Colossians 4:1-18
4 Naatʼáanii danohłíinii, nihinaalteʼ tʼáá ákogi átʼéego índa tʼáá aheełtʼéego yáʼátʼéhígi ádaałʼı̨́, háálá yáʼąąshdi nihí ałdóʼ nihiBóhólníihii hólǫ́ǫgo nihił béédahózin.
Bee nidaʼnitinii
2 Tʼáadoo diniitłóhí sodadołzin, áádóó Diyin God bichʼįʼ ahééh danohsingo sodizin bee hadaʼísídółʼı̨́ı̨́ʼ.
3 Áádóó nihí ałdóʼ nihá sodadołzin, haneʼ yáʼátʼéehii baa dahwiilneʼ dooígíí nihá ashjaʼósingo nihá íidoolííł biniyé, áko Christ bínaʼniltin doo bééhózin da yę́ę baa nahwiilneʼ dooleeł. Éí baa nahashneʼgo biniinaa awáalyaaí nishłı̨́.
4 Áko tʼáá bee hahideesdzih dooleeł nítʼéʼígi átʼéego Christ baa haneʼ ííshjání ádeeshłíłígíí bíká sodadołzin.
5 Doo daʼoodlání binááł dahonohsą́ągo dahinohnáago Christ bá ádaahtʼı̨́įgo nihá ashjaʼósinígíí tsʼídá hazhóʼó chodaołʼı̨́.
6 Tʼáá áłahjįʼ ajoobaʼ saad éí áshįįh halnihígi átʼéego bee yádaałtiʼ, ákódaahtʼı̨́įgo diné tʼááłáʼí nítínígo bichʼįʼ tʼą́ą́ʼ hááʼdoodzihgi nihił béédahózin doo.
Kʼé haʼníigo bee naaltsoos niiltʼiʼii
7 Tíkikas, éí Bóhólníihii binahjįʼ nihikʼis ayóóʼóóʼníinii áádóó naalʼaʼí baʼahódlíii índa shił naalʼaʼí jílíinii éí shił áhootʼéhígíí tʼáá ałtso bee nihił hodoolnih.
8 Éí kodi nihił áhootʼéhígíí nihił béédahodoozįįł biniyé, áádóó nihijéí hadaʼólníigo ánihizhdoolííl ałdóʼ biniyé nihichʼįʼ ahóółʼaʼ.
9 Áádóó Onésimas bił ahóółʼaʼ, éí baʼólíigo ayóóʼóóʼníigo nihikʼis nilíinii, tʼáá aadę́ę́ʼ nihitahdę́ęʼgo nijighá. Éí tʼáá ájíłah kodi ádahootʼéii tʼáá ałtso bee nihił hozhdoolnih.
10 Aristárkas, bił awáalyaaí nishłíinii kʼé nihiłní. Mark, Bárnabas bił naaʼaash nilíinii, ałdóʼ kʼé nihiłní. (Mark nihaa níyáá ládą́ą́ʼ kʼé dabididoohniił, tʼáá íídą́ą́ʼ bee nihił hweeshneʼ yę́ęgi átʼéego.)
11 Áádóó Jáshowa, Jústas wolyéhígíí, ałdóʼ kʼé nihiłní. Bąąh nídahineeshgizhii* bitahdóó díí diné tʼéiyá Diyin God bee bóhólníihgo bił hazʼáanii yá nidaalnishgo shił nidaalnishii danilı̨́, áádóó bee shił náhoojǫǫłii danilı̨́.
12 Épafras tʼéí aadę́ę́ʼ nihitahdę́ęʼgo diné nilı̨́įgo Christ Jesus yá naalʼaʼí nilíinii kʼé nihiłní. Éí oodlą́ yee nininísáanii danohłı̨́į doo biniyé, índa tʼáadoo anáhóótʼiʼí Diyin God íinízinii tʼáá yíní átʼéegi nihił béédahózin doo biniyé tʼáá áłahjįʼ nihénálniihgo tʼáá íináwołí bee nihá sodilzin.
13 Háálá tʼáá ánółtso nihí áádóó Leiyodisíyadi índa Haiyerápolisdi kéédahohtʼíinii tʼáá íiyisí nihízhneedlı̨́įgo shił bééhózingo nihił hashneʼ.
14 Luke azeeʼ ííłʼíní ayóóʼóóʼníinii índa Díímas ałdóʼ kʼé nihiłní.
15 Leiyodisíyadi nihikʼisóó danilíinii, áádóó Nímfas índa éí bighan góneʼ daʼoodlání áłah nádleehii nihá kʼé dabididoohniił.
16 Díí naaltsoos nihichʼįʼ yééltaʼgo índa, Leiyodisíyadi daʼoodlání áłah nádleehii ałdóʼ bichʼįʼ dayízhdóołtah. Leiyodisíyagóó naaltsoos íishłaaígíí ałdóʼ tsʼídá dayídóołtah.
17 Áádóó Arkípas éí, Bóhólníihii bá nanilʼaʼgo naa deetʼáanii tsʼídá ałtso biʼdíílíiłgi baa áhólyą́, dabididoohniił.
18 Shí Paul, díí kʼé dishníigo bee akʼeʼashchíhígíí éí tʼáá shílaʼ bee áshłééh. Awáalyaaí nishłı̨́įgo shéédaałniih. Diyin God bibee ajoobaʼ nihił hólǫ́ǫ doo. Tʼáá ákótʼée doo.
Footnotes
^ Bąąh nídahineeshgizhii, jiníigo éí Jew dineʼé, jiníigo óolyé.
