1 Peter 2:1-25
2 Áko áká naatʼá átsʼá dahidohtʼaah; tʼáadoo danihiyoochʼídí, tʼáadoo tʼóó ádahodołʼíní, tʼáadoo daʼahoołchʼı̨́dí índa tʼáadoo nichǫ́ʼógo ahaa yádaałtiʼí.
2 Awééʼchíʼí abeʼ yídin danilínígi átʼéego nihí ałdóʼ Diyin God bizaad abeʼ chin bąąh ádinii átʼéego bídin danohłı̨́į leʼ. Éí bee danóohséeh doo.
3 Háálá Bóhólníihii bibee ajoobaʼ tʼáá íídą́ą́ʼ dasoolįhgo ákótʼé.
4 Bóhólníihii, éí tsé hináanii nilíinii, diné doo dabiniizı̨́įʼii nidi Diyin God bił nilı̨́įgo nibiníłtíinii baa hohkááh.
5 Nihí ałdóʼ tsé hináaniigi ádanohtʼéego Níłchʼi Diyinii kʼehgo kin nihee ádaolneʼ. Diyingo náádaʼiiłniihii danohłı̨́įgo, Níłchʼi Diyinii kʼehgo náádahidoołnihii, éí Diyin God bił yáʼátʼéehii Jesus Christ bee Diyin God bichʼįʼ náádahołniih.
6 Háálá Diyin God bizaad bee akʼeʼashchíinii kóní:
Jóʼakon, Záíyangi tsé bee naanáʼástłʼinii ílı̨́įgo atsʼáníʼáanii ninishʼaah,áko hoodlą́ągo haʼólíhígíí doo haa yánízingóó ábidiʼdoolnííł.
7 Éí bąą nihí daʼiinohdláanii nihichʼįʼgo ajílı̨́, nidi doo daʼoodlání bichʼįʼgo tʼéí:
Kin ádeiłʼíní tsé doo deiniizı̨́įʼ da yę́ę,tʼáá éí tsé bee naanáʼástłʼinii dzizlı̨́ı̨́ʼ.
8 Tsé bikʼee dahizhdidoogohii,áádóó tsé bikʼee ádił ayoolzihii átʼé.
Saad doo bikʼeh dahojíłʼı̨́ı̨́góó biniinaa dahizhdigeeh. Jó, tʼáá há bee nidahodiistʼą́.
9 Nidi chahałheeł bitsʼą́ąjįʼ ayóó ánóolningo Diyin God bibee adinídíinjįʼ nihíká ádííniidígíí ayóó átʼéego yee ááníiłii baa dahohniih doo biniyé tʼááłáʼí dineʼé nohłı̨́įgo nánihiʼdiilyá, áádóó aláahgo naatʼáanii danohłı̨́įgo náádaʼiiłniihii danohłı̨́, áádóó dineʼé diyinii índa Diyin God bííʼ danohłı̨́.
10 Nahdę́ę́ʼ łah tʼáadoo bííʼ danohłíní da nítʼééʼ, nidi kʼad Diyin God bííʼ dasoolı̨́ı̨́ʼ; łah Diyin God bibee ajoobaʼ doo nihee dahólǫ́ǫ da nítʼééʼ, nidi kʼad bibee ajoobaʼ nihee dahazlı̨́ı̨́ʼ.
Diyin God yá naalteʼ danohłı̨́įgo dahinohná
11 Ayóóʼánihóshʼníinii, nahasdzáán bikááʼgóó tʼóó tádadohnéehgo naałdeehii índa déʼéyóní danilínígi ádanohtʼéego nánihooshkąąh! Nihitsʼíís bibee adáhonooniʼ bitsʼą́ąjįʼ ádadííʼnółzin, háálá éí iiʼ sizíinii yikʼijįʼ anaaʼ áhósin.
12 Doo Jew dineʼé danilíinii bitahgóó nihaʼátʼeʼ ádaadingo dahinohnáa leʼ. Áko bąąhági ádaaníiłii kʼehgo nihaa yádaałtiʼ nidi yáʼátʼéehgo ádaahníłígíí yaa ákodahiniizįįhgo Diyin God bikʼi hooleʼgo yaa dahaniih doo.
13 Bóhólníihii bá ádaahtʼı̨́įgo diné biʼóhólnííh tʼáá ałtso bídahwíínółnííh: alą́ąjįʼ naatʼáanii nilíinii, éí tsʼídá aláahdi nantʼáii biʼóhólníihii bídahwíínółnííh,
14 áádóó naatʼáaniishchíín danilíinii, éí doo ákǫ́ǫ́ ádaatʼíinii atídeidoolííł áádóó yáʼátʼééh ádajooníiłii haa dahaʼniih doo biniyé nihichʼįʼ nabidiʼnilgo bídahwíínółnííh.
15 Jó, Diyin God nihá íinízingo diné doo ádahalyą́ą́góó tʼóó dzólníígóó yádaałtiʼii éí nihí tʼáá ákogi ádaʼoohłíłígíí dayooʼı̨́įgo ádaa yádadínóodzįįłgo dadidoołhił.
16 Diné doo bohodiitʼiʼii danohłı̨́įgo dahinohná, nidi doo nihidahodiitʼiʼígíí tʼóó bikʼijįʼ nisoołʼą́ągo tʼáadoo bąąhági ádaahtʼíní. Diyin God yá naalteʼ danohłı̨́įgo dahinohná.
17 Diné tʼáá ałtso nihił danilı̨́į leʼ. Christ bee ałkʼisóó danidlíinii ayóóʼádeínóhʼní. Diyin God dadíínóhsin. Aláahgo naatʼáanii nihił danilı̨́į leʼ.
Christ tiʼhoozniiʼígíí biʼdoolnííł
18 Naalʼaʼí danohłíinii, nihinanitʼaʼí íiyisí nihił danilı̨́įgo bídahwíínółnííh, dajoobaʼii áádóó bá ádahwiinítʼı̨́ʼíii doo éí tʼéiyá da, nidi doo daatsʼíidii ałdóʼ nihił danilı̨́įgo bídahwíínółnííh.
19 Azhą́ doo ákwii átʼéégóó atíhoʼdilʼı̨́į nidi Diyin God hoł hólónígíí bee ádaa ákoznidzingo, éí tiʼhojooníhígíí bichʼįʼ haʼjólníigo Diyin God haa bił hózhǫ́.
20 Doo ákǫ́ǫ́ ájítʼínígíí biniinaa náhodiʼnilghałgo haʼjólníi nidi, tʼáadoo bee haa hóʼniihí da, nidi tsʼídá yáʼátʼééh góneʼ ájítʼínígíí biniinaa tiʼhodiʼyoolníihgo haʼjólnínígíí éí Diyin God haa bił hózhǫ́.
21 Tiʼhooʼnííh bichʼįʼ hadaʼíínółní biniyé Diyin God nihíká ádííniid, háálá Christ nihá tiʼhoozniiʼgo nihá áátʼįįdígíí bikʼehgo bikééʼ dayínóhkáah dooleeł nihóʼní.
22 Christ tʼáadoo asiihígi da, índa tsʼídá tʼáadoo yoochʼííd yee haadzíiʼ da.
23 Biʼdéédzííʼ yę́ędą́ą́ʼ tʼáadoo nátʼą́ą́ʼ náʼéédzíiʼ da, tiʼhoozniiʼ yę́ędą́ą́ʼ tʼáadoo ił hóółyéeʼ da, nidi Diyin God tsʼídá tʼáá ákogi átʼéego ánihwiiʼaahii yaa ádeetʼą́.
24 Bąąhági átʼéii bichʼįʼ daneeʼnáago tsʼídá tʼáá ákogi ádaniitʼéego dahiniiʼnáa doo biniyé Christ tʼáá bí bitsʼíís yee nihibąąhági átʼéii ákʼiidiitʼą́ągo tsin ałnáoszid bąąhjįʼ yił tiʼhoozniiʼ. Éí bikʼi nidziskʼą́ągo ábiʼdiilyaaígíí bee hadaałtʼé nídasoohdlı̨́ı̨́ʼ.
25 Háálá dibé yóóʼahekáhígi átʼéego yóóʼahohkááh nítʼééʼ, nidi kʼad Naʼniłkaadii éí nihiiʼ naazíinii yaa áhályáanii baa nináhisoohkai.
