Deuteronomy 2:1-37
2 Naanísiikai áádóó Tónteel Łichííʼ bichʼįʼgo honoojíígóó dah diiʼná, Bóhólníihii áshidííniidígíí bikʼehgo, áko Dził Síyer hoolyéii binéiʼnéełgo ląʼí yiską́.
2 Nítʼééʼ Bóhólníihii shichʼįʼ haadzíiʼgo ání,
3 Díí dził binááhnéełgo nízaadgóó ahoolzhiizh; kʼad náhookǫsjigo dah doohnééh.
4 Áádóó diné bichʼįʼ handziihgo ábidiní, Nihikʼisóó danilíinii Íísa dineʼé éí Síyergi kéédahatʼínígíí bíighahgóó chʼínóhnéehgo nihéédadooldzííł; éí bąą hazhóʼó ádaa dahonohsą́.
5 Tʼáadoo bił naʼahíyádaałtiʼí; jó, bikéyah doo łaʼ nihaa dideeshʼáał da; tʼááłáʼí adéesʼeez bíighahgo nidi dooda, háálá Íísa dineʼé éí Dził Síyer hoolyéhígi bííʼ dadooleełgo baa hodiníʼą́.
6 Béeso bee chʼiyáán baa nidahołniihgo dabinołkiin doo, áádóó ałdóʼ béeso bee éí tó doodlı̨́įłii baa nidahołniihgo daahdlą́ą doo.
7 Háálá Bóhólníihii nihiDiyin God éí baa nidasoohkaígíí tʼáá átʼé yikʼijisdliʼ, áádóó díí ayóó átʼé honoojí biyiʼ wohnéełgo bił bééhózin; nihił hólǫ́ǫgo dízdiin nááhai; tʼáadoo bídin danohłínígóó hoolzhiizh.
8 Áádóó nihikʼisóó danilíinii Íísa dineʼé éí Dził Síyergi kéédahatʼı̨́įgo bíighah chʼíniiʼnáago halgaigóó atiinígíí dah diiʼná áádóó Íílathgi kin haalʼáhígíí índa Ííziyan-gííbergi kin haalʼáhígíí bikʼeeʼąą ahééniiʼnáago Móʼab kéyah honoojíí góneʼ iiʼná.
9 Áko Bóhólníihii áshidííniid, Móʼab dineʼé bichʼįʼ dahodiyółnááł lágo, áádóó doo bikʼiidoohjah da; éí bikédaayah doo nihaa dideeshʼáał da, háálá Ar hoolyéegi Lat baʼáłchíní ahiiʼ hááʼahiyoolchíiłii kéyah baa diníʼą́.
10 Ákwii Íímim dineʼé kéédahatʼı̨́ı̨́ nítʼééʼ; éí diné ayóó ádaatʼéii áádóó tʼóó adahayóí nítʼééʼ índa Ánakim dineʼégi ádaníłnééz nítʼééʼ.
11 Éí Ánakim dineʼégi átʼéego ałdóʼ yéʼiitsoh dabidiʼníí nítʼééʼ, nidi Móʼab dineʼé éí Íímim* dineʼé deiłníí nítʼééʼ.
12 Hórim dineʼé ałdóʼ bítséedi Dził Síyergi kéédahatʼı̨́ı̨́ nítʼééʼ, nidi Íísa dineʼé haghadahodeestʼą́ągo tʼóó ádahasdįįd; ákwii kéédahojitʼı̨́ı̨́ nítʼééʼ yę́ęgi bighan ádahoolaa; Ízrel dineʼé dajílíinii Bóhólníihii éí kéyah haidiníʼą́ągo hóóʼ daazlı̨́ʼígi átʼéego kéyah bííʼ daazlı̨́ı̨́ʼ.
13 Kʼad tįʼ, Zííred yíldzis góyaa tó nílínígíí haʼnaa ninohnééh, dííniid, áko Zííred yíldzis góyaa tó nílínígi haʼnaa niniiʼná.
14 Kéídesh-barníya hoolyéédóó dah diiʼnáago Zííred yíldzis góyaa tó nílínígóó tʼáá yiiʼnéełgo tádiindóó baʼaan tseebíí nááhai. Oonéłígíí bitahgi diné nidaabaahii ałtso daneeznáajįʼ díigi átʼéego naasdeeʼ; Bóhólníihii ábidííniidígi ádahoodzaa.
15 Háálá tʼáá aaníí Bóhólníihii bikʼijįʼ nilı̨́įgo oonéłígíí bitahgi diné nidaabaahii ánábíłdįįhgo ałtso ábísdįįdjįʼ ákónábiilʼįįh nítʼééʼ.
16 Kódzaago Ízrel dineʼé bitahgi diné nidaabaahii ádabiʼdisdįįdgo ałtso daneeznáago
17 Bóhólníihii kóníigo shichʼįʼ haadzííʼ,
18 Díí jı̨́ Ar hoolyéhíjįʼ haʼnaa ninohnééh; éí Móʼab kéyah bibąąhgóó áhoolyé.
19 Ámon dineʼé bitʼáahjįʼ oonáago bichʼįʼ dahodiyółnááł lágo, áádóó tʼáadoo bił naʼahíyádaałtiʼí; jó, Ámon dineʼé bikéyah doo tʼáá kʼad nihííʼ íishłaa da, háálá éí Lat baʼáłchíní náás ahoolchíiłii bííʼ dadooleełgo baa diníʼą́.
20 (Éí ałdóʼ yéʼiitsoh bikéyahgo bá yátiʼ nítʼééʼ. Ałkʼidą́ą́ʼ ákwii yéʼiitsoh kéédahatʼı̨́ı̨́ nítʼééʼ. Ámon dineʼé bizaad kʼehgo yéʼiitsoh Zamzámim deiłníí nítʼééʼ;
21 éí diné ayóoda ádaatʼéii áádóó tʼóó adahayóí nítʼééʼ índa Ánakim dineʼégi ádaníłnééz nítʼééʼ, nidi Ámon dineʼé nilíinii dabinááł Bóhólníihii ábísdįįdgo yighadahodeestʼą́ągo kéédahatʼı̨́ı̨́ nítʼééʼ yę́ęgóó bighan ádahoolaa.
22 Tʼáá ákótʼéego Bóhólníihii éí Íísa baʼáłchíní náás ahoolchíiłii Síyergi kéédahatʼínígíí dabinááł Hórai dineʼé íísdįįd. Áko yighadahodeestʼą́ągo díí jı̨́ı̨́góó ákwii dabighan.
23 Áádóó Éívim dineʼé éí Hazíírim hoolyéegi kin dah naazhjaaʼgóó, tʼáá Géíza kin haalʼáajįʼ kéédahatʼı̨́ı̨́ nítʼééʼ. Éí Káftor hoolyéédę́ę́ʼ Káftor dineʼé danilíinii ádabisdįįdgo kéédahatʼı̨́ı̨́ nítʼééʼ yę́ęgóó dabighan ádahoolaa.)
24 Hashtʼeʼádadołnéehgo Árnan tooh nílínígíí haʼnaa ninohnééh; jó, Héshban kin haalʼáádóó aláahgo naatʼáanii Ámor dineʼé nilíinii Sáíhan wolyéii bikéyah tʼáá bił nihaa diníʼą́; kʼad nihííʼ ádaohłééh, áádóó bichʼįʼ anaaʼ danohdzin doo.
25 Díí jı̨́ nihitsʼá dahazyéeʼgo áádóó yádiłhił biyaagi ałʼąą dineʼé nihikʼee bił daayéeʼgo ádeeshłííł, áádóó nihaa dahodiitsʼaʼgo nihikʼee bitah dahoditłid doo, índa nihiniinaa yínííł yikʼee tiʼdahooníih doo.
Ízrel dineʼé éí Sáíhan áádóó bidineʼé yikʼeh dadeesdlı̨́ı̨́ʼ (Num. 21:21-30)
26 Áko honoojí Kédiimath hoolyéhídóó dah adiiłʼaʼgo éí Héshban kin haalʼáádóó aláahgo naatʼáanii Sáíhan wolyéii bichʼįʼ saad bee kʼé wóshʼníinii bił iʼííłʼaʼgo ádíshní,
27 Nikéyah bikááʼ atiingóó hadiishnéehgo nishʼnáajigo, doodaiiʼ nishtłʼajigo tʼáadoo haashnéhí nikéyahgóó hadideeshnéłígíí bee shadiʼníʼaah.
28 Béeso bee chʼiyáán naa nahashniihgo éí yishą́ą doo. Béeso bee tó naa nahashniihgo éí yishdlą́ą doo. Áko tʼáá niʼ ákǫ́ǫ́ hadideeshnéłígíí bee shadiʼníʼaah.
29 Íísa baʼáłchíní náás ahoolchíiłii Síyergi kéédahatʼínígíí índa Móʼab dineʼé danilíinii Ar hoolyéegi kéédahatʼínígíí ádashiilaaígi átʼéego Jórdan tooh haʼnaadi Bóhólníihii nihiDiyin God kéyah nihaidiníʼánígíí biih yiiʼnáajįʼ, ni ałdóʼ shadiʼdííʼááł.
30 Nidi Héshban kin haalʼáádóó aláahgo naatʼáanii Sáíhan wolyéii bíighahgóó chʼídiiʼnéłígíí tʼáadoo yee nihadiʼníʼą́ą da. Háálá Bóhólníihii nihiDiyin God éí hániʼ yiyííłtłʼis áádóó hajéí doo biníhóóʼáágóó áhoolaa. Nihílákʼee hodidooʼáłígíí biniyé doo ájóneʼ átʼéégóó díísh jı̨́ı̨́góó ákóhósin.
31 Nítʼééʼ Bóhólníihii áshidííniid, Jó, Sáíhan wolyéii áádóó bikéyah nihaa hodinishʼaah; ádííʼ ádaohłééh áádóó bikéyah ííʼ dooleełii danihííʼ dooleeł.
32 Áko Sáíhan wolyéii áádóó bidineʼé yił nihikʼijįʼ nídadiibaaʼgo Jéíhazgi nihikʼiijééʼ.
33 Áádóó Bóhólníihii nihiDiyin God nihichʼįʼ hoʼníłniiʼgo hó áádóó hayeʼké índa hodineʼé ałtso bił ádahosiildįįd.
34 Áko íídą́ą́ʼ hakin hadaasʼáhígíí ałtso dasiilná, áádóó tʼáá hakin hadaasʼáhígi hastóí áádóó sáanii índa áłchíní ałtso ádahosiildįįd. Tʼááłáʼí nidi doo łaʼ jidziihgóó ádahwiilyaa.
35 Tʼáá hazhóʼó alı̨́ı̨́ʼ dooígíí tʼéiyá ádá áádasiilzįįd, áádóó kin hadaasʼáhígíí naalyeʼé bąąh daʼoogą́ąʼii ádá nídahaadlááʼ.
36 Aróʼer hoolyéego kin haalʼáhídóó éí Árnan tooh bidáaʼjįʼ áádóó tooh bibąąhgóó kin haalʼáhídóó tʼáá Gíliyadjįʼ łahgo nahontłʼago kin haalʼáii nihá ádingo niiʼná, háálá Bóhólníihii nihiDiyin God éí tʼáá ałtso yee nihadiʼyiiʼaahgo ákódeiidzaa.
37 Áádóó Ámon dineʼé dabikéyah tʼéiyá tʼáadoo baa niiʼnáa da, doodaiiʼ Jábak tooh bibąąhgóó, doodaiiʼ daadziłdi kin hadaasʼáhígóó, doodaiiʼ Bóhólníihii nihiDiyin God tʼááká ákǫ́ǫ́ dóoyaʼ lágo, nihiłnínígóó tʼáadoo tádadiiʼnáa da.
Footnotes
^ Íímim jiníigo éí bikʼee yéeʼii jiníigo óolyé.
