Acts 13:1-52
13 Áko Ántiyak hoolyéegi daʼoodlání áłah nádleehii bitahgi Diyin God yá dahalneʼii índa nidaʼnitiní hólǫ́ǫ́ lá, éí díí ádaatʼı̨́, Bárnabas áádóó Símiyan, éí Náíjer yolyéhígíí, índa Sairíiniidę́ę́ʼ Lúshiyas, áádóó Mánayen, Hérad naatʼáaniishchíín bił bidiʼneeszánígíí índa Saul.
2 Éí łah dahozdísingo tʼáadoo daʼjiyání Bóhólníihii bichʼįʼ sodazdilzingo Níłchʼi Diyinii áhodííniid, Bárnabas índa Saul naanish biniyé ninínilígíí shá bitsʼánóhnííł.
3 Áko dahozdísingo tʼáadoo daʼjiyání sodazdoolzindóó bikʼijįʼ bá sodazdilzingo bikʼi dah dazdéesniiʼgo dah dahozhdiiłʼaʼ.
Sáíprasdi yilʼaadii naaʼaash
4 Áko Níłchʼi Diyinii dah hodiiłʼaʼgo Siilúshiya góyaa jiníʼáázh, áko áádóó Sáípras hoolyéégóó hoł dah adiiʼéél.
5 Áko Sálamis kin haalʼáhídi jiníʼáazhgo, Jew dineʼé bikin biiʼ áłah nídaʼadleehgóó Diyin God bizaad baa hojoolneʼ. John* ałdóʼ háká análwoʼí nilı̨́įgo hoł naakai nítʼééʼ.
6 Áko éí kéyah táyiʼ siʼánígi tʼáá ákódígi tázhdookaigo Péífas hoolyéejįʼ jíkai, ákwii diné léiʼ Jew nilı̨́įgo Bar-Jesus yolyé, éí álílee íʼoołʼįįłgo naʼadloʼ yee nahałáago tʼóó áhodilʼı̨́įgo halneʼii bikʼíjíkai.
7 Sérjiyas Pálas, diné hóyą́ągo nitsíkeesii kéyah yinanitʼaʼí nilı̨́, éí yił ałkʼis nilı̨́ı̨́ lá; éí Diyin God bizaad dideestsʼı̨́ı̨́ł nízingo Bárnabas índa Saul hágo yidííniid.
8 Nidi Élimas álíleego íʼoołʼįįłgo naʼadloʼ yee nahałáii (tʼáá éí kʼehgo biʼdójí) kéyah yinanitʼaʼí iidoodląąłígíí yąąh yiʼı̨́įgo yichʼą́ą́h yáłtiʼ.
9 Nidi Saul, tʼáá éí Paul yolyéii, Níłchʼi Diyinii biiʼ hadeezbingo, tʼáá íiyisí honíłʼı̨́įgo
10 áháłní, Níłchʼi bidaʼiiníziinii binanitʼaʼí biyázhí nílíinii, naʼadloʼ índa ináhoodǫ́ǫ́s tʼáá ałtso yinichįįhii, tsʼídá tʼáá ákogi ádaatʼéii tʼáá ałtso bitsʼą́ą́jí nílíinii, daʼ Bóhólníihii bee kʼéhézdongo honítʼiʼjí nahoneeshtłʼiizh ádanileʼígíísh doo nidííłtʼih da?
11 Jóʼakon, Bóhólníihii atínidoolííł, áko doo ííníʼı̨́ı̨́góó jı̨́honaaʼéí tʼáadoo yíníʼíní haada nízahjįʼ nihodoolzhish. Áádóó tʼáá áko áhí áádóó chahałheeł hakʼiildoh, áko łaʼ nahalóóz dooleełii hazhnitáago nijighá.
12 Ákohgo kéyah binanitʼaʼí éí áhoodzaaígíí yiyiiłtsą́ągo oosdląąd, háálá Bóhólníihii bee naʼnitin bikʼee tʼóó bił ahóóyóí.
Pisídiya kéyahdi Ántiyak kin haalʼáagi Bárnabas áádóó Paul naaʼaash
13 Áko Paul áádóó yił yikahígíí Péífasdóó bił dah nááʼdiiʼéelgo Pérgagi Pamfíliya kéyahdi yíkai. Áádóó John hatsʼą́ą́ʼ dah diiyáago Jerúsalemgóó anáádzá,
14 nidi Pérgadóó jooʼashgo Pisídiya kéyah biyiʼ Ántiyak kin haalʼáagi jiníʼáázh. Áko hááʼáyı̨́ı̨́h jı̨́ azlı̨́įʼgo kin biiʼ áłah náʼádleeh góneʼ yah ajííʼáazhgo dzineezké.
15 Bee hazʼáanii índa Diyin God yá dahalneʼii yę́ę dabizaad dayííłtaʼdóó bikʼijįʼ, áłah nádleehii bindanitʼaʼí kódaaníigo hachʼįʼ adaʼasʼaʼ, Nihikʼisóó, saad bee chánah adoodleełii łaʼ bee diné bichʼįʼ hadeesdzih nohsingo, bee haohdziih.
16 Áko Paul yiizįʼgo dah didiilniiʼgo ání:
Ízrel dineʼé nohłíinii, áádóó Diyin God dadíínóhsinii, daʼíísółtsʼą́ą́ʼ.
17 Díí Ízrel dineʼé biDiyin God, danihizází yę́ę yitayiizlááʼ, áko déʼéyóní dajílı̨́įgo Ííjipgi kéédahojitʼı̨́ı̨́ nítʼééʼ yę́ędą́ą́ʼ ayóó ádajítʼéego áhoolaa, índa bibee adziilii doo bóhoneeʼáanii áádę́ę́ʼ yee chʼíhoníʼeezh.
18 Áádóó tsʼídá hanii shı̨́ı̨́ dízdiin nááhaijįʼ haʼólníigo honoojíidi haa áhályą́ą́ nítʼééʼ.
19 Áádóó Kéínan kéyahgi tsostsʼidgo ałʼąą dineʼé íísdįįdgo, kéyah daahó doogo hataideezʼą́.
20 Áádóó bikʼijįʼ Sámuel éí Diyin God yá halneʼii nilı̨́įgo bíyoołkáałjįʼ dı̨́įdi neeznádiindóó baʼaan ashdladiin nááhaijįʼ ándahodiiʼaahii niheʼníiłgo nihoolzhiizh.
21 Áádóó índída aláahgo naatʼáanii dajííkeed, áko Diyin God éí Benjamin bidineʼé bitahdóó Saul éí Kish biyeʼ nilı̨́įgo dízdiin nááhaijįʼ há niiníłtı̨́.
22 Áádóó índa éí nahjįʼ hayííłtʼeʼgo, David aláahgo hananitʼaʼí dooleeł biniyé há niiníłtı̨́; éí yaa hoolneʼgo ání, Jésii biyeʼ David diné tsʼídá shíniʼ yiʼósinii nilı̨́įgo shóiséłtʼeʼ, éí íinisinii tʼáá ałtso yiʼdoolííł.
23 Éí diné bitsʼą́ą́dóó oochíiłii bitahdóó Diyin God tʼáá yee nihozhníʼánígíí bikʼehgo éí Jesus Yisdáʼiiníiłii Ízrel dineʼé baazhníłtı̨́.
24 Tʼah doo jíghááhgóó John tʼáá átséedi Ízrel dineʼé tʼáá ałtso łahgo átʼéego Diyin God bichʼįʼ tsínáhodiikeesgo tó bee hodiʼdoolzįhjí yee neineeztą́ą́ʼ.
25 Áádóó John binaanish niyíłtʼéehgo ání, Háí ájítʼı̨́įshąʼ dashíínóhʼní? Shí doo Christ áshtʼı̨́į da. Nidi łaʼ shikéédę́ę́ʼ náánáádáał doo, éí bikétłʼóól bá kʼideeshʼałígíí doo bą́ą́h nishłı̨́į da.
26 Kwáʼásiní, Éíbraham baʼáłchíní danohłíinii, áádóó nihitahdóó Diyin God deidísinígíí, díí haneʼ bee yisdáʼiildéehii nihí nihaa deetʼą́.
27 Háálá Jerúsalemgi kéédahatʼíinii áádóó bindanitʼaʼí danilíinii, Jesus doo yéédahósingóó, tʼáá hááʼáyı̨́ı̨́h jı̨́ náʼoodleeł bikʼeh Diyin God yá dahalneʼii yę́ę dabizaad náwóltahígíí doo yikʼidaʼdiitįįh da nítʼééʼ, áko dazdootsaałgo há nihootʼą́ haʼníigo bee haʼoodzíiʼii yidaʼiilaa.
28 Azhą́ biniinaa hodiʼyoolyéełii chʼééh yíká ádáátʼįįd nidi, tsʼídá hodiʼyoolyéełgo Páílat yaa nídayooskan.
29 Áko hwee akʼeʼashchínígíí tʼáá ałtso yidaʼiilaago tsin bąąhdę́ę́ʼ nidahoʼdiiłtı̨́įgo tséníʼootséél góneʼ yóóʼádahoolaa.
30 Nidi dadziztsą́ą́dę́ę́ʼ Diyin God nááhodiisá,
31 índa Gáliliidóó Jerúsalem góde bił jíkai yę́ę bichʼįʼ yitʼíní ánízhʼdiilʼįįhgo ląʼí yiską́, éí dabíínáałii danilı̨́įgo kʼad diné yił nidahalneʼ.
32 Áko danihizhéʼé yę́ę haneʼ yáʼátʼéehii bá hodooleełgo baa deetʼánígíí bee nihił hodiilnihgo nihaa niitʼáázh.
33 Éí Jesus daaztsą́ą́dę́ę́ʼ néidiisáhígíí bee danihizhéʼé baa deetʼánígíí baʼáłchíní daniidlínígíí kʼad nihá yiʼiilaa; tʼáá sin naaki góneʼígíí bee bikʼeʼashchínígi átʼéego:
ShiYeʼ nílı̨́, díí jı̨́ nishchíinii sélı̨́ı̨́ʼ,
34 Áádóó tsʼídá doo adiłdzidjįʼ jidooleeł dago, dadziztsą́ą́dę́ę́ʼ nááhodiisáhígíí yaa halneʼgo kóníigo haadzííʼ:
Dadiyingo índa tʼáá aaníígóó bee akʼihojidlíiiDavid bee bichʼįʼ haasdzíiʼii naa dideeshʼááł.
35 Náánáłahgo ałdóʼ sin biyiʼ ánáádíʼní,NiDiyin Nilíinii didoołdziłjįʼ doo ninádidííʼáał da.
36 Háálá David éí Diyin God íinízinígíí bikʼehgo hodineʼé ahoolchíiłii bá nidzisʼaʼdóó bikʼijįʼ iʼjííłhaazh,* áko dahazhéʼé yóóʼádaalyaa yę́ę bíighahjįʼ yóóʼáhoʼdiilyaa, áko jidííłdzid,
37 nidi Diyin God néidiisáhígíí éí tʼáadoo dííłdzid da.
38 Éí bąą kwáʼásiní, éí Jesus binahjįʼ bąąhági átʼéii á yóóʼahiditʼaahígíí bee nihił haneʼgo nihił béédahózin leʼ,
39 áádóó Mózes yee hasʼáanii binahjįʼ tʼáá ałtsojįʼ tʼáá ákogi ádanohtʼéego Diyin God doo nihá haadziih átʼéé nítʼééʼ yę́ę éí Jesus binahjįʼ tʼááłáʼí jinítínígo daʼjoodláanii tʼáá ákogi ádajítʼéego Diyin God há haadzíʼígíí ałdóʼ nihił béédahózin leʼ.
40 Éí bąą Diyin God yá dahalneʼii kódadííniidii doo nihikʼi dahwiidooleełígíí biniyé ádaa ádahołyą́:
41 Jóʼakon, tʼóó á nidahołtʼiʼgo nidaahkaii, tʼóó nihił adahayói doo, índa ádadoohdįįł,háálá nihíyoołkááł góneʼ baa nideeshaałígíí łaʼda hazhóʼó yee nihił hoolneʼ nidi,tsʼídá doo deidoohdląął da.
42 Áádóó Jew dineʼé kin biiʼ áłah náʼádleehdóó chʼéheeskaigo doo Jew dineʼé danilíinii nídahooskango ádahodííniid,* Hááʼáyı̨́ı̨́h jı̨́ nááʼásdlı̨́įʼgo díí saad bee nihichʼįʼ hanáádoohdzih.
43 Áko kin biiʼ áłah náʼádleehdóó tááʼoosdeeʼgo Jew dineʼé índa Jew dineʼé binahaghaʼ yihidiikaii ląʼí Paul índa Bárnabas yikééʼ yíkai, áko Diyin God bibee ajoobaʼ yéego yaa dadzólíi dooleełígíí baa nídzooskango bee bichʼįʼ hadzoodzííʼ.
44 Hááʼáyı̨́ı̨́h jı̨́ nááʼásdlı̨́įʼgo kin haalʼáádóó diné kʼasdą́ą́ʼ tʼáá ałtso Diyin God bizaad deididootsʼı̨́ı̨́ł biniyé áłah silı̨́ı̨́ʼ.
45 Nidi Jew dineʼé éí tʼóó ahayóí áłah azlı̨́ʼígíí dayiiłtsą́ągo tʼáá íiyisí dayoołchʼı̨́įdgo, Paul bee hadzoodzíʼígíí doo ákótʼée da daaníigo bizadahóchįʼ.
46 Áko tʼáadoo náhoniyésí Paul índa Bárnabas haadzíiʼgo ání, Jó, Diyin God bizaad éí tʼáá ákónéehee nihí áłtsé bee nihił hodoonih, nidi éí doo danoozı̨́ı̨́ʼgóó biniinaa iiná doo ninítʼiʼii doo bą́ą́h danohłı̨́ı̨́góó ádąąh tsídasidookééz, éí bąą jóʼakon, doo Jew dineʼé danilíinii éí bichʼįʼ deetʼáázh.
47 Háálá Bóhólníihii yee nihá hasʼą́ągo ání:
Doo Jew dineʼé danilíinii bá adinídíín nílı̨́į doo biniyé nininíłtı̨́,áko nahasdzáán nidaneesʼą́ąjįʼ ałʼąą dineʼé bee yisdáʼiildéehii bił díínááł.
48 Doo Jew dineʼé danilíinii díidíígíí deidiiztsʼą́ąʼgo, bąą bił dahóózhǫǫdgo Diyin God bizaad yaa dahaznih, índa iiná doo ninítʼiʼii biniyé nídabiʼdiisdláʼígíí daʼoosdląąd.
49 Áko Bóhólníihii bizaad éí kéyah bikáaʼgi tʼáá ałtsogóó baa dahodeezneʼ.
50 Nidi kin haalʼáagi asdzání dahodísinii áádóó ił danilíinii índa diné alááh dahideezíinii éí Paul áádóó Bárnabas atídoolnííł biniyé Jew dineʼé hadahoneeshchaad, áko bikéyahdóó chʼídahoneeshchą́ą́ʼ.
51 Nidi bikʼijįʼ ninádahidoodleeł biniyé hakeeʼ łeezh bąąh nazhnííłdeeʼgo Aikóniyamdi jiníʼáázh.
52 Áko ídahoołʼaahii yíní bíighahgo bił dahóózhǫǫd índa Níłchʼi Diyinii biiʼ hadadéébįįd.
Footnotes
^ Díí John yolyéhígíí éí Mark ałdóʼ yolyé.
^ Iʼjííłhaazh, nínígíí éí, dadziztsą́, níigo ání.
^ Diyin God bizaad tʼáá ałkʼidą́ą́ʼ bee akʼedaʼashchínígíí łaʼ kótʼéego dabikááʼ, Áádóó chʼízhníʼáazhgo diné nídahooskango ádahodííniid.
