Deuteronomy 34:1-12
34 Móʼab kéyah dadzígaidóó Mózes dah diiyáago Dził Nííbo yąąh híiyáago Dził Pízgah bighą́ąʼjįʼ haayá; éí Jériko binaashiijí dził siʼánígíí átʼé, áko Bóhólníihii éí Gíliyad kéyahdóó Dan dineʼé bikéyahjįʼ tʼáá átʼé hachʼįʼ ííshją́ą́ áyiilaa.
2 Áádóó tʼáá átʼé Náftalai áádóó Íífreiyim índa Manáseh dineʼé bikéyah áádóó Júdah kéyah tʼáá átʼéé nítʼééʼ tónteel siyíníjįʼ,
3 índa shádiʼááhjí Jériko honíteelgóó, tʼáá éí tsin páam kin haalʼá hoolyé, áádóó Zóʼer kin haalʼáajįʼ Bóhólníihii hachʼįʼ ííshją́ą́ áyiilaa.
4 Áko Bóhólníihii ábíłní, Díí kéyah éí Éíbraham áádóó Áízak índa Jéíkab bichʼįʼ bee ádee hadeesdzíiʼgo ábidííniid, Díí kéyah éí nihaʼáłchíní náás ahoolchíiłii baa dideeshʼááł. Díí kéyahígíí tʼáá ni ninááʼ bee níníłʼı̨́įgo ániishłaa, nidi doo biih díínáał da.
5 Áko Mózes éí Bóhólníihii yá naalʼaʼí nilíinii Móʼab kéyahgi daaztsą́; Bóhólníihii bizaad kʼehgo ádzaa.
6 Áádóó Móʼab kéyah yíldzisgi Bóhólníihii yóóʼáhoolaa; Beth-píyor hoolyéhígíí binaashiijí yíldzisgi yóóʼáhoolaa, nidi díí jı̨́ı̨́góó hojishchááʼ doo łaʼ bił bééhóziní da.
7 Mózes éí neeznádiindóó baʼaan naadiin binááhaigo binááʼ tʼah yee ooʼı̨́įgo índa tʼah tʼáá hayóigo daaztsą́.
8 Áádóó Móʼab kéyah dadzígaigi Ízrel dineʼé éí Mózes yaa daachago tádiin yiską́; kótʼéego Mózes baa yínííł dajílı̨́įgo baa atínídazhdindleehígíí bíighah niiníłką́.
9 Nan biyeʼ Jáshowa éí níłchʼi kʼehgo hódzą́ hwiiʼ hadeezbin; jó, Mózes tʼah hiná yę́ędą́ą́ʼ hakʼi dah deesniiʼgo Ízrel dineʼé dahwíistsʼą́ąʼgo hakʼeh dahółʼı̨́ı̨́ nítʼééʼ; Bóhólníihii éí Mózes yichʼįʼ yee haadzíiʼii yidaʼósin nítʼééʼ.
10 Áko Ízrel dineʼé bitahgóó Diyin God yá halneʼii tʼáá Mózes yę́ęgi átʼéii Bóhólníihii yił ahééhólzinii tʼáadoo łaʼ biʼdiiltsą́ą da.
11 Éí bee éédahózinii áádóó ayóó átʼéego ádahooníiłii tʼáá átʼé ázhdoolííł biniyé Bóhólníihii yichʼįʼ hóółʼaadígíí Ííjip kéyahdi Féro bichʼįʼ áádóó bá nidaalʼaʼí tʼáá ałtso bichʼįʼ índa bikéyahgi tʼáá átʼé nítʼééʼ baa nijigháá nítʼééʼ.
12 Áádóó bigaan ayóó ábóodziilgo índa ayóó átʼéego bikʼeʼíyéeʼii tʼáá átʼé bee Ízrel dineʼé tʼáá ałtso binááł Mózes álílee kʼehgo íʼiilaa.
