1 John 3:1-24
3 Dooládóʼ ayóó átʼéego aTaaʼ ayóóʼánihóʼníi da lá! Jó, Diyin God baʼáłchíní danihidiʼní, áko tʼáá aaníí éí daniidlı̨́. Nihokááʼ dineʼé tʼáadoo hwéédahoosįįdgóó biniinaa nihí ałdóʼ doo nihéédahósin da.
2 Ayóóʼánihóshʼníinii, kʼad Diyin God baʼáłchíní daniidlı̨́. Ádaniitʼée dooleełii tʼah doo bééhózin da nidi, Christ nádzáago tʼáá bí átʼéhígi ádaniitʼé dadiidleełgo nihił béédahózin, háálá ázhnoolninígíí nihił béédahodoozįįł.
3 Áko Christ tʼáá hó ájítʼéhígi átʼéego diné tʼááłáʼí nítínígo ákótʼéego hwee bił chodahooʼíinii bąąhági átʼéii bijéí bąąh ádaadingo ádaʼdólzin.
4 Tʼááłáʼí jinítínígo bąąhági ádajitʼíinii éí bee hazʼáanii dayiitíihii dajílı̨́; bąąhági átʼéii éí bee hazʼáanii hitíihii óolyé.
5 Jesus Christ éí nihibąąhági ádaatʼéii nihitsʼázhdidooʼááł biniyé jiníyá áádóó bąąhági átʼéii doo hwiiʼ hólǫ́ǫ daígíí nihił béédahózin.
6 Tʼáá háiida Christ biiʼ hojílónígíí bąąhági átʼéii doo tʼáá náás joołtʼih da doo; tʼáá háiida bąąhági átʼéii tʼáá náás joołtʼihígíí Christ tʼah doo jiiłtséeh da, doo nidi bééhojísin da.
7 Shaʼáłchíní, tʼááká łaʼda nihiʼdóleeh lágo! Tsʼídá tʼáá ákogi ájooníiłii éí Christ tsʼídá tʼáá ákogi átʼéii nilínígi átʼéego tsʼídá tʼáá ákogi átʼéii jílı̨́.
8 Bąąhági ájítʼínígíí éí níłchʼi bidaʼiiníziinii binanitʼaʼí bitsʼą́ą́dę́ę́ʼ hojílǫ́, háálá níłchʼi bidaʼiiníziinii binanitʼaʼí éí tʼáá hodeeyáádę́ę́ʼ bąąhági áánííł. Diyin God biYeʼ éí níłchʼi bidaʼiiníziinii binanitʼaʼí binaanish íidoołdįįł yiniyé níyá.
9 Tʼáá háiida Diyin God bitsʼą́ą́dóó biʼdizhchínígíí bąąhági átʼéii doo tʼáá náás yoołtʼih da doo, háálá Diyin God yee átʼéii biiʼ hólǫ́, áko bąąhági átʼéii doo tʼáá náás joołtʼih leʼ átʼée da, Diyin God bitsʼą́ą́dóó biʼdizhchı̨́, éí bąą.
10 Díí bee Diyin God baʼáłchíní índa níłchʼi bidaʼiiníziinii binanitʼaʼí baʼáłchíní ałʼąą átʼéego bee bééhózin: tʼáá háiida doo tsʼídá tʼáá ákogi ájooníłígíí éí doo Diyin God bitsʼą́ą́dóó hojílǫ́ǫ da, áádóó Christ bee hakʼis nilíinii doo ayóóʼájóʼníinii éí doo Diyin God bitsʼą́ą́dóó hojílǫ́ǫ da.
Ayóóʼádaʼahíínóhʼní
11 Háálá, Ayóóʼádaʼahíínóhʼní, haʼníigo tsʼídá átséedi haneʼ dasidootsʼą́ą́ʼ.
12 Kéin áátʼįįd yę́ęgi doo ádeiitʼı̨́į da doo. Jó, Kéin éí níłchʼi bidaʼiiníziinii binanitʼaʼí bííʼ jílı̨́įgo biniinaa hatsilí jiisxı̨́. Ákoshąʼ haʼátʼíí biniinaa hatsilí jiisxı̨́? Jó, tʼáá hó doo ákogi ájoonííłgóó biniinaa, áádóó hatsilí éí tʼáá ákogi ááníiłgo biniinaa jiisxı̨́.
13 Shikʼisóó, nihokááʼ dineʼé danihijoołáhígíí tʼáadoo bikʼee nihił adahayóí.
14 Aniné biiʼdóó iiná biiʼjįʼ ahiikaigo nihił béédahózin, háálá Christ bee nihikʼisóó danilíinii ayóóʼádeíníiʼní. Hakʼis doo ayóóʼájóʼníinii éí tʼahdii aniné biiʼ hojílǫ́.
15 Tʼáá háiida hakʼis bikʼeezhdiniihígíí éí diné neiłtseedii jílı̨́, áko nihił béédahózingo diné neiłtseedii éí iiná doo ninítʼiʼii bee ádin.
16 Christ beʼiinaʼ nihá ninéidiníʼánígíí bąą Diyin God bibee ayóóʼóʼóʼniʼ baa ákodaniidzı̨́ı̨́ʼ, áko nihí ałdóʼ Christ bee nihikʼisóó danilíinii bá niheʼiinaʼ ninádahidiitʼaah doo.
17 Tʼáá háiida bee iináanii tʼáá hwee hólǫ́ǫgo, éí Christ bee hakʼis nilíinii yídin nilíinii hoł bééhózin nidi, tʼáadoo leʼé doo bee baa jijoobaahgóó, ákoshąʼ haa yitʼéego Diyin God bibee ayóóʼóʼóʼniʼ hwiiʼ hólǫ́ǫ doo.
18 Shaʼáłchíní, Ayóóʼádaʼííníiʼní, dadiiʼníigo tʼáadoo tʼóó ádadiiʼníní doo, nidi tʼáá aaníinii bee ayóóʼádaʼahííníiʼníigo ałkʼi nideiildzil doo.
Daʼoodlání éí Diyin God bidááhdóó doo nitsedaakai da doo
19 Díí kótʼéego tʼáá aaníinii bííʼ daniidlı̨́įgo nihił béédahózin, índa Diyin God bidááhdóó tʼáadoo nitsideiikaií doo.
20 Háálá nihijéí, Bąąhági ánítʼé, nihiłníigo Diyin God éí nihijéí biláahdi ayóó átʼéii nilı̨́įgo nihił béédahodoozįįł, háálá tʼáá ałtsoní bił bééhózin.
21 Ayóóʼánihóshʼníinii, nihijéí ná nihootʼą́ doo nihiłníígóó, Diyin God binááł doo nitsideiidáa da doo.
22 Tʼáá haʼátʼíhída bídayíníikeedgo bitsʼą́ą́dóó nihee nidahwiileeh, háálá yee hasʼáanii bikʼeh dahoniilʼı̨́įgo bił hóshóonii baa nideiikai.
23 Áko díí yee hasʼáanii átʼé, tʼáá bí biYeʼ Jesus Christ bízhiʼ nihił danilı̨́įgo deinohdlą́ą doo, áádóó tʼáá yee nihá haadzíʼígi átʼéego, ayóóʼádaʼahííníiʼníi doo.
24 Diyin God yee hasʼáanii bikʼeh hojíłʼı̨́įgo Diyin God biiʼ hojílǫ́, áádóó Diyin God hwiiʼ hólǫ́. Diyin God éí Níłchʼi Diyinii nihaazhníłʼaʼígíí bee Diyin God nihiyiʼ hojílǫ́ǫgo nihił béédahózin.
