2 Corinthians 13:1-14
13 Díí kʼad táadi nihaa nishááh, áko bee akʼihodiitʼáanii éí ooʼíinii naakida, doodaiiʼ táaʼda tʼáá aaníígóó dahalneʼgo tʼéí ílı̨́į doo.
2 Átséédą́ą́ʼ bąąhági ádaatʼı̨́ nítʼéʼígíí índa náádaałaʼígíí tʼáá ałtso bił hazhóʼó nihiʼníłniiʼ niʼ, naakidi nihaa níyáá góneʼ nihitaashá yę́ędą́ą́ʼ nihiʼníłniiʼígi átʼéego, tʼáá ákótʼéego kʼad doo nihitaasháa da nidi ałdóʼ nihinááʼníshnííh, áko nihaa náánísdzáago doo nihaa hą́ą́h dínéesįįł da.
3 Jó, Christ tʼáá aaníí shiyiʼdę́ę́ʼ yáłtiʼgo nihił béédahodoozįįł. Háálá Christ doo adziil yee doo nihichʼįʼ ááníił da, nidi nihitahgóó bibee adziilii yitʼíní áyoolííł.
4 Azhą́ doo hadziilgóó tsin ałnáoszid bikáaʼjįʼ hoł oʼoolkaal nidi, Diyin God bibee adziilii bee jiiná. Háálá hoł doo nihidziil da, nidi Diyin God bibee adziilii binahjįʼ hoł łáʼí niidlı̨́įgo habee adziilii bee hoł hiniiʼnáa doo.
5 Tʼáá daatsʼí aaníí oodlą́ bee nisoozínígíí bee nidaʼádółkaah. Hazhóʼó nidaʼádínóhtaah. Daʼ Jesus Christ nihiyiʼdi hólónígíísh doo baa ákodanohsin da? Doodaiiʼ nidaʼádínóhtaahígíísh chʼééh ádaałʼı̨́?
6 Tʼah nítʼééʼ lá nihí naʼádíniitaahígíí doo chʼééh íilʼįįdgóó nihił béédahoozin łeh nisin.
7 Nidi doo bąąhági ádadoohníił daígíí biniyé Diyin God bichʼįʼ sodiszin; bee naʼíhonitaah bíniilʼąąd nahoniidlingo ádíshníigo éí dooda, nidi tʼáá ákǫ́ǫ́ ádadoohníłígíí biniyé ádíshní, azhááneeʼ nihí tʼóó chʼééh íilʼįįd nahoniidlin nidi.
8 Háálá tʼáá aaníinii doo bikʼijįʼ woodleʼ átʼée da, nidi tʼáá aaníinii tʼéiyá bá íiʼnííł.
9 Háálá nihí doo nihidziil da nidi, aají nihí éí danihidziilígíí baa nihił hózhǫ́. Tsʼídá yáʼátʼéehgo dahinohnáa dooleeł danihííníiʼní.
10 Nihaa níyáago éí doo tʼáá hashkée choideeshʼįįł da biniyé tʼahdii nihitsʼą́ądi naasháago kótʼéego nihichʼįʼ akʼeʼashchí. Háálá Bóhólníihii éí óhólnííh bee dadínóoséełgo danihidziil ádanihideeshłííł biniyé sheidiníʼą́, danihideeshchǫǫł biniyé éí dooda.
11 Shikʼisóó, bee ninishtʼéehii éí díí, Diyin God nihił hólǫ́ǫ doo. Hadanołtʼéego, ałkʼi dahołtaʼgo, tʼáá aheełtʼéego nitsídaahkees, ałchʼįʼ kʼé danohdzingo hazhóʼó kéédahohtʼı̨́, áko Diyin God ayóóʼóʼóʼníinii índa tʼáá éí achʼįʼ hózhǫ́ eidiiʼaahii nihił hólǫ́ǫ doo.
12 Ahíláłkʼe dadołniihgo kʼé bééʼáhohjih,
13 Diyin God bidiyı̨́ı̨́ʼ tʼáá ałtso kʼé danihiłní.
14 Bóhólníihii Jesus Christ bibee ajoobaʼ, áádóó Diyin God bibee ayóóʼóʼóʼniʼ, índa Níłchʼi Diyinii bee ahił ídlíinii tʼáá ánółtso bee nihikʼihojidlíi doo. Tʼáá ákótʼée doo.
