1 Corinthians 1:1-31
1 Shí Paul, Diyin God íinízinígíí bee Jesus Christ bá deeshʼaałgo shíká ádííniidii, áádóó Sástheniiz nihikʼis nilínígíí bił naaltsoos íilnééh.
2 Kórinthgi* Diyin God dayoodláanii áłah nádleehii Christ Jesus bee diyingo ádabiʼdiilyaii, Diyin God bidiyı̨́ı̨́ʼ dadooleełgo bíká ádahodooʼniidii, áádóó tʼáá ałtsogóó bí áádóó nihí nihiBóhólníihii Jesus Christ bízhiʼ bee sodadiilzinígíí tʼáá ałtso ałdóʼ bichʼįʼ naaltsoos íilnééh:
3 Diyin God nihiTaaʼ áádóó Bóhólníihii Jesus Christ bibee ajoobaʼ índa bibee achʼįʼ hózhǫ́ náhásdlı̨́įʼii yee nihikʼijidlíi doo.
Diyin kʼehgo akʼihojidlí baa ahééh hwiindzin
4 Diyin God bibee ajoobaʼ éí Christ Jesus bee nihikʼihojidlíhígíí bąą tʼáá áłahjįʼ Diyin God bichʼįʼ nihaa ahééh nisin.
5 Tʼáá bí bee tʼáá ałtsojįʼ saad tʼáá ałtso índa ił ééhózin tʼáá ałtso bee dasoohtʼįįd.
6 Christ baa haneʼ tʼáá aaníí deisoohdląądii bikʼehgo dahinohná,
7 áko nihiBóhólníihii Jesus Christ yitʼíní ánáádiʼdoolníłígíí bibaʼ ádanohtʼéego Níłchʼi Diyinii bitsʼą́ą́dóó aa yílyáii tʼáá ałtso yee nihikʼijidlí.
8 Áádóó tʼáá nihonítʼiʼjįʼ danołdzilgo ánihijósin doo, áko nihiBóhólníihii Jesus Christ beiníłką́ądi tʼáadoo bee nihikʼídahótʼahígóó nihéédahodoozįįł.
9 Diyin God baʼahódlíii biYeʼ Jesus Christ nihiBóhólníihii bił ahił danohdlı̨́į doo biniyé nihíká ádííniid.
Oodlání ałnaashii dah deínééh
10 Shikʼisóó, tʼáá ánółtso tʼáadoo ałghadadohtʼáhí, áádóó tʼáadoo ałtsʼáhkahí, nidi tʼááłáʼí góneʼ nitsáhákeesgo áádóó tʼááłáʼí hootʼááł bee daʼahíínóhtąʼ doogo nihiBóhólníihii Jesus Christ bízhiʼ binahjįʼ baa nánihooshkąąh.
11 Háálá, shikʼisóó, łaʼ Klówii bighandóó shił dahalneʼgo, łaʼ saad ahídaatʼááh danihiłní.
12 Ááhdishníinii éí díí: nihí łaʼ, Shí Paul yíhoołʼaahii nishłı̨́, dadohní. Áádóó łaʼ éí, Shí tʼéí Apálas yíhoołʼaahii nishłı̨́. Náánáłaʼ éí, Shí tʼéí Peter yíhoołʼaahii nishłı̨́. Náánáłaʼ éí, Shí tʼéí Christ yíhoołʼaahii nishłı̨́, dadohníí lá.
13 Christ daatsʼí ałtsʼááʼnil? Dooda lą́ą! Daʼ tsin ałnáoszid bąąhjįʼísh Paul nihá bił oʼoolkaal? Paul bízhiʼ daatsʼí binahjįʼ tó bee danihiʼdoolzı̨́ı̨́ʼ? Dooda lą́ą!
14 Diyin God bichʼįʼ ahééh nisin, nihitahgi doo łaʼda tó bee yísı̨́įʼ da, nidi Kríspas índa Géíyas tʼéiyá tó bee yísı̨́ı̨́ʼ.
15 Áko, Paul bízhiʼ binahjįʼ tó yee dayíísı̨́ı̨́ʼ, doo jidóneʼ átʼée da.
16 (Stéfanas bighandóóígíí ałdóʼ tó bee deísı̨́ı̨́ʼ. Áádóó doo łaʼda tó bee hóósı̨́ʼí da nisin.)
17 Háálá tó bee asįįh dooleeł biniyé Christ doo shiníłʼaʼ da, nidi haneʼ yáʼátʼéehii baa hashneʼ doo biniyé. Saad naachʼąąhígíí doo bee hashneʼ da, háálá saad naachʼąąhii bee hashneʼgo éí tsin ałnáoszid yąąhjįʼ Christ daaztsą́ągo baa hashneʼígíí doo idééłníi da doo.
Christ éí Diyin God bibee adziilii índa bibee hódzáanii nilı̨́
18 Háálá tsin ałnáoszid bąąhjįʼ Christ daaztsą́ągo baa haneʼígíí éí diné doo yisdánáhaaskaii haneʼ tʼáá ádzaaí átʼé danízin. Nidi yisdánihiʼdiisʼnilígíí éí Diyin God bibee adziilii átʼé daniidzin.
19 Jó, Diyin God bizaad bee akʼeʼashchíinii ání,
Dahóyą́ dabidóʼníinii éí doo dahóyą́ą́góó ádadeeshłííł,Áádóó nidahazyąądii éí bibee hódząʼ tʼáadoo nánídlínígóó ádeeshłííł.
20 Diné hóyą́ dabidóʼníiniishąʼ? Bee hazʼáanii yínaʼniłtinii dabidóʼníiniishąʼ? Díí hoogáłígíí biyiʼ aghadaʼditʼáahiishąʼ? Diyin God éí nihokááʼ dineʼé bibee hódzáanii doo áháyą́ átʼéego ííshjání áyiilaa.
21 Háálá nihokááʼ dineʼé habee hódzáanii bee Diyin God tsʼídá doo bééhozdoosįįł da, jó, haneʼ yáʼátʼéehii éí tʼáá ádzaaí átʼé daznízin nidi, baa dahwiilneʼii dayoosdląądii yisdéidiyooniłgo Diyin God hóyą́ągo yinahazʼą́.
22 Háálá Jew dineʼé danilíinii éí Diyin God bibee adziilii bee bééhózinii nihá ádoolnííł daaníigo dayókeed, áádóó Gríik dineʼé danilíinii éí bee hódzáanii tʼéí bił ayóó ádaatʼé.
23 Nidi nihí éí tsin ałnáoszid bąąhjįʼ Christ bił oʼoolkaalígíí baa dahwiilneʼ. Éí Jew dineʼé dabidínóołtłʼahii átʼé, áádóó Gríik dineʼé danilíinii haneʼ bee bił dahwiilneʼígíí éí haneʼ tʼáá ádzaaí átʼé danízin,
24 nidi Jew dineʼé índa Gríik dineʼé danilíinii bitahgóó Diyin God bíká ádííniidii Christ éí Diyin God bibee adziilii áádóó bibee hódzáanii átʼé danízin.
25 Háálá Diyin God doo hóyą́ą da ílı̨́į nidi, nihokááʼ dineʼé yiláahdi hóyą́, áádóó Diyin God doo bidziil da ílı̨́į nidi, nihokááʼ dineʼé yiláahdi ábóodziil.
26 Shikʼisóó, Diyin God nihíká ádííniidígíí baa nitsídaahkees. Jó, doo ląʼí nihokááʼ dineʼé kʼehgo dahonohsą́ą da, doo ląʼí ayóó átʼéii danohłı̨́į da, doo ląʼí diné ílíinii danohłı̨́į da, ákondi Diyin God nihíká ádííniid.
27 Nidi nihokáaʼgi tʼóó bá nidahatʼiʼii Diyin God nábiilááh, nihokááʼ dineʼé dahóyáanii tʼóó ádaa yádadínóodzįįł biniyé, áádóó doo dabidziilígíí ałdóʼ náyiilááh, éí ayóó ádaatʼéii tʼóó ádaa yádadínóodzįįł biniyé.
28 Nihokááʼ dineʼé dabijoołáii índa doo dandzinii índa doo bił daʼóltaʼii Diyin God náyiilááh, áko éí bee haʼátʼíhída tʼáá ákónéehee ádaatʼéii átʼéego baa nitsáhákeesii tʼáadoo nánídlínígóó bee bééhodoozįįł.
29 Áko Diyin God binááł nihokááʼ dineʼé doo łaʼ ádaa hojóʼniih átʼée da doo.
30 Nidi Diyin God éí Christ Jesus bił łáʼí nohłı̨́įgo ánihiilaa, tʼáá éí bee ałdóʼ dahoniidzą́ągo, tsʼídá tʼáá ákogi ádaniitʼéego, dadiniigingo, índa bąąhági átʼéii bitsʼą́ąjįʼ náábiʼdiizniiʼii daniidlı̨́įgo Diyin God ánihiilaa.
31 Áko Diyin God bizaad bee akʼeʼashchíinii ánínígi átʼéego, Tʼáá háiida tʼáadoo leʼé baa hashniih jinízinii, éí hániʼdii Bóhólníihii áátʼįįdii baa hojiniih doo.
Footnotes
^ Kórinth kin haalʼá éí kéyah Gríis shádiʼááhjígo bił hazʼą́ą́ nítʼééʼ. Paul éí Kórinthgi tsʼídá áłtsé nahasneʼígíí yíníłtaʼ. Acts 18:1-18.
