Daniel 10:1-21
10 Pérzha kéyahgi éí Sáíras aláahgo naatʼáanii nilı̨́įgo tááʼ náhááh góneʼ díí saadígíí Daniel, éí Bélteshazar joolyéii bichʼįʼ yitʼíní ályaa. Áko saadígíí éí tʼáá aaníí índa ayóó átʼéego bichʼįʼ ádił niʼídzíiłgo hoolzhish. Áko hoł áhoodzaaígíí ááhyiłníinii baa haneʼgo jidiiztsʼą́ąʼgo bikʼizhdiitą́.
2 Éí yoołkáałdi, shí, Daniel yinishyéii, táadi damóo azlı̨́įʼjįʼ yínííł niséyá.
3 Chʼiyáán daalkanii tʼáadoo yishání, atsįʼ tʼáadoo yishání áádóó wáin tʼáadoo yishdlání índa tʼáadoo adíshtłahí táadi damóo azlı̨́ı̨́ʼ.
4 Átsé nídízídígíí naadiin dı̨́ı̨́ʼgóó yoołkáałgo Táígris ayóó átʼé tooh nílínígíí bibąąhgi sézı̨́ı̨́ nítʼééʼ.
5 Áko háíghal, nítʼééʼ shoo, diné léiʼ éí áłtsʼóózígo yisdizígíí bee naʼatʼą́hí łigaii ditsʼidgo ályaii ééʼ yee hadítʼéego Yúfazdę́ę́ʼ óola sis yee ákászaazgo sizı̨́.
6 Bitsʼíís éí tsé béril wolyéii łitsooígi ánoolnin; biniiʼ éí bitsʼáhodilgish nahalin; binááʼ éí honooyééł nahalingo dah nídínoʼ; bigaan áádóó bijáád éí béésh łitsoii bízdílid nahalingo dah nídínoʼ; yáłtiʼgo éí tʼóó ahojíyóí hahojííłʼá nahalingo diitsʼaʼ.
7 Áko shí, Daniel yinishyéii, shił áhoodzaaígíí tʼáá sáhí yiiłtsą́. Diné shił naakaígíí tʼáadoo dayiiłtsą́ą da, nidi ayóó átʼéego bitah dahodiisnáaʼgo tʼóó yóóʼaheezhjéeʼgo nídaʼádeesʼı̨́ı̨́ʼ.
8 Tʼáá sáhí sélı̨́įʼgo díí tʼóó ayóogo shił ádzaago yiiłtsą́, áko tʼóó shił áhásdįįdgo nisinisdzá áádóó ałdóʼ shitah doo hwiiłnaʼ da.
9 Ákohgo yáłtiʼgo disétsʼą́ą́ʼ, áko disétsʼą́ąʼgo tʼóó báhádzidgo bił niizı̨́įʼgo niʼjįʼ nikidiníishʼą́ągo iiłhaazh lá.
10 Áko shideelchidgo dah shishdloozhgo áshiilaa, jóʼakon.
11 Áko áshidííniid, Daniel, diné ayóóʼóóʼníinii nílíinii, yiizįįh, áko saad bee nichʼįʼ yáshtiʼígíí yísíníłtsʼą́ąʼgo bikʼiʼdiitįįh, háálá Diyin God naa shiníłʼaʼ. Áko tʼahdii díí saad yee shichʼįʼ yáłtiʼgo shitah hoditłidgo yiizįʼ.
12 Ákohgo áshidííniid, Daniel yinílyéii, tʼáadoo nił yéʼí, háálá chʼóshdą́ąʼdi nijéí bee bikʼidiʼdeeshtı̨́ı̨́ł ninizı̨́įʼgo tsídíníkééz yę́ędą́ą́ʼ áádóó niDiyin God bichʼįʼ adahojiinilbáʼí ádiʼnilyaa yę́ędą́ą́ʼ nidiiztsʼą́ą́ʼ áádóó tʼáá ni ádíníinii biniyé naa níyá.
13 Nidi Pérzha kéyahgi bee óhólníihgo bił hazʼą́ą́dóó naatʼáanii shaatįįh nádáahgo naadiin łaʼ yiską́ áádóó bikʼijįʼ Máíkel alą́ąjįʼ bídahólníhígíí łaʼ nilı̨́įgo shíká aalwod, ákohgo Pérzhagi aláahgo naatʼáanii danilíinii tʼáá bitah sédáá nítʼééʼ.
14 Yoołkááłgóó nidineʼé bichʼįʼ áhodooníłígíí bikʼidiʼdíítı̨́ı̨́ł biniyé naa níyá, háálá nił ádzaaígíí yidiiską́ą́góó baa hodoolzhishgo yaa halneʼ.
15 Áko díí saad tʼah yee shichʼįʼ yáłtiʼgo yaa íisdzaago tʼóó shił áhásdįįd.
16 Áko shoo, łaʼ diné biyeʼ nilíinii nahalingo shidaaʼ yideelchid, nítʼééʼ shizééʼ ąą ádzaago yáshtiʼgo shidááhdę́ę́ʼ sizínígíí ábidishní, Bóhólníihii nílíinii, shił áhoodzaaígíí tʼáá íiyisí yínííł bikʼeʼíyéeʼii shikʼi hooleʼ, áko shitah doo hwiiłnaʼ da.
17 Haash yitʼéego shibóhólníihii binaalʼaʼí nishłíinii nił ałchʼįʼ yáshtiʼ doo? Háálá shitah doo hwiinaʼgóó chʼééh disdziih.
18 Ákohgo łaʼ diné nahojílingo shináázhdeelchidgo shidziil ánáshijiidlaa.
19 Áko áshidííniid, Diyin God ayóóʼánóʼníinii nílíinii, tʼáadoo nił yéʼí; nichʼįʼ hózhǫ́ǫ doo, nidziilgo íʼdíínílzin, tʼáá aaníí nidziilgo íʼdíínílzin. Áko shichʼįʼ haadzíiʼgo bee shitah náhóółdziłgo ádíshní, Shibóhólníihii bíniʼ shichʼįʼ yáníłtiʼ, háálá tsʼídá shidziilgo ánáshiinidlaa.
20 Ákohgo áshidííniid, Biniyé naa níyáhígíísh nił bééhózin? Kʼad Pérzha kéyahgi naatʼáanii nilíinii bichʼįʼ tʼą́ą́ʼ nídeeshdáałgo bił anaʼánááhodeeshdlííł, áádóó dah diiyáago, shoo, Gríis kéyahdóó naatʼáanii doogááł.
21 Nidi diyingo bee akʼedaʼashchíinii biiʼdóó tʼáá aaníinii bee nił hodeeshnih. Áko díí bikʼijįʼ nishłínígíí tʼáadoo shidooyaʼí da, tʼáá hazhóʼó Máíkel ninanitʼaʼí nilíinii tʼéiyá.
