1 Timothy 6:1-21
6 Diyin God bízhiʼ áádóó binaʼnitin doo baaʼihgo bá haʼdoodzih da biniyé, daʼoodlání naalteʼ danilíinii tʼáá ałtso binanitʼaʼí tʼáá ałtsojįʼ ił ídlı̨́ yą́ą́h danilı̨́įgo ádayósin doo.
2 Hananitʼaʼí daʼoodlání danilı̨́įgo éí oodlą́ bee bił ałkʼisóó dajílı̨́įgo bąą tʼáadoo doo ił ílı̨́ bee baa nitsídadzikeesí doo, nidi tʼah aláhídi yáʼátʼéehgo bá nidajilʼaʼ doo, háálá bá nidajilʼaʼgo bíká anídajilwoʼii éí daʼoodlání danilı̨́, índa ayóóʼádaóʼní.
Doo tʼáá aaníígóó nidaʼnitinii áádóó aʼídeeł tʼáá aaníinii
Díí bee naʼnítin índa bichʼįʼ íłʼá.
3 Diné łaʼda łahgo átʼéego nazhʼnitinii áádóó nihiBóhólníihii Jesus Christ bizaad tʼáá ákogi átʼéii índa Diyin God kʼehgo iiná bínaʼniltin doo hoł aaníinii,
4 éí áshohódliʼ hade átʼé, áko tʼáadoo hoł bééhóziní da, nidi naʼahíyátiʼ índa saad baa ałghaʼditʼááh tʼéiyá bíchą́yízhdéelniʼ, éí bitsʼą́ą́dóó oochʼı̨́ı̨́d, ahiníʼdiiltłáád, tʼáá ádzaagóó aa haneʼ, índa nichxǫ́ʼógo ayahoolniih nidahwiileeh.
5 Áko diné bíniʼ dááchxǫʼgo, áádóó tʼáá aaníinii baa náádahaasdláaʼii bitahgi saad étʼááh náádleeł. Éí Diyin God kʼehgo iiná bee aʼídeeł átʼé danízin. [Ákódaatʼéhígíí bitsʼąą ádaa áhólyą́.]
6 Tʼáá aaníí Diyin God kʼehgo iiná bee ił yáʼáhootʼéehgo iinánígíí bee aʼnídéél átʼé.
7 Háálá nahasdzáán bikáaʼgi tʼáadoo leʼé tʼáágééd dahosiidlı̨́ı̨́ʼ, áádóó nahasdzáán bikááʼdóó dah nídiidzáago tʼáadoo dah didiilyéłí da.
8 Áko chʼiyáán índa ééʼ nihee dahólǫ́ǫgo haaʼíshąʼ éidíígíí bee nihił yáʼádahootʼéeh doo.
9 Nidi diné adeeshtʼįįł danízinii naʼóhonitaah łoh nahalingo yiih hindééh, doo hódzą́ą́góó nitsáhákees áádóó bił bidáádahaníinii atídaʼaleʼii yiih hindééh, áko éí diné bił bidáádahaníinii bidoołchǫǫł áádóó ábidoołdįįł.
10 Háálá béeso bíchą́hwíídéeniʼ éí doo yáʼádaatʼéehii tʼáá ałtso yehétłʼóól nilı̨́; łaʼ éí yidádanoolníigo naʼnitin woodláanii yitsʼą́ąjįʼ aheeskai, áko yínííł tʼóó ahayóí bijéí yee ahidayiishíísh.
Timothy bee nabidiʼneestą́ąʼii
11 Nidi ni, Diyin God bííʼ nílíinii, díí bitsʼąą ádaa áhólyą́, áádóó tsʼídá tʼáá ákogi ánítʼéego, diyin kʼehgo hinínáago, Diyin God yinídlą́ągo baʼíínílí, ayóóʼíʼííníʼníigo, yéego haʼíínílníigo índa diné aʼohgo íʼdólzinii nílı̨́įgo wołí bee ánítʼı̨́.
12 Yinídlą́ągo baa dzíínílíii yéego bee nanibaahgo bichʼą́ą́h sínízı̨́. Diné ląʼí dabinááł yáʼátʼéehgo ádee hadíínídzííʼ yę́ędą́ą́ʼ iiná doo ninítʼiʼii biiʼjįʼ níká áhodooʼniid yę́ę yéego yiiłtsóód.
13 Diyin God tʼáá ałtsoní hináago áyósinii, índa Pántiyas Páílat bidááhdóó Christ Jesus yáʼátʼéehgo ádaa hadoodzíiʼii binááł ánidishní,
14 NihiBóhólníihii Jesus Christ bidiʼdooltséełjįʼ díí bikʼeh óʼooʼníiłii yáʼátʼéehgo bikʼeh dahonołʼı̨́įgo, tʼáadoo tʼóó baa yáhásingo íínísiní.
15 Éí baa hoolzhiizhgo Jesus yitʼíní áhodiʼdoolnííł, éí haa haʼniih índa tʼáá hó tʼéiyá tʼáá ałtsoní biNanitʼaʼí jílı̨́, áádóó aláahgo naatʼáanii danilíinii biNanitʼaʼí jílı̨́, índa bídahólníihii bee Bóhólníihii jílı̨́.
16 Tʼáá hó tʼéiyá doo daatsaahii jílı̨́, adinídíín doo bitʼááh jóyaʼ átʼéii biiʼ kééhojitʼı̨́, éí diné tʼah doo łaʼ hoołtséeh da, índa doo jooltsééł átʼée da. Éí haa haʼniih doo, índa hoolʼáágóó hóhólníih doo! Tʼáá ákótʼée doo.
17 Diné éí naalyeʼé yee daʼatʼíinii kóbidiníigo bichʼįʼ hahídziih, Daohtʼíinii tʼáadoo bee ádaa dadzíínóhdlíhí, naalyeʼé áádįįłii tʼáadoo baa dadzíínóhłíhí, nidi Diyin God [hináanii] bił hadleeʼgo tʼáá ałtsoní bee ákideiidláago yee nihaa áhályáanii baa dadzíínóhłí.
18 Dajiinohbaʼ, yáʼátʼéehgo óʼooʼnííł ląʼígo baa nidaahkai, áádóó nihił dahadleeʼgo tʼáá kʼadę́ę áká oojééʼ ádaʼdííʼnółzin, dabidiní.
19 Kótʼéego náás hoolzhishgóó nizhónígo atłʼááh nástłʼinii ádá ádazhdoolnííł, áko éí bee tʼáá aaníí iináanii deizdoołtsoł.
20 Timothy nílíinii, bee naʼahoosdlíʼígíí baa áhólyą́. Diyin God doo dílzingóó niyáʼáhoditiʼ índa ił ééhózin doo tʼáá aaníí ádaatʼéii bee atsʼą́ąjįʼ ashjééʼ haʼnínígíí tʼáadoo baa nánítʼíní.
21 Háálá łaʼ éí dayótąʼgo biʼoodląʼ yóóʼadeideezʼą́ągo nidaʼiisíiʼgo átʼé.
Ajoobaʼ nihił hólǫ́ǫ doo.
