Acts 2:1-47
2 Áádóó Péntekast beiníłką́ągo tʼáá ádzíłtso [aheełtʼéego nitsídadzikeesgo] tʼááłáhígi nidzíiztą́.
2 Nítʼééʼ tʼáadoo hooyání ayóó átʼéego yiyołígíí nahalingo yáʼąąshdę́ę́ʼ hodiistsʼą́ą́ʼ, áko kin biyiʼ nidzíiztání góneʼ tʼáá átʼé hadéébįįd.
3 Áko tʼááłáʼí jinítínígo atsooʼ kǫʼ nidahalingo hakʼijįʼ adahwiizleʼgo dajiiłtsą́.
4 Tʼáá ádzíłtso Níłchʼi Diyinii hwiiʼ hadadéébįįd, áko Níłchʼi Diyinii yádahwiiłtiʼgo ałʼąą dineʼé dabizaad bee yádajiłtiʼgo baa nízhdiikai.
5 Íídą́ą́ʼ yádiłhił biyaagi ałʼąą dineʼé tʼáá ałtso bitahdę́ę́ʼ Jew dineʼé dahodísinii Jerúsalemgi kéédahatʼı̨́ı̨́ nítʼééʼ.
6 Áko kótʼéego hodiistsʼą́ąʼgo tʼóó ahojíyóí áłah dzizlı̨́įʼgo tʼááłáʼí jinítínígo tʼáá hó dahazaadígíí yee yádaałtiʼgo dazdiiztsʼą́ąʼgo bikʼee tʼóó hoł dahóóląąd.
7 Áko tʼáá ádzíłtso haa léitʼéego átʼéé lá dazniizı̨́įʼgo ádajiní, Daʼ díí yádaałtiʼígíísh doo tʼáá ałtso Gáliliidę́ę́ʼ dineʼé danilı̨́į da?
8 Ákoshąʼ haitʼéego tʼááłáʼí niitínígo tʼáá nihí danihizaad yee yádaałtiʼgo dasidiitsʼą́ą́ʼ?
9 Párthiyadę́ę́ʼ dineʼé, Míídiyadę́ę́ʼ dineʼé, Íílamdę́ę́ʼ dineʼé, áádóó Mesopotéímiyagi kéédahatʼínígíí, Judíyagi áádóó Kapadóshiyagi, Pántasgi áádóó Éízhagi,*
10 Fríjiyagi áádóó Pamfíliyagi, Ííjipgi áádóó Líbiyagi Sairíinii binaagóó, índa Romedę́ę́ʼ nidaanéego tʼóó átsééd dabighanígíí, Jew dineʼé índa Jew dineʼé binahaghaʼ yihidiikaígíí,
11 Kríitdę́ę́ʼ dineʼé áádóó Aréíbiyadę́ę́ʼ dineʼé daniidlı̨́į nidi, tʼáá nihí danihizaad bee, Diyin God ayóó ádaatʼéego yaa naagháhígíí yaa yádaałtiʼgo dadiitsʼaʼ.
12 Áko tʼáá ádzíłtso tʼóó hoł adahayóí, áádóó tʼóó hoł daahaadago, ádaʼahizhdiʼní, Díí lá haʼátʼíí átʼéé lá?
13 Nidi náádaałaʼ tʼóó há nidahałtʼiʼgo ádadííniid, Eiiyeeʼ wáin ániidíii áde dayoodlą́ą́ʼ lá.
Péntekast azlı̨́įʼgo Peter yáłtiʼ
14 Áko Peter, ídahoołʼaahii łaʼtsʼáadahígíí bił nidzizı̨́įgo, áłah nilínígíí yéego bichʼįʼ hadzoodzíiʼgo ájíní, Judíyadóó diné danohłíinii, áádóó Jerúsalemgi kéédahohtʼíinii tʼáá ánółtso, shizaad dayínółtsʼą́ąʼgo díí nihił béédahodoozįįł.
15 Daʼ jidlą́ danohsin nidi dííyeeʼ doo daʼadlą́ą da, jó índa de dah adiiʼą́,
16 nidi dííyeeʼ Jówel éí Diyin God yá halneʼii kóníigo yee haadzíiʼii átʼé:
17 Diyin God haadzíiʼgo ání, Nihodoogáałjįʼ ayííłką́ągo kódahooníił doo:nihokááʼ dineʼé tʼáá ałtso shiNíłchʼi bikʼi hwiidooleeł,áko nihiyeʼké áádóó nihitsiʼké Diyin God yá dahalneʼ dadooleeł,áádóó nihitsíłkeʼé bił ádahatʼı̨́į dooleeł,índa nihadahastóí nideiyeeł dooleeł;
18 éí yoołkáałdi diné shá nidaalʼaʼígíí índa asdzání shá nidaalʼaʼígíi niditʼáá biláahgo shiNíłchʼi baa dideeshʼáałgo, shá dahalneʼ dooleeł.
19 Áko wódahdi yádiłhił biyiʼdi bikʼee tʼóó ił ahayóigo ádahooníiłiiínda wóyahdi nahasdzáán bikáaʼgi shibee adziilii bee béédahózinii,dił, áádóó kǫʼ, índa łid áhí nahalingo ádadeeshłiił;
20 jı̨́honaaʼéí bił chahodoołhił,índa tłʼéhonaaʼéí dił nahalin dooleeł,Bóhólníihii nídoodááł tʼah doo beiyíłkaahgóó áhodoonííł.Jó, éí ayóó átʼé índa bikʼee tʼóó ił ahayóigo haʼdooʼááł.
21 Áko tʼáá háiida Bóhólníihii bízhiʼ bee józhíigo níjooskanígíí yisdáhodoołtééł.
22 Ízrel dineʼé danohłíinii, díí saadígíí dadoohtsʼı̨́ı̨́h: Názarethdóó Jesus éí álílee kʼehgo ádahooníiłii, áádóó bikʼee tʼóó ił adahayóigo ádahooníiłii, índa Diyin God bibee adziilii bee béédahózinii nihitahgóó baa nijiyáhígíí bee Diyin God nihichʼįʼ hwee lą́ asłı̨́įʼgo nihił béédahózin.
23 Diyin God tʼáá átséedi bił bééhózingo binahatʼaʼ yee nihoníʼáanii bikʼehgo díí Jesus nihaa deetʼą́. Áko diné doo yáʼádaashóonii bílákʼe dasidooʼą́, áádóó tsin ałnáoszid bikáaʼjįʼ bił adaʼaskaalgo dasoołhı̨́.
24 Nidi Diyin God náábidiisá, háálá daaztsánígíí yee tiʼhooʼnííh niiníłtʼiʼ, jó, éidí bee biʼdótąʼ dooleełígíí doo bohónéedzą́ą da.
25 Háálá ałkʼidą́ą́ʼ David haa halneʼgo ádííniid:
Bóhólníihii tʼáá áłahjįʼ shilą́ąjįʼ hojílǫ́ǫgo hweeshʼı̨́,
háálá shinishʼnáájí hojílǫ́, áko doo shił naʼiiʼnáa da doo.
26 Éí bąą shijéí bił hóózhǫǫd, índída shizaad hózhǫ́ǫgo haasdzííʼ,áádóó ałdóʼ shitsʼíís naʼólíigo hanályı̨́įh doo.
27 Háálá shiiʼ sizíinii doo tʼáá hoolʼáágóó tiʼhooʼníihdi hólǫ́ǫgo ádíílíił da,niDiyin Nilíinii didoołdziłjįʼ ałdóʼ doo ninádidííʼáał da.
28 Iiná bá honítʼiʼígíí shił bééhózingo áshiinilaa;shił honílǫ́ǫgo tʼáá íiyisí baa shił hózhǫ́ǫgo áshidíílííł.
29 Peter ánáázhdooʼniid, Shikʼisóó, tʼáadoo bichʼįʼ niʼ nishłíní nihizhéʼé David yę́ę binahjįʼ nihichʼįʼ hadeesdzih, éí daaztsą́ áádóó yóóʼábiʼdiilyaa, áádóó díí jı̨́įjįʼ tséníʼootséél góneʼ abiʼdooltínígi tʼahdii bikʼeh hazʼą́.
30 Éí Diyin God yá halneʼii jílı̨́, áádóó hatsʼą́ą́dóó náás oochíiłii łaʼ, éí [Christ, diné silı̨́įʼgo] hojooʼáałgo dah dzizdáá nítʼéʼígi dah dínóodaałgo, Diyin God hachʼįʼ yee ádee hadoodzíiʼgo hoł bééhózin.
31 Christ daaztsą́ą́dę́ę́ʼ náábidiʼdoodláłígíí tʼáá bítséedi hoł bééhózingo bee hadzoodzííʼ,
[Hwiiʼ sizíinii] doo tʼáá hoolʼáágóó tiʼhooʼníihdi hólǫ́ǫgo áyiilaa da, hatsʼíís ałdóʼ tʼáadoo dííłdzid da.
32 Díí Jesus jílíinii lą́ą Diyin God nááhodiisáago nihí tʼáá áníiltso dabíínáałgo bił béédahózinii daniidlı̨́.
33 Áko Diyin God binishʼnáájí dah honeesdáago ayóó ájítʼé áhoolaa, áádóó aTaaʼ éí Níłchʼi Diyinii yee nihoníʼáanii hwee hazlı̨́įʼgo nihaazhdiníʼą́, áko díí kʼad daahʼı̨́ áádóó dadoohtsʼaʼ.
34 Háálá yáʼąąshgóó ííyáii éí doo David átʼı̨́į da, nidi David tʼáá bí ání,
Bóhólníihii éí shiBóhólníihii áyidííniid,Shinishʼnáájí dah sínídá,
35 nidaʼanaʼí bikʼi díínílʼeezgo ániishłaajįʼ.*
36 Éí bąą tsin ałnáoszid bikáaʼjįʼ Jesus bił adaʼsoołkaal nítʼééʼ yę́ę Diyin God éí Bóhólníihii áádóó Christ nilı̨́įgo áyiilaa, díí Ízrel dineʼé tʼáá ałtso tʼáadoo naaki nilíní bił béédahózin leʼ.
37 Áko éí deidiiztsʼą́ąʼgo bijéí tʼáá íiyisí dajishishiigi ádaadzaago yínííł daazlı̨́ı̨́ʼ, áko Peter índa łaʼ daalʼaadii danilínígíí ádeidííniid, Nihikʼisóó, ákoshąʼ haa dadiiʼnííł?
38 Áko Peter áhodííniid, Tʼááłáʼí nootínígo łahgo átʼéego Diyin God bichʼįʼ tsíńdahidohkeesgo Jesus Christ bízhiʼ bee tó bee danihiʼdólzı̨́ı̨́h, áko Diyin God bichʼįʼ ádił daʼsoohsíʼígíí nihá yóóʼiididooʼááł, áádóó Níłchʼi Diyinii nihaa deetʼáanii nihííʼ dadooleeł.
39 Háálá éí nihí áádóó nihaʼáłchíní índa nízaadi nidaakaii bił nihííʼ dadooleełgo yee nihoníʼą́, Bóhólníihii nihiDiyin God hágo deididooniiłígíí tʼáá ałtso baa deetʼą́.
40 Áádóó ląʼígóó saad bee bichʼįʼ hadziisdzííʼ índa biyahoozhniiłįįhgo ájíní, Díí tsiʼnaʼaldeehgo oochíłígíí bitsʼą́ąjįʼ yisdáhóhkááh.
41 Áko hazaad dayoosdląądgo yaa bił dahózhónígíí tó bee dabiʼdoolzı̨́ı̨́ʼ, áko éí bijı̨́ táadi mííl daatsʼí ánéelą́ąʼgo hodiikai.
42 Áko tʼáadoo ádahozdiilzéhí daalʼaadii yee nidaʼnitinígíí bikʼehgóó ádajítʼé índa ahił dajídlı̨́įgo bááh ninádajiitihgo nídajidı̨́ı̨́h* áádóó sonídazdilzįįhgo hoolzhish.
Daʼjoodláanii ahił dajídlı̨́įgo kééhojitʼı̨́
43 Áko diné tʼáá ałtso tʼóó bił adahayóigo ádá dahodílzin, áádóó bikʼee tʼóó ił adahayóigo ádahooníiłii índa Diyin God bibee adziilii bee béédahózinii daalʼaadii binahjįʼ ląʼí ádaalyaa.
44 Áádóó daʼoodlánígíí tʼáá ałtso bee dahólóonii bił ałtsʼą́ą́ʼ daʼdzíłkʼiizgo tʼááłáhígi kééhojitʼı̨́ı̨́ nítʼééʼ;
45 haʼátʼíhída bee hódahólníihii índa hanaalyeʼé haa nidahaazniiʼ, áko diné tʼáá ałtso tʼááłáʼí nítínígo choideidoołʼįįłii bee ádaadinii bitaa dadzizniiʼ.
46 Tʼáá ákwíí jı̨́ aheełtʼéego nitsídadzikeesgo kin biiʼ sohodizin bił hazʼánígóó ałnáádajikah, índa hoł dahózhǫ́ǫgo áádóó ahił dajídlı̨́įgo dahooghangóó bááh ninádajiitih áádóó nídaʼjidı̨́ı̨́h,
47 Diyin God baa dahojiniihgo diné tʼáá ałtso hoł danilı̨́įgo hoolzhish. Áko tʼáá ákwíí jı̨́ yisdáhákáhígíí Bóhólníihii hóyiyiinííł.
Footnotes
^ Diyin God bizaad biyiʼ Éízha kʼad kéyah Térkii hoolyéii łahjįʼ Éízha hoolyéé nítʼééʼ.
^ Bikʼi díínílʼeezgo ániishłaajįʼ, nínígíí éí, Ná bikʼeh díshdlı̨́įʼjįʼ, níigo ání. Ps. 110:1.
^ Bóhólníihii bihodílzingo adánígíí tʼáá yaa ninákahgo ahił ídlı̨́įgo adánígíí nídeiyiiłʼaah nítʼééʼ.
