Daniel 11:1-45
11 Áko Daráíyas éí Míídiya diné nilíinii nantʼáago łaʼ náhááh góneʼ shí bíká adeeshwołgo bidziil ádeeshłíiłgo bá désdzil.
Náhookǫsjí aláahgo naatʼáanii áádóó shádiʼááhjí aláahgo naatʼáanii
2 Áko kʼad tʼáá aaníinii nił ííshją́ą́ áshłééh. Pérzhagi aláahgo naatʼáanii táaʼgo náhididookahgo dı̨́ı̨́ʼ góneʼ łaʼ nínáádidoodáałgo éí łaʼígíí tʼáá ałtso yiláahgo adootʼįįł, jóʼakon, áko astʼįįdígíí yee ayóó ábóodziil dooleeł; éí tʼáá ałtso yił hahodínóołchałgo Gríik dineʼé bee bóhólníihgo bił hazʼáanii yikʼijįʼ dooleeł.
3 Ákohgo náánáłaʼ aláahgo naatʼáanii ayóó átʼéii nídidoodáałgo tʼáá bí íinízinii bikʼehgo ayóó átʼé óhólnííh yinantʼáa dooleeł.
4 Áko éí bee óhólníihgo bił hazʼáanii nihidoodlałgo dı̨́ı̨́ʼgóó bitsʼą́ą́ʼ ałtsʼádoodzoh; bitsʼą́ą́dóó dayíchíihii éí doo baa didootʼáał da, doo nidi bidziilgo hooʼáałii bikʼehgo hootʼáał da doo, háálá bighadidootʼáałgo náánáłaʼ baa dadidootʼááł.
5 Ákohgo shádiʼááhjí aláahgo naatʼáanii nilínígíí tsʼídá bidziil doo, nidi díí yił naatʼáanii danilínígíí łaʼ haláahgo bidziil dooleełgo bee hóhólníihii haghaididootʼáałgo yee ádíhólníihgo tsʼídá ayóó átʼéego bidziilgo hooʼáał doo.
6 Áádóó díkwíí shı̨́ı̨́ nínáánááhaigo ahididooʼash; shádiʼááhdę́ę́ʼ naatʼáanii bitsiʼ éí náhookǫsjí aláahgo naatʼáanii yił ahaʼdidootʼááł yiniyé yaa doogááł, nidi yee bidziilii doo tʼáá yótąʼ da doo; hó ałdóʼ doo bízhníłdzil da doo, nidi éí yoołkáałdi há nidaalʼaʼí áádóó hazhéʼé índa bidziilgo áhósinii ninádabidiʼdootʼááł.
7 Nidi tʼáá hó hakʼéí łaʼ hazhéʼé bitsáskʼehgi néidoodzįįł; éí siláo yił doonéełgo náhookǫsjí aláahgo naatʼáanii bidziilgo bił hazʼáanii ałdóʼ yichʼįʼ nídidoodááł áádóó yił anaʼahidoolchíiłgo yikʼeh didoodleeł.
8 Áádóó éí biʼedaʼalyaii, bidiyin dabidiʼníinii áádóó łeetsʼaaʼ índa béésh łigaii łeetsʼaaʼ daʼílíinii ałdóʼ Ííjip kéyahgóó adeidoojih áádóó náhookǫsjí aláahgo naatʼáanii nilínígíí tʼáadoo yeinítʼíní díkwíí shı̨́ı̨́ nídoohah.
9 Ákohgo shádiʼááhjí aláahgo naatʼáanii nilínígíí bee bóhólníihgo bił hazʼáanii yaatįįh doobah áádóó tʼáá bí bikéyahgóó nídooʼnééł.
10 Áko biyeʼké danilíinii anaaʼ dahodoohłeeł biniyé siláo tʼóó ahayóí áłah ádeidoolííł; łaʼ éí tʼáá yilááh neelʼą́ągo náás ooʼishgo yinéełgo bidziilgo bił hazʼáanii yikʼijįʼ anaaʼ ánááhodoodlííł.
11 Ákohgo shádiʼááhjí aláahgo naatʼáanii ayóó átʼéego báhodoochįįłgo náhookǫsjí aláahgo naatʼáanii yichʼįʼ anaaʼ áhodoolííł; áko díí siláo ayóó ánéelą́ą́ʼ áłah íidoolííł, nidi díí siláo ayóó ánéelą́ʼígíí shádiʼááhjí aláahgo naatʼáanii bílákʼe didootʼááł.
12 Díí siláo ayóó ánéelą́ʼígíí dah yidínííłkaadgo ayóó átʼéego ádaa dzódlíigo tsídookos índa diné tʼóó ahayóidi míilgo neidoołtsxił; ákondi doo tʼáá akʼeshdidlı̨́į da doo.
13 Háálá náhookǫsjí aláahgo naatʼáanii nídiidzáago ayóó átʼéego siláo átséédą́ą́ʼ ánéelą́ą́ʼ yę́ę tʼah biláhídi ánéelą́ąʼgo áłah íidoolííł, áko díkwíí shı̨́ı̨́ nínáánááhaigo siláo ayóó ánéelą́ąʼgo áádóó bee anaʼalʼíinii tʼóó ahayóí yił nídidoozééł.
14 Éí hoolzhish bijı̨́įdi tʼóó ahayóí nínáádahidiibáahgo shádiʼááhjí aláahgo naatʼáanii yichʼįʼ anaaʼ ánáádahodoodlííł; áádóó ił áhoodzaa yę́ę bohodoolnííł biniyé nidineʼé bitahgóó diné doo nídanilyéesii tʼáá bí ayóó ádaniitʼé, danízin doo, nidi chʼééh adadootʼįįł.
15 Ákohgo náhookǫsjí aláahgo naatʼáanii doonéełgo kin haalʼáii ditą́ągo binaa ahééʼítłʼinii bíilkʼidgo ádeidoolíiłgo yikʼeh didoodleeł. Áko shádiʼááhjí aláahgo naatʼáanii bisiláo dah deínéehii doo bídaníłdzil da doo; bisiláo dahayóii bąąh nidahoodookałgo doo bídaníłdzil da doo.
16 Baatįįh yínánígíí tʼáá bí nízinígi ádoonííł áádóó tʼáadoo bíníłdzilí da doo; kéyah ayóó áhonóolningi yidoozįįłgo bee atéʼélʼíinii yee íidoołdįįł.
17 Áádóó tʼáá kʼé hólǫ́ǫ doo, nízingo yee bóhólníihgo bił hazʼáanii yee bidziilígíí tʼáá átʼé yił doonééł; éí ákódoonííł. Ííjip dineʼé binanitʼaʼí yił náhodooshǫǫł biniyé bitsiʼ łaʼ yeidoołtééł, nidi doo háká adoolwoł da, doo nidi hadziilgo áhodoolíił da.
18 Díí bikʼijįʼ tónteel bibąąhgóó atsídookosgo áadi ląʼí nishóhodiyoołtʼeeł, nidi tʼóó baa yáhásin ádajííłʼįįdii naatʼáanii nilíinii łaʼ hatsʼą́ą́ʼ niʼ kwíidoolíiłgo tʼóó haa yáhásinígi ánáhodoodlííł.
19 Áádóó bikʼijįʼ tʼáá hó hakéyah bohoníłdzil bił hazʼą́ą́góó nihéézhdoodááł, nidi dizhdoogohgo doo hwénáhoodzı̨́ı̨́ʼ átʼée da dooleeł.
20 Ákohgo hatsáskʼeh góneʼ łaʼ néidoodzįįłgo éí bee óhólníihgo bił hazʼáanii bee baa haʼniihígi naalyeʼé bikʼé nahalyéii yee ade áhósin doo, nidi éí tʼáadoo hashké hwiindziní, tʼáadoo anaaʼ hólóní, doo ląʼí náábiidoolkááłgóó bidiʼyoolyééł.
21 Bitsáskʼehgi diné doo tsʼíí átʼéii łaʼ bee óhólnííh bił hazʼáanii bee ił ídlíinii tʼáadoo baa deetʼáanii ákwii néidoodzįįł; éí kʼé nídzingo índa łídílchíigo doogááł, áko bee óhólníihii bił hazʼáanii aghaididootʼááł.
22 Áko tó yíląąd nahalingo siláo dah deínéehii yinéłígíí bidááhdóó yóóʼabidíʼnóolkałgo akʼeh didoodleeł; naatʼáanii éí bee ahaʼdeetʼáanii bídéétʼiʼii ałdóʼ ákóbidiʼdoolnííł.
23 Áko yił ahaʼdeetʼą́ą́dóó bikʼijįʼ éí tʼóó binaʼadloʼgo ááníił doo áádóó tʼáadoo kótʼéʼílíní diné tʼáá díkwíí nidi, yił bidziil dooleeł.
24 Áádóó nahósʼaʼgi yáʼádahootʼéehgo hashtʼehodítʼéego doogáałgo bizhéʼé yę́ę áádóó binálí yę́ę hádą́ąʼda tʼah doo ádeiléehii íidoolííł; diné bindaalyeʼé áádóó bąąh daʼoogą́ąʼii índa deitʼíinii bisiláo yitaidoonih. Tsʼídá bidziilgo nahazʼą́ą́góó yidiilkaalgo yikʼijįʼ nilı̨́įgo yinahaʼáa dooleeł, nidi díí tsʼídá tʼóó kónízahíjįʼ ádoonííł.
25 Áko yee ayóó ábóodziilii éí yee haʼoosníiʼgo áádóó siláo ayóó ánéelą́ąʼgo dah deínéehii yił shádiʼááhjí aláahgo naatʼáanii yichʼįʼ anaaʼ ádahodoolííł, áko shádiʼááhjí aláahgo naatʼáanii éí siláo ayóó ánéelą́ąʼii yee ayóó ábóodziilgo hachʼįʼ nídidoobah, nidi doo bízníłdzil da doo, háálá honahaʼáago honiʼdooloh.
26 Tʼáá aaníí, hachʼiyąʼ deiyáanii atídahodoolííł áádóó hasiláo yóóʼadahidínóochéełgo tʼóó ahayóí nidabidiʼdootsił.
27 Áko díí aláahgo naatʼáanii tʼáá áłah doo yáʼátʼééhgóó nitsíkeesgo bikááʼ adání yichʼįʼ dah sikéego biyoochʼíidgo ałchʼįʼ yáłtiʼ doo, nidi doo bá łaʼdooníił da, háálá bá nihonítʼiʼ bee nihootʼánígíí baa hoolzhiizhgo bohodoolnííł.
28 Áko aláahgo naatʼáanii ayóó átʼéego atʼı̨́įgo nihéédoodááł, nidi diyingo bee ahaʼdeetʼáanii yikʼijįʼ nilı̨́įgo tʼáá bí íinízinígi átʼéego íidoolííł áádóó índa bikéyahgóó nídoodleeł.
29 Bee nihootʼáníjįʼ ahoolzhiizhgo nínáádoodáałgo shádiʼáahjigo bisiláo yił doonééł, nidi ákóneʼ náánádzáii doo átséedi níyáhígi átʼéego náádoodáał da.
30 Háálá Kíttim kéyahdóó tsinaaʼeeł yee hachʼįʼ dadoobahgo hąąh nahodoołkałgo tʼą́ą́ʼ nízhdoodááł. Áádóó diyingo bee ahaʼdeetʼáanii tʼóó báhádzidgo yikʼijįʼ báhodoochįįłgo tʼáá bí nízinígi íidoolííł. Áko tʼą́ą́ʼ nádzáago diyingo bee ahaʼdeetʼáanii doo deinízinígíí yił ałchʼodadooʼniił.
31 Bisiláo dah deínéehii tʼáá bizááká hodílzingo bidziilgo bił hazʼáanii deidoołchǫǫł áádóó tʼáá áłahíjįʼ didlidgo nááhániihii nahgóó adeidiyoołtłʼił. Áko doo yildingóó niʼiiłchǫǫhii deidoosįįł.
32 Tʼóó áháʼníigo saad bee aa haʼniihii yee yóóʼahodínóoʼahgo bee ahaʼdeetʼáanii tsʼídá doo yáʼáshǫ́ǫ́góó yaa naakaígíí yidoołchxǫǫł, nidi diné biDiyin God yéédahósinii tsʼídá bidziilgo naazı̨́į dooleeł áádóó ayóó átʼéego akʼeh dadidlı̨́į doo.
33 Áko diné bitahgóó dahóyą́ągo akʼidadiʼyiitįįhígíí éí ląʼí nideintin doo. Ákondi ląʼí yiską́ąjįʼ diltłish bee nidabidiʼdootsił áádóó adabidiʼdoolkʼą́ą́ł áádóó dabidiʼdoolnééł índa bighadadiʼyooʼnił.
34 Atídabiʼdilʼı̨́įgo áłtsʼíísígo bíká iʼdoolwoł, áko diné tʼóó ahayóí éí tʼóó áháʼní saad yee aa dahaniihgo ałchʼodadooʼneełgo hodidookah.
35 Nabídahodínóotah áádóó chin bąąh ádingo índa łigaigo ádadoolnííł biniyé akʼidaʼdiitáanii łaʼ nihodoogáałjįʼ nidabidiʼdootsił, háálá nihootʼánígíí tʼah doo baa hoolzhíish da.
36 Áko aláahgo naatʼáanii tsʼídá tʼáá bí nízinígi ádoonííł; diyin dabidiʼníinii tʼáá ałtso yiláahgo tʼáá bí ayóó átʼéii ídiʼdoolnííł áádóó ayóó ádaatʼéii yee yáłtiʼgo diyin dabidiʼníinii biláahgo Diyin God nilíinii yikʼijįʼ yáłtiʼ doo. Áko hashké niidzı̨́įʼii bohoolyaajįʼ náás doogááł. Háálá bee nihodeetʼáanii bohodoolnííł.
37 Dabizhéʼé yę́ę bidiyin dabidiʼníinii doo bił nilı̨́į da doo, doodaiiʼ asdzání danilíinii yídin danilíinii nidi dooda, doo nidi diyin dabidiʼníinii łaʼ bił nilı̨́į da doo, háálá tʼáá bí tʼáá ałtso yiláahgo ádaa haʼniih dooleeł.
38 Áko bineʼ daʼniichéehii yidiyin bidiʼníinii tʼéí bił nilı̨́įgo dabizhéʼé yę́ę éí diyin tʼáadoo yéédahoosįįd daígíí óola áádóó béésh łigaii áádóó tsé daʼílíinii índa tʼáá aa daahyáii daʼílíinii tʼéí yee bił nilı̨́į doo.
39 Diyin doo bééhózinii bíká análwoʼgo bidziilgo bineʼ daʼniichééh bił nahazʼą́ą́góó yaa nídóotʼįįł. Éí baa ákódanízinii ayóó átʼéego ił nilı̨́įgo ábidoolíiłgo diné ląʼí yindantʼáago íidoolííł índa bikéyah dadooleełígíí béeso bikʼé yá ahádeidoozoh.
40 Áko nihoolzhiizhgo shádiʼááhjí aláahgo naatʼáanii nilíinii baatįįh náádoodááł, nidi náhookǫsjí aláahgo naatʼáanii nilíinii náátsʼóʼoołdísii bidziilii hakʼi chʼíníyá nahalingo bisiláo tʼóó ahayóigo áádóó tsindaabąąs bijáád naakiígíí áádóó łı̨́ı̨́ʼ yee nidaabaahii índa tsinaaʼeeł tʼóó ahayóigo yee haatįįh nídoozééł. Áko kéyah bił dah nahazʼánígóó tó bee nahozhneeshghaazhígi átʼéego hoł ahóóyáa doo.
41 Áko kéyah ayóó áhonóolnin góneʼ yah adoogáałgo kéyah tʼóó ahayóí yikʼeh didoodleeł, nidi Íídam dineʼé áádóó Móʼab dineʼé índa Áman dineʼé* dah daʼíʼéeshii ałdóʼ hayaa hadookah.
42 Áádóó ałdóʼ kédaayah yidoołnéełgo Ííjip kéyah doo doodzih da.
43 Áko Ííjipdóó óola áádóó béésh łigaii índa naalyeʼé daʼílíinii tʼáá átʼé yidoołnééł. Áko Líbiya dineʼé índa Iithiyópiya dineʼé bá nidaalʼaʼí danilı̨́į dooleeł.
44 Nidi haʼaʼaahdę́ę́ʼ áádóó náhookǫsdę́ę́ʼ haneʼ nilíinii ayóó átʼéego yikʼee nitsidoodááł; éí bąą ayóó átʼéego báhodoochįįłgo yichʼįʼ nídidoobahgo atíidoolíiłgo ałtso íidoołdįįł.
45 Áko tónteel áádóó dził diyinii ayóó átʼéii bitaʼgi biníbaal yiiʼdóó nantʼáii niidoonił, ákondi tʼáadoo háká oolyeedígóó hakééʼ áhodoodįįł.
Footnotes
^ Ízrel kéyah haʼaʼaahjigo áádóó shádiʼáahjigo kédaayah.
