mííl tálent bíighahgo áádóó neeznáadi mííl dram* ałdóʼ bíighahgo áádóó béésh łigaii neeznáadi mííl tálent bíighahgo áádóó béésh łitsoii tseebídiindi mííl tálent bíighahgo índa béésh dootłʼizhii tʼááłáhídi neeznádiindi mííl tálent bíighahgo Diyin God bikin biiʼ sohodizingi choidooʼįįłígíí biniyé ádayiiznil.
8 Tʼáá háiida tsé daʼílíinii bee dahólónígíí éí Bóhólníihii bikin biiʼ sohodizingi biyódí nooh nídeilchíihjįʼ Gérshan dineʼé łaʼ Jiiháíyel wolyéii há yaa áhályą́ą doo biniyé baa dadziiznil.
9 Áko díí tʼáá bí ádeinízingo adaʼiiznilígíí biniinaa diné bił nidahoozhǫǫh nítʼééʼ, háálá tʼáá bí ádeinízingo doo naaki nilı̨́ı̨́góó biyódí Bóhólníihii yaa nídayiisʼnil, áádóó aláahgo naatʼáanii David ałdóʼ bił nihoozhǫǫhgo ayóó átʼéego bił hózhǫ́ǫ́ nítʼééʼ.
10 Éí bąą áłah ílínígíí tʼáá átʼé binááł David éí Bóhólníihii yaa haznihgo ání, Nihizhéʼé yę́ę Ízrel wolyéii biBóhólníihii Diyin God nílíinii, nił hózhǫ́ǫgo naa haʼniihgo hoolʼáágóó ahóyéelʼáa doo.
11 Bóhólníihii nílíinii, ayóó ánítʼé áádóó nidziil áádóó naa haʼniih áádóó akʼeh hidídleeh áádóó aláahdi ánítʼé, háálá yádiłhił biyiʼ dahólóonii índa nahasdzáán bikááʼ dahólóonii tʼáá ałtso nííʼ átʼé; tʼáá ałtso bee nóhólnííh, Bóhólníihii nílíinii, áádóó wódahgo ániʼdólzingo tʼáá ałtso binanítʼá.
12 Yódí índa ił ídlı̨́ nitsʼą́ą́dę́ę́ʼ nihwiileeh áádóó tʼáá ałtsoní binanítʼá; bee adziilii índa ayóó éʼétʼéii dah yílééł áádóó ayóó átʼéii áálííł índa diné tʼáá ałtso adziil baa hidíʼaah.
13 Éí bąą kʼad, nihiDiyin God nílíinii, nichʼįʼ ahééh daniidzin índa nízhiʼ ayóó átʼéii baa dahwiiʼniih.
14 Nidi shíshąʼ éí haʼátʼíí nishłı̨́ áádóó shidineʼéshąʼ haʼátʼíí ádaatʼı̨́įgo tʼáá nihí ádeiniidzingo kótʼéego adaʼiyeeʼnil? Háálá tʼáá ałtsoní nitsʼą́ą́dę́ę́ʼ hólǫ́ áádóó tʼáá níiʼii naa nídahiiʼnil.
15 Jó, ninááł danihizhéʼé yę́ę naasdeeʼígi átʼéego áyóní áádóó tʼóó tádadinéehii daniidlı̨́. Nihokáaʼgi nihídayéełkaahígíí chahaʼoh adahalzhoodígi átʼé; kweʼé doo hoolʼáágóó hiniiʼnáa da.
16 Bóhólníihii nihiDiyin God nílíinii, daatʼíinii nináneelʼą́ąjįʼ tʼáá ałtso áłah ádeiilyaaígíí bee kin ádoolníiłgo nízhiʼ diyinii baa dahwiiʼniih doo biniyé, díí nitsʼą́ą́dóó ádaatʼé índa tʼáá átʼé níiʼii ádaatʼé.
17 ShiDiyin God nílíinii, shí ałdóʼ shił bééhózin, ajéí nabínítaah áádóó tʼáá ákogi ádaatʼéii baa nił hózhǫ́. Shí éí shijéí bee nisinii bikʼehgo doo naaki nilı̨́ı̨́góó díí tʼáá ałtso naa nídiníʼą́; kʼad nidineʼé kǫ́ǫ́ áłah nilínígíí bił dahózhǫ́ǫgo tʼáá bí ádeinízingo naa náhiditʼaahii ná adayiiznil.
18 Éíbraham áádóó Áízak índa Ízrel danihizhéʼé yę́ę biBóhólníihii Diyin God nílíinii, hoolʼáágóó tʼáá áłahjįʼ díí nidineʼé tʼáá biyiʼídóó ádeinízinii tʼáá ałtso baa áhólyą́ áádóó naa nitsídaakeesgo íínísin.
19 Áko nibikʼeh óʼooʼníiłii áádóó bee hahínídzíiʼii índa bee nihoyíníʼáanii tʼáá átʼé yiʼósin doo áádóó kin biiʼ sohodizin bá hashtʼediisdzaaígíí íidoolíiłgo biniyé shiyeʼ Sálaman bijéí doo naaki nilı̨́ı̨́góó íínísin.
David yitsáskʼehgi Sálaman aláahgo naatʼáanii náánásdlı̨́ı̨́ʼ (1Kgs. 2:10-12)
20 Nítʼééʼ David áłah ílínígíí tʼáá átʼé yichʼįʼ haadzíiʼgo ání, Kʼad Bóhólníihii nihiDiyin God bił hózhǫ́ǫgo baa dahohniih. Áko áłah ílínígíí tʼáá átʼé dabizhéʼé yę́ę biBóhólníihii Diyin God bił hózhǫ́ǫgo yaa dahaniih, áko Bóhólníihii yichʼįʼ yaa ádaadzaago nidahasá índa aláahgo naatʼáanii yaa dahaznih.
21 Áádóó biiskání Bóhólníihii bichʼįʼ náádahidoonihii náádayiisniiʼ áádóó Bóhólníihii bichʼįʼ didlidgo nááhániihii náádayiisniiʼ: éí dóola tʼááłáhídi mííl, deenástsʼaaʼ tʼááłáhídi mííl índa dibé yázhí tʼááłáhídi mííl yanáadziʼgo nááhániihii tʼáá bił Ízrel dineʼé tʼáá ałtso bá ląʼígo náádayiisniiʼ.
22 Áádóó éí bijı̨́ ayóó átʼéego bił dahózhǫ́ǫgo daʼííyą́ą́ʼ áádóó daʼoodlą́ą́ʼ.
Áko naakidi aleeh góneʼ David biyeʼ Sálaman aláahgo naatʼáanii nilı̨́įgo ádayiilaa áádóó aláahgo bíhólníih doo biniyé Bóhólníihii yichʼįʼ akʼah yikʼi yadayiiziid índa Zéídak nááʼiiłniihii nilı̨́į doo ałdóʼ biniyé akʼah yikʼi yadayiiziid.
23 Nítʼééʼ Sálaman éí bizhéʼé David bitsáskʼehgi aláahgo naatʼáanii nilı̨́įgo Bóhólníihii bibikááʼdóó nahatʼáii yikáaʼgi dah neezdá áádóó binahatʼaʼ bidziil silı̨́įʼgo Ízrel dineʼé tʼáá átʼé bikʼeh dahółʼı̨́ı̨́ nítʼééʼ.
24 Naatʼáanii tʼáá ałtso áádóó diné dahayóii índa David biyeʼké tʼáá ałtso ałdóʼ aláahgo naatʼáanii Sálaman yikʼeh dahółʼı̨́į doo biniyé yaa ádadeestʼą́.
25 Áádóó Ízrel dineʼé tʼáá ałtso binááł Bóhólníihii éí Sálaman ayóó átʼéego baa haʼniihgo áyiilaa áádóó aláahgo tsʼídá ayóó átʼéii naatʼááh ídlı̨́ haidiníʼą́, áko Ízrel dineʼé bitahgi aláahgo naatʼáanii nídaadleełii tsʼídá doo łaʼ ákótʼée da nítʼééʼ.
26 Kótʼéego Jésii biyeʼ David éí Ízrel dineʼé tʼáá átʼé yinantʼáá nítʼééʼ.
27 Ízrel dineʼé yinantʼáago dízdiin nááhai; Hííbran kin haalʼáhígi nantʼáago tsostsʼid nááhai índa Jerúsalem kin haalʼáagi nantʼáago tádiindóó baʼaan tááʼ nááhai.
28 Tʼáá íiyisí haastihgo daaztsą́ índa ląʼí binááhai; biyódí áádóó yee ił nilíinii ląʼí bee hólǫ́ǫgo ahoolzhiizh. Áádóó biyeʼ Sálaman hatsáskʼehgi aláahgo naatʼáanii silı̨́įʼgo nantʼáá nítʼééʼ.
29 David deeshnishdóó binaanish ninítʼiʼjįʼ Sámuel náásgóó áhodoonííł yaa halneʼii binaaltsoos bikááʼ áádóó Néíthan éí Diyin God yá halneʼii binaaltsoos bikááʼ índa Géed náásgóó áhodoonííł yaa halneʼii binaaltsoos bikááʼ nídaháasdzo,
30 nantʼá nítʼéʼígíí tʼáá átʼé áádóó ábóodziil nítʼéʼígíí áádóó bichʼįʼ áhóótʼįįdígíí áádóó Ízrel dineʼé bichʼįʼ ádahóótʼįįdígíí índa kédaayahdóó aláahgo bee ídahólníihgo bił nahazʼáanii tʼáá ałtso bichʼįʼ ádahóótʼįįdígíí éí naaltsoos bikʼinídaháasdzo.
Footnotes
^ Tálent wolyéii tsostsʼidiindóó baʼaan ashdlaʼ dah hidiidloh bíighahgo óolyé.
^ Dram wolyéhígíí hastą́diingo éí tʼááłáʼí dah hidiidloh bíighahgo daatsʼí óolyé.
