Deuteronomy 32:1-52
32 Yótʼáahdi hinooláii, daʼíísółtsʼą́ą́ʼ, áko nihichʼįʼ hadeesdzih; nahasdzáán nílíinii, shizaad yísíníłtsʼą́ą́ʼ.
2 Shinaʼnitin éí níłtsą́gi átʼéego naałtin doo áádóó shizaad éí dahtooʼ náhádleehígi átʼée doo áádóó bee nidizhołgo naniseʼ bee yishzhohígi átʼée doo índa níłtsą́zhool chʼil bikʼijįʼ nítsxaazígi átʼée doo.
3 Háálá Bóhólníihii bízhiʼ baa chʼíhwiishʼaah doo; nihí éí Diyin God ayóó átʼéii nilı̨́įgo baa yádaałtiʼ doo.
4 Bí éí Tsé Niłdzilii nilı̨́; tsʼídá yáʼátʼéehgo áánííł, háálá yee átʼéii tʼáá ałtso tʼáadoo átʼéhí da; Diyin God éí tʼáá aaníí baʼahódlíii nilı̨́ áádóó doo ákwii éʼétʼéii bąąh ádin; tʼáá ákogi átʼéii índa tʼáá ákóneʼ átʼéii nilı̨́.
5 Baʼáłchíní tʼáá bí ádadoolchxǫʼii doo tʼáá bí baʼáłchínígíí bikʼehgo ádzaa da; doo tsʼííd ádaatʼéégóó índa bindaʼadloʼgo daʼahílchíihii danilı̨́.
6 Daʼ Bóhólníihii kónídaohdlééh, dineʼé doo áhályáanii áádóó doo hóyáanii nohłíinii? Bí éí nihizhéʼé náánihiisniiʼii nilı̨́. Bí éí ánihiilaii índa ánihósinii nilı̨́.
7 Ałkʼidą́ą́ʼ tádaʼdooldeeʼ yę́ę béédaałniih; náás daʼníchı̨́ı̨́dę́ę́ʼ baa nitsídaohkees; danihizhéʼé nideídółkid, áko éí nihichʼįʼ ííshjání ádeidoolííł; nihá aląąjįʼ naazíinii bíndabídółkidgo nihił nídahodoolnih.
8 Aláahgo Ayóóʼátʼéii éí ałʼąą dineʼé kéyah bííʼ dadooleełii yá ałtsʼáyiizoh yę́ędą́ą́ʼ áádóó Ádam bitsʼą́ą́dóó deíchíihii ałtsʼáyiiznil yę́ędą́ą́ʼ Ízrel dineʼé ánéeltʼeʼígíí bikʼehgo kéyah bá haadzoh.
9 Háálá Bóhólníihii bíiʼii éí bidineʼé átʼé; Jéíkab hóóʼ dooleełii nilı̨́įgo nízhdiiłtı̨́.
10 Honoojí doo bikááʼ siláhígóó kéyah bił niiyóołgi tʼáá hó bikʼízhníyá índa bił tázhdíʼaashgo nazneeztą́ą́ʼ áádóó anááʼ baa áháyánígi átʼéego baa áhojilyą́ą́ nítʼééʼ.
11 Atsá bitʼoh yił hááhoniłchxaʼgo bitʼaʼ yiłbalgo yee biyázhí háiniłkaʼ, áádóó bitʼaʼ kʼínéíłbałgo biyázhí yiyaa anátʼahgo nínáyiidlah.
12 Éigi átʼéego Bóhólníihii tʼéiyá bił tádííʼáazhgo diyin dabidiʼníinii doo łaʼ hoł hólǫ́ǫ da nítʼééʼ.
13 Nahasdzáán bikááʼ dawódahgóó tázhdígháahgo áhósin nítʼééʼ, áádóó dádaʼakʼehgóó ninádantʼı̨́įhii jiyą́ą́ nítʼééʼ, áádóó tsékʼizdę́ę́ʼ tsésʼná bitłʼizh índa tsétahdóó áliv bineestʼąʼ bikʼah jiyą́ągo áhósin nítʼééʼ.
14 Béégashii bitsʼą́ą́dóó géeso índa dibé bibeʼ áádóó dibé yázhí áádóó Béíshandóó deenástsʼaaʼ áádóó tłʼízíchǫǫh agháago yáʼátʼéehii índa tłʼoh naadą́ą́ʼ agháago yáʼátʼéehii bił jiyą́ą́ nítʼééʼ; chʼil naʼatłʼoʼii bitooʼ dił nahalingo łichíiʼii nidlą́ą́ nítʼééʼ.
15 Nidi Jéshuran* éí nineelkʼaigo adziiztáál. Nínílkʼah áádóó nitsįʼ ditą́ índa ninínílkʼai. Nítʼééʼ Diyin God áhoolaii yóóʼazhdííʼą́ áádóó Tsé Niłdzilii bee yisdájiigháhígíí tʼóó bá nahojiłtʼiʼ.
16 Diyin dabidiʼníinii yee Bóhólníihii deizʼįįdgo łeʼdeiniisı̨́ı̨́ʼ índa doo haldinígi ádaatʼínígíí yee deizʼįįdgo yádahashchįįd.
17 Níłchʼi bidaʼiiníziinii yichʼįʼ náádaʼiisniiʼ, nidi Diyin God bichʼįʼ éí dooda; diyin dabidiʼníinii doo yéédahósingóó yichʼįʼ náádaʼiisniiʼ; jó, diyin dabidiʼníinii ániid dahazlı̨́įʼii, éí danihizhéʼé yę́ę doo deidísin da nítʼéeʼii yichʼįʼ náádaʼiisniiʼ.
18 Tsé Niłdzilii bá ninihiʼdiizhchíinii doo baa nitsóhkees da índa Diyin God ánihiilaii baa deisiyoonah.
19 Éí Bóhólníihii yiníłʼı̨́įgo doo yíłdin da silı̨́ı̨́ʼ, háálá biyeʼké índa bitsiʼké dabizʼįįd.
20 Áádóó ádííniid, Doo honíshʼı̨́į da dooleeł; ííshją́ą́ shı̨́ı̨́ haa dajitʼı̨́į doo, háálá daʼahílchíihii ákʼeh halʼíinii danilı̨́įgo áłchíní doo badaʼahóodlííʼ ádaatʼéii danilı̨́.
21 Doo Diyin God nilíinii yee bichʼįʼ łeʼdashiniisı̨́ı̨́ʼ; tʼáadoo dabiniyéhí daígíí yee dashizʼįįdgo bichʼįʼ shádahashchįįd. Áko shí éí doo dineʼé nilíinii bee łeʼdahodínéesįįł, áádóó hodeeshʼįįłgo anaʼí doo áhályáanii bee hádahodeeshchįįł.
22 Háálá hodiiltłah nahalingo sháháchįʼii hoolʼáágóó tiʼhooʼnííh bééhoneelʼą́ągo adoołkʼą́ął doo; nihokááʼgóó kʼeeʼąą nídaneestʼáanii tʼáá bił adidoolkʼą́ą́ł, índa dził yee daniłdzilii yihodidoonił.
23 Doo yáʼáshǫ́ǫ́góó áhátʼíinii hakʼi yáideestsihgo shikʼaaʼ hakʼijįʼ choideeshʼįįł.
24 Dichin bikʼee ádazhdoodįįł áádóó kǫʼ ałtso iʼdiiłkʼą́ąhii yínííłtsoh óʼoołdįįłii áhodoołdįįł. Naaldlooshii daʼaldeełii índa tłʼiish nidaaʼnaʼii bikʼaasdaʼ bikʼeʼíyéeʼii hakʼijįʼ biʼdeeshnih.
25 Tłʼóoʼdi anaʼí dabidiltłish áádóó dahaghan góneʼ bikʼedaʼíyéeʼii éí tsíłkéí áádóó chʼikéí bízhą́ą́ nidaakaii tʼáá bił áhodoołdįįł áádóó awééʼ daʼałtʼoʼii índa hastóí bitsiiʼ daalgaii tʼáá bił nidahodiʼdootsił.
26 Kódíshní, Daʼníłtsʼą́ą́ʼgóó tahoniiłkaad doo nítʼééʼ áádóó diné bitahgóó doo hwéédahaniihgóó áhooshłaa doo nítʼééʼ.
27 Daʼanaʼí hashké daniidzı̨́įʼgo tʼáadoósh áhóneʼgi da doo áádóó daʼanaʼí tʼáá ádzaagóó doo tʼóó kódaaníi da doo, Danihidziilígíí bee kótʼéego ádahwiilyaa; díí áhóótʼįįdígíí yeeʼ doo Bóhólníihii áátʼįįd da.
28 Jó, shidineʼé doo bichʼįʼ yáátiʼ da áádóó doo akʼidaʼdiitįįh da.
29 Dahóyą́ą dooleeł yę́ę, áko díí yikʼidadiʼdootı̨́ı̨́ł nítʼééʼ áádóó bidáahdi áhootʼée dooleełii yaa nitsídaakees doo nítʼééʼ.
30 Haash yitʼéego tʼáá łah jidiltʼéhígo éí miil ánéelą́ąʼgo diné haijah doo nítʼééʼ; áádóó naakizhdiltʼéego éí neeznáadi mííl diné hakʼee yóóʼadínóodzoł? BiTsé Niłdzilii bineʼ nidadziidziihii nahwiisʼniiʼgo áádóó Bóhólníihii nahjįʼ nihodiníʼą́ągo tʼéiyá ákótʼée doo nítʼééʼ.
31 Jó, bitsé éí doo nihí nihiTsé Niłdziliigi átʼée da; éí nihiʼanaʼí tʼáá bí ándahwiiʼaahgo ádaa ákodandzin.
32 Jó, bichʼil naʼatłʼoʼii éí Sádam kin haalʼáii bichʼil naʼatłʼoʼiigi átʼé áádóó Gomárah kin haalʼáii bidáʼákʼehgóó deílʼáhígíigi átʼé; éí bineestʼąʼ dadíkʼǫ́ǫ́zh; bichʼil naʼatłʼoʼii bąąh dah naazyínígíí dadíchʼííʼ.
33 Biwáin éí tłʼiish báhádzidii bikʼaasdaʼ átʼé índa tłʼiish bikʼaasdaʼ bikʼeʼíyéeʼgo báhádzidii átʼé.
34 Díí lá shił hashtʼeʼsiláago shiyódí bitahgi bidáʼdeedléezh ni.
35 Kʼééhodidooʼníłígíí éí bee shóhólnííh; shí kʼéédideeshʼnííł; baa hoolzhiizhgo ałtádadidooghas; bijı̨́ bichʼįʼ hodiyooʼnáłígíí koshídę́ę́ʼ hadziih áádóó ábidoołdįįłii tsxı̨́įłgo bikʼi hwiidooleeł.
36 Bóhólníihii bidineʼé nayikʼíyáłtiʼgo yá nihodiiʼaah doo áádóó łahgo átʼéego tsídookosgo bá nidaalʼaʼí yaa aʼááh dínóozįįł; yee dabidziilígíí yitsʼádooldahii áádóó naalteʼ, doodaiiʼ doo naalteʼ danilíinii ádaadingo yaa ákoniizı̨́ı̨́ʼ.
37 Áádóó ádidooniił, Háájíshąʼ hadiyin dabidiʼníinii índa hatsé badaʼjólí nítʼéʼígíí?
38 Jó, éí daneeskʼahii náádajiiłniihgo biyeel ádajiłʼı̨́įgo deiyą́ą́ nítʼééʼ yę́ę índa wáin yanáadziʼgo nááhániihii deidlą́ą́ nítʼééʼ yę́ę háájí daazlı̨́ı̨́ʼ? Bíniʼdii éí nídiijeehgo nihíká oojeeh; bíniʼdii éí bineʼ nidahohdzíih doo.
39 Kʼad shí tʼéí Diyin God nishłı̨́įgo shaa ákodanoohsįįh; diyin shíká análwoʼii doo łaʼ hólǫ́ǫ da; naʼastseed áádóó hinááh ádaʼashłeʼ; tídaʼdishłeʼ áádóó náʼásdziih; doo nidi łaʼ shílákʼeedóó háázhdoołtéełgo bízhneelʼání da.
40 Háálá yáʼąąshgóó yáádidiishnihgo kódíshníi doo, Hoolʼáágóó hinishná.
41 Shidiltłish bízdílidii hááháshkʼaashgo áádóó ánihwiitʼaah yiiłtsoodgo shiʼanaʼí dajílíinii kʼéédahodeeshdlíił doo; dashijoołxáii kʼéédahodishʼı̨́į doo.
42 Shikʼaaʼ dił yidlą́ągo ádeeshłííł áádóó shidiltłish alghał doo; éí anaʼí nidabiʼdiztseedii áádóó dabiʼdisnáanii bidił yidlą́ą doo áádóó naatʼáanii bitsiiʼ danineezii yę́ę bitsįʼ yilghał doo.
43 Ałʼąą dineʼé danohłíinii, Bóhólníihii bidineʼé bił nihił nidahoozhǫǫh, háálá bá nidaalʼaʼí dabidił nidaashchxiiʼgo ályaaígíí yá kʼéédidooʼnííł índa biʼanaʼí danilíinii kʼéididoodlííł; bikéyah áádóó bidineʼé yaa aʼááh dínóozįįł.
44 Nítʼééʼ Mózes níyáago díí sin biyiʼdóó saadígíí tʼáá ałtso diné deididootsʼı̨́įłgo bee bichʼįʼ yájííłtiʼ; Nan biyeʼ Jáshowa yił níʼáázh.
45 Áko Mózes éí díí saad tʼáá ałtso Ízrel dineʼé yichʼįʼ yee yááłtiʼgo ałchʼįʼ ánáyiidlaa.
46 Ábijiní, Nihichʼįʼ díí saad díí jı̨́ bee hahásdzíʼígíí hazhóʼó baa nitsídaahkees; éí nihaʼáłchíní bichʼįʼ bee hadahohdziihgo ádaa deilzįįhgo díí bee hazʼáanii bitsʼą́ą́dóó saadígíí tʼáá ałtso yikʼeh ádaatʼée doo.
47 Nihichʼįʼgo doo tʼáadoo biniyéhí da, háálá niheʼiinaʼ átʼé; díí bee kéyah biyiʼ asʼahgóó anihídayiiłkaah dooleełígíí bichʼįʼ Jórdan tooh haʼnaa nidoohnéełgo éí kéyah baa doohnéełgo ádííʼ ádadoohłííł.
Mózes éí Kéínan kéyahgóó jidídóoʼįįł bee hwiʼílniiʼ
48 Tʼáá éí bijı̨́ Bóhólníihii éí Mózes yichʼįʼ haadzíiʼgo ání,
49 Nídiidáahgo Dził Ábarim níʼáhígíí bighą́ąʼgi Nííbo dahatsʼosíjįʼ éí Móʼab kéyah biyiʼ Jériko binaashiijįʼ hasínáahgo Kéínan kéyah éí Ízrel dineʼé bííʼ dooleełgo baa diníʼánígíí dínííłʼįįł.
50 Áko dził bąąh hasíníyáago ákwii dadíítsaał, áádóó nizhéʼé yę́ę bitah díínááł; tʼáá nikʼis Éran Dził Hórgi daaztsą́ yę́ędą́ą́ʼ dabizhéʼé yę́ę yitah níyáhígi ádíínííł.
51 Háálá doo ákǫ́ǫ́ áshííníłʼįįdígíí Ízrel dineʼé bitahgi honoojí Zin hoolyéegi Méribah-Kéídesh tóogi ákóshiinilaa; jó, Ízrel dineʼé biníiʼgi dinishyingo ashíínísin doo nítʼééʼ.
52 Ákótʼée nidi díí kéyah tʼáá nízaadę́ę́ʼ* tʼóó dínííłʼįįł, nidi Ízrel dineʼé kéyah baa dideeshʼáłígíí doo biih díínáał da.
