1 Chronicles 5:1-26
5 Rúben éí Ízrel alą́ąjįʼ bá hoʼdizhchíinii jílínígíí hayeʼké hó éí alą́ąjįʼ nijighá, nidi hazhéʼé beʼasdzą́ą́ bił ahizhdoolyáhígíí bąą alą́ąjįʼ yizhchínígíí bee bóhólníihii Ízrel biyeʼ Jóseph éí biyeʼké nidiltʼéego baa deetʼą́. Áko alą́ąjįʼ hoʼdizhchínígíí bee hóhólníihii éí haʼáłchíní náás ahoolchíiłii daabííʼ nítʼééʼ nidi éí tʼáadoo bííʼ daazlı̨́įʼ da.
2 Azhą́ Júdah hakʼisóó biláahgo áhóodziil nítʼééʼ áádóó hatsʼą́ą́dóó aláahgo naatʼáanii hazlı̨́ı̨́ʼ, nidi Jóseph éí alą́ąjįʼ yizhchínígíí bee bóhólníihii bííʼ silı̨́ı̨́ʼ.
3 Rúben éí Ízrel alą́ąjįʼ bá hoʼdizhchínígíí hayeʼké éí Héínak, Pállu, Hézran índa Kármii daolyé.
4 Jówel baʼáłchíní ahoolchíiłii, Jówel biyeʼ Shiiméíyah wolyé, Shiiméíyah biyeʼ Gag wolyé, Gag biyeʼ Shímiyai wolyé,
5 Shímiyai biyeʼ Máíkah wolyé, Máíkah biyeʼ Riyéíyah wolyé, Riyéíyah biyeʼ Béíyal wolyé.
6 Béíyal biyeʼ Biyérah wolyéego Asíriya dineʼé aláahgo binanitʼaʼí Tílgath-pilníízer bisná. Rúben dineʼé yinanitʼaʼí nilı̨́ı̨́ nítʼééʼ.
7 Áádóó hakʼisóó baʼáłchíní náás daʼahílchíhígíí bízhiʼ naaltsoos bikʼidaasdzoh. Aląąjįʼ bá naazíinii éí Jáíyel áádóó Zekaráíyah
8 índa Bíílah daolyé. Bíílah bizhéʼé Éízaz wolyé. Éízaz bizhéʼé Shííma wolyé. Shííma bizhéʼé Jówel wolyé. Éí Aróʼer kin shijaaʼdi bighan. Nííbo kin shijaaʼdóó Béíyal-míyan kin haalʼáajįʼ Rúben hakéyah nítʼééʼ.
9 Áádóó haʼaʼaahjigo Yufréítiiz tooh nílínídóó honoojí bichʼįʼgo bee hóhólnííh nítʼééʼ, háálá Gíliyad kéyahdi dahabéégashii kʼeeʼąą nídeeshzhiizh.
10 Saul bíyoołkááł yę́ędą́ą́ʼ Héígar dineʼé hoł anadaʼahilʼı̨́įgo bikʼeh dazdeesdlı̨́ı̨́ʼ, áádóó haʼaʼaahjigo Gíliyad kéyah tʼáá átʼé dabighan biiʼ kéédahojitʼı̨́ı̨́ nítʼééʼ.
Géed bitsʼą́ą́dóó aníchíinii
11 Béíshan kéyahdi Sálkah kin haalʼáajįʼ Géed dineʼé hanaashiijí kéédahatʼı̨́ı̨́ nítʼééʼ.
12 Béíshangi Jówel alą́ąjįʼ naatʼáanii nilı̨́ı̨́ nítʼééʼ; nááʼákóneʼ Shéífam nináánítʼáá nítʼééʼ, nááʼákóneʼ Jéíyanai nináánítʼáá nítʼééʼ índa nááʼákóneʼ Shéífat nináánítʼáá nítʼééʼ.
13 Áádóó dahakʼisóó dabizhéʼé yę́ę badaʼáłchíní éí Máíkel, Miishálam, Shííba, Jóreiyai, Jéíka, Záíya áádóó Ííber daolyé; tsostsʼid yiltʼéé lá.
14 Díí éí Ábiheil baʼáłchíní danilı̨́. Ábiheil bizhéʼé Húrai wolyé, Húrai bizhéʼé Jarówah wolyé, Jarówah bizhéʼé Gíliyad wolyé, Gíliyad bizhéʼé Máíkel wolyé, Máíkel bizhéʼé Jiishísheiyai wolyé, Jiishísheiyai bizhéʼé Jáhdo wolyé, Jáhdo bizhéʼé Baz wolyé.
15 Ábdaiyel biyeʼ Éíhai wolyé, Gúnai binálí nilı̨́įgo dahazhéʼé yę́ę baʼáłchíní náás daʼahílchíihii yá aląąjįʼ sizı̨́.
16 Áádóó Gíliyad kéyahgóó áádóó Béíshan kéyahgóó kin dah naazhjaaʼgi índa Shéran kéyahgi dahootsogóó kéédahatʼı̨́ı̨́ nítʼééʼ.
17 Júdah dineʼé aláahgo binanitʼaʼí Jótham wolyéii índa Ízrel dineʼé aláahgo binanitʼaʼí Jerobówam wolyéii bíyoołkááł yę́ędą́ą́ʼ díí baʼáłchíní náás daʼahílchíhígíí tʼáá ałtso bízhiʼ naaltsoos bikʼidaasdzoh.
Naakidóó nááʼáłnííʼ dineʼé baa haneʼ
18 Áádóó Rúben dineʼé áádóó Géed dineʼé índa Manáseh dineʼé ałnííʼdóó doo nídanilyéesii naagé índa diltłish nideiłjid yídaneelʼáanii áádóó daʼdiłtʼohii índa naʼabaah dayiichįįhii dízdiindóó baʼaan dı̨́įdi mííldóó baʼaan tsostsʼidi neeznádiindóó baʼaan hastą́diin nídahidiibaaʼ.
19 Áko Héígar dineʼé, Jííter dineʼé, Néífish dineʼé áádóó Nódab dineʼé yił daʼahoogą́ą́ʼ.
20 Jó, bíká oʼoolwodgo diné nayískai áádóó Héígar dineʼé índa diné bił nidaabaahii haidiníʼą́, háálá anaaʼ baa naʼaldeehdóó Diyin God yichʼįʼ yéego sodadilzingo Diyin God bidiiztsʼą́ą́ʼ, jó, Diyin God yaa dadzólíí nítʼééʼ.
21 Áko anaʼí dabilı̨́ı̨́ʼ bighadadziisʼnil. Ghą́ą́ʼaskʼidii ashdladiindi míilgo, dibé naakidi neeznádiindóó baʼaan ashdladiindi míilgo, télii naakidi míilgo áádóó diné neeznádiindi mííl ánéelą́ąʼgo dadzisná.
22 Anaʼí ląʼí nidadzistseed, háálá Diyin God bíniikʼehgo anaaʼ dahojisłı̨́ı̨́ʼ. Ízrel dineʼé dahoʼdisnáajįʼ ákwii kéédahojitʼı̨́ı̨́ nítʼééʼ.
23 Béíshan nahósʼaʼdóó Béíyal-hérman hoolyéii bichʼįʼgo áádóó Síínir hoolyéii bichʼįʼgo índa Dził Hérman bitsı̨́įjįʼ Manáseh dineʼé ałnííʼdóó éí kéyahgi kéédahatʼı̨́įgo kʼeeʼąą dínéestʼą́.
24 Áko Íífer, Íshai, Iiláíyel, Ázriyel, Jeremáíyah, Hodaváíyah índa Jádiyel dabizhéʼé yę́ę baʼałkʼeedóó aʼáłchíní danilı̨́įgo aląąjįʼ naazíinii danilı̨́ı̨́ nítʼééʼ. Éí diné ayóó ádaatʼéii áádóó doo nídanilyéesii danilı̨́įgo índa dabizhéʼé yę́ę baʼałkʼeedóó baʼáłchíní danilı̨́įgo aląąjįʼ naazı̨́įgo bee béédahoʼdílzin nítʼééʼ.
25 Éí dabizhéʼé yę́ę biDiyin God yichʼįʼ ádił daʼasiih, háálá dabinááł Diyin God ábísdįįd, nidi tʼáá éí kéyahgi ajił kʼehgo diyin dabidiʼníinii yee tʼóó ádee nináádaasʼneʼ.
26 Nítʼééʼ Asíriya dineʼé aláahgo binanitʼaʼí Pul wolyéii, tʼáá éí Tílgath-pilníízer ałdóʼ wolyé, éí Ízrel dineʼé biDiyin God báhóółchįįdgo Rúben dineʼé, Géed dineʼé índa Manáseh dineʼé ałnííʼdóó ałtso yisná. Éí Héílah nahósʼaʼjįʼ, Héíbor nahósʼaʼjįʼ, Hára nahósʼaʼjįʼ índa Gózan tooh nílíníjįʼ honíʼeezhgo díí jı̨́įjįʼ ákwii kéédahojitʼı̨́.
