Deuteronomy 10:1-22
10 Ákwii nahalzhiish yę́ędą́ą́ʼ Bóhólníihii áshidííniid, Tʼáá átséédą́ą́ʼ tsé dilkǫǫhii naaki hashtʼeelyaa yę́ęgi átʼéego ádíílííł, áádóó dziłghą́ąʼdi shaa díínááł, áko tsitsʼaaʼ dílzinii ałdóʼ ádíílííł.
2 Áádóó tʼáá átséédą́ą́ʼ tsé dilkǫǫhii hashtʼeelyaago nisíníłtseedígíí tʼáá éigi átʼéego tsé hashtʼenáádíídlíłígíí bikáaʼgi saad bee akʼeʼdeeshchííł, índa éí tsitsʼaaʼ dílzinii biih díínił.
3 Áko tsin nitłʼizii bee tsitsʼaaʼ dílzinii íishłaa, áádóó tʼáá átséédą́ą́ʼ yę́ęgi átʼéego tsé dilkǫǫhii naakigo hashtʼeʼnibíʼnítséelgo éí dziłghą́ą́ʼgóó dah diijaaʼ.
4 Éí bikáaʼgi neeznáago bikʼeh óʼooʼníiłii Bóhólníihii yee akʼeʼashchı̨́; tʼáá átséédą́ą́ʼ bee akʼeʼashchínígíí bikʼehgo áłah nohłı̨́ bijı̨́ı̨́dą́ą́ʼ dził bąąhdę́ę́ʼ kǫʼ biyiʼdóó Bóhólníihii nihichʼįʼ hahaasdzííʼ áádóó tsé dilkǫǫhii sheinínil.
5 Áko dziłghą́ą́ʼdę́ę́ʼ hadanáásdzáago tsé dilkǫǫhii éí tsitsʼaaʼ dílzinii íishłaaígíí biih yínil, áko Bóhólníihii shichʼįʼ yee haadzíʼígi átʼéego ákwii ninínil.
6 Áádóó Ízrel dineʼé danilíinii éí Jéíyakan baʼáłchíní náás ahoolchíiłii bitó hadahadleeh Biyérath hoolyéédóó dah diináago Mosíírah nahósʼaʼgi niníná; ákwii Éran daaztsą́ągo yóóʼábiʼdiilyaa, índa biyeʼ Eliyéízar wolyéii hatsáskʼehgi naalʼaʼgo nááʼiiłniihii náánásdlı̨́ı̨́ʼ.
7 Áádóó Gadgódah hoolyéégóó dah náázhdiiʼná, índa Gadgódah hoolyéédóó Játbatha hoolyéejįʼ náájíʼná; éí kéyahgi tooh danílı̨́.
8 Ákwii nahalzhiish yę́ędóó Bóhólníihii éí Líívai dineʼé tʼáá sahdii niinínil, áko Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii nideiʼáa dooleeł áádóó Bóhólníihii binááł naʼalʼaʼ bee nidzizı̨́į doo, índa díí jı̨́ı̨́góó bízhiʼ baa dahojiniih doo.
9 Éí bąą Líívai dineʼé danilíinii hakʼisóó bííʼ dooleełii doo bił ałtsʼą́ą́ʼ daʼjíłkʼiiz da doo; Bóhólníihii hwííʼ dooleełii nilı̨́į doo; jó, Bóhólníihii nihiDiyin God yee nihoníʼáanii bikʼehgo ákótʼée doo.
10 Áádóó tʼáá átséédą́ą́ʼ íisdzaa yę́ęgi átʼéego dziłghą́ąʼdi dízdiin jı̨́ áádóó dízdiin tłʼééʼ shee nááʼásdlı̨́ı̨́ʼ; íídą́ą́ʼ ałdóʼ Bóhólníihii shidiiztsʼą́ą́ʼ, áko Bóhólníihii tʼáadoo ánihisdįįd da.
11 Áádóó Bóhólníihii áshidííniid, Nídiiʼnéehgo dineʼé bilą́ąjįʼ dah diinááh, áko kéyah baa dideeshʼáałgo dabizhéʼé yę́ę bichʼįʼ bee ádee hadeesdzíiʼii yiih doonéełgo ádííʼ ádeidoolííł.
Diyin God yinízinii
12 Áko kʼad Ízrel dineʼé nohłíinii, haʼátʼíísh Bóhólníihii nihiDiyin God yee nihá hasʼą́? Díí lą́ą: Bóhólníihii nihiDiyin God dadíínóhsin, áádóó bikʼehgo deínóhkáahgo ayóóʼádeínóhʼníi doo, índa nihijéí tʼáá átʼé bee áádóó nihiiʼ sizíinii tʼáá átʼé bee Bóhólníihii nihiDiyin God bá nidaałʼaʼ doo.
13 Bóhólníihii bibikʼeh óʼooʼníiłii áádóó yee nihwiizʼáanii bikʼeh dahonołʼı̨́; éí díí jı̨́ bee nihichʼįʼ haasdzíʼígíí tsʼídá nihá yáʼátʼééh.
14 Jó, yádiłhił áádóó yótʼááh biláahdi yáʼąąshii índa niʼ nidahoneesʼą́ąjįʼ biiʼ dahólóonii tʼáá ałtso éí tʼáá bił Bóhólníihii nihiDiyin God bííʼ ádaatʼé.
15 Éí ákótʼéego Bóhólníihii nilíinii danihizhéʼé yę́ę yaa bił hózhǫ́ǫgo ayóóʼáyóʼníí nítʼééʼ índa bitsʼą́ą́dóó náás daʼahílchíihii néidiinil; éí díí jı̨́ átʼéhígi átʼéego nihokááʼ dineʼé tʼáá ałtso biláahgo nihí nánihidiinil.
16 Éí bąą ąąh náhinilgishiigi átʼéego nihijéí diyingo ádaolneʼ áádóó ákʼehaʼı̨́ bee nabídaʼdidzilii tʼáadoo danohłíní.
17 Háálá Bóhólníihii nihiDiyin God éí diyin dabidiʼníinii yiDiyin God nilı̨́, áádóó bídahólníihii yiBóhólníihii nilı̨́; Diyin God tsʼídá ayóó átʼéii áádóó ayóó ábóodziilii índa bitsʼáhoníyéeʼii nilı̨́. Diné doo łaʼ aʼohgo yaa nitsíkees da, índa aa doolyéełii doo néidiilée da.
18 Áádóó áłchíní bizhéʼé ádaadinii índa asdzání bąąh ádahasdįįdii tʼáá ákogi átʼéego yá nihodiiʼaah, áádóó déʼéyóní danilíinii ayóóʼáyóʼníigo chʼiyáán áádóó ééʼ yee yaa joobaʼ.
19 Éí bąą déʼéyóní ayóóʼádeínóhʼní, háálá Ííjip kéyahdi nihí ałdóʼ déʼéyóní danohłı̨́ı̨́ nítʼééʼ.
20 Bóhólníihii nihiDiyin God dadíínóhsin, áádóó tʼáá bí tʼéí bá nidaałʼaʼ, áádóó tʼáá bí tʼéí bąąh dashoojééʼ índa bízhiʼ bee ádee hadahidohdziih.
21 Bí baa dahohniihii nilı̨́ áádóó bí nihiDiyin God nilı̨́; ayóó ádaatʼéii índa bikʼedaʼíyéeʼii nihá yaa naagháago danóołʼı̨́ı̨́ʼ.
22 Danihizhéʼé yę́ę tsostsʼidiin yiltʼéego Ííjip kéyah góyaa yíkai, áádóó kʼad éí yádiłhił biyiʼdi sǫʼ ánéelą́ʼígi ánóohłą́ąʼgo ánihiilaa.
