Deuteronomy 5:1-33
5 Áko Mózes éí Ízrel dineʼé tʼáá ałtso hágo bizhdííniidgo ábijiní, Daʼíísółtsʼą́ą́ʼ, Ízrel dineʼé nohłíinii, díí yee nihwiizʼáanii áádóó yee nihodiiʼaahii bee nihichʼįʼ yáshtiʼgo díí jı̨́ nihijeeh hwiishʼaah, áko bídahoołʼaah doo, áádóó bikʼeh dahonołʼı̨́į doo, índa bidaʼołʼı̨́į doo.
2 Bóhólníihii nihiDiyin God éí Dził Hóreb hoolyéedi nihił ahaʼdeetʼą́.
3 Bóhólníihii díí bee ahaʼdeetʼáanii danihizhéʼé yę́ę doo yee yił ahadaʼdeestʼą́ą da, nidi nihí díí jı̨́ dahiniiʼnánígíí tʼáá áníiltso nihił ahadaʼdeestʼą́.
4 Tʼáá ahéłniiʼjįʼ dziłdi kǫʼ biiʼdóó Bóhólníihii nihichʼįʼ hahaasdzííʼ.
5 (Íídą́ą́ʼ Bóhólníihii áádóó nihí nihitaʼgi sézı̨́įgo Bóhólníihii bizaad nihichʼįʼ ííshją́ą́ áshłaa, háálá kǫʼ bikʼee nihił daayéeʼgo dziłgóó tʼáadoo dadoohkai da.) Áko ání,
6 Shí, Bóhólníihii nihiDiyin God Ííjip kéyahdi naalteʼ danohłı̨́ yę́ędę́ę́ʼ háánihííʼeezhii áshtʼı̨́.
7 Tʼááká diyin náánáłaʼ dahólǫ́ǫgo íínísin yíilaʼ.
8 Haʼátʼíhígíida bedaʼalyaii doo ádá ádíílíił da; haʼátʼíhígíida yádiłhił biyiʼdi dahólóonii, doodaiiʼ nahasdzáán bikáaʼgi dahólóonii, doodaiiʼ táyiʼ naaldeehii doo bééʼdíídlíił da,
9 áko éí doo bichʼįʼ tséʼyaa náníljoł da doo, doodaiiʼ doo bee nahółáa da doo, háálá shí éí Bóhólníihii niDiyin God łeʼnízinii nishłı̨́; daʼazhéʼé doo ákwii ádajíítʼįįdígíí éí doo dashidzisdįįdgóó hadaʼáłchíní náás ahoolchíiłii táadi índa dı̨́įdi ałkʼi náʼázhchı̨́įjįʼ bikʼi hwiileehgo bá nináhwiishʼnííł,
10 nidi shí baa aʼááh nisinígíí haa shı̨́ı̨́ néelą́ąʼdi mííl ádanéelą́ąʼgo ayóóʼádashóʼnínígíí áádóó shibikʼeh óʼooʼníiłii yikʼeh dahółʼíinii bikʼidajishdlí.
11 Bóhólníihii niDiyin God bízhiʼ doo dílzingóó doo ádíílíił da; jó, tʼáá háiida Bóhólníihii bízhiʼ doo dílzingóó ájiilaaígíí bee ádihozhdiiltʼiʼgo Bóhólníihii hakʼijįʼ yisʼą́ą doo.
12 Hááʼáyı̨́ı̨́h jı̨́ éí hodílzingo íínísingo anáʼátʼáah doo; jó, Bóhólníihii niDiyin God ákótʼéego yee nichʼįʼ haadzííʼ.
13 Hastą́ą́h jı̨́ tʼéí nanilnish doo, áádóó tʼáá ákódígo nanilnish doo,
14 nidi tsostsʼid jínígíí éí Bóhólníihii nihiDiyin God bihááʼáyı̨́ı̨́h jı̨́ átʼé, áko éí bijı̨́ tʼáá haʼátʼéegoda doo nidoolnish da, ni lá índa niyeʼ ałdóʼ dooda, nitsiʼ ałdóʼ dooda, diné ná naalteʼ ałdóʼ dooda, asdzání ná naalteʼ ałdóʼ dooda, nibéégashii nidi dooda, nitélii nidi dooda, nilı̨́ı̨́ʼ ałʼąą ádaatʼéii nidi dooda, déʼéyóní tʼóó átsééd nił kééhatʼíinii nidi ałdóʼ doo nidoolnish da. Áko diné ná naalʼaʼí áádóó asdzání ná naalʼaʼí tʼáá nigi átʼéego hááhályı̨́įh doo.
15 Díí béédaałniih: Ííjip kéyahdi naalteʼ danohłı̨́ı̨́ nítʼééʼ, índa Bóhólníihii nihiDiyin God bílaʼ yee ayóó ábóodziilii áádóó bigaan bitsʼáhoníyéeʼii yee áádę́ę́ʼ chʼínihiníʼeezh; éí bąą Bóhólníihii nihiDiyin God ánihidííniid, Hááʼáyı̨́ı̨́h jı̨́ı̨́ góneʼ dahodíínóhsin, nihiłní.
16 Nizhéʼé índa nimá nił nilı̨́įgo íínísin; jó, Bóhólníihii niDiyin God ákótʼéego nichʼįʼ yee haadzííʼ, áko asʼahgóó hinínáa doo índa nihá yáʼátʼéehgo áhooníiłgo Bóhólníihii nihiDiyin God éí kéyah nihaidiníʼánígíí bikáaʼgi ákónítʼée doo.
17 Diné tsʼídá doo diyííłhéeł da.
18 Tsʼídá doo adidííléeł da.
19 Tsʼídá doo adínííʼı̨́įł da.
20 Tsʼídá doo tʼáá ádzaagóó bił kééhótʼíinii baa hólneʼí.
21 Tsʼídá doo bił kééhótʼíinii beʼasdzą́ą́ bidádíníilnih da; bił kééhótʼíinii bighan tʼáadoo bidáninilníní, bikéyahda, diné bá naalteʼda, asdzání bá naalteʼda, bibéégashiida, bitéliida tʼáadoo bidáninilníní áádóó bił kééhótʼíinii daabíhígíí tʼáá ałtso tʼáadoo bidáninilníní.
22 Díí saadígíí éí Bóhólníihii yee yáłtiʼgo áłah nohłı̨́įgi tʼáá ánółtso dziłdi kǫʼ biiʼdóó áádóó kʼos biiʼdóó índa ayóogo chahałheeł biiʼdóó biinééʼ ayóó íitsʼaʼgo nihichʼįʼ yáłtiʼ nítʼééʼ, áádóó tʼáadoo haʼátʼíhída náádooʼniid da. Tsé dilkǫǫhii naakigo bikáaʼgi yikʼeʼashchı̨́įgo sheinínil.
Ízrel dineʼé bił daayééʼ (Ex. 20:18-21)
23 Ákódzaago kʼos diłhił biiʼdóó iinééʼ dasidootsʼą́ą́ʼ yę́ędą́ą́ʼ índa dził dookʼą́ąłgo áháníjįʼ shichʼįʼ ninoohkai; nihidineʼé bá aląąjįʼ nisoozíinii índa hastóí danohłíinii shaa noohkai.
24 Áádóó ádadooniid, Bóhólníihii nihiDiyin God bee biʼoh hodidilyéehii áádóó yee ayóó átʼéii nihichʼįʼ yitʼíní áyiilaa, áádóó kǫʼ biiʼdóó biinééʼ dasidiitsʼą́ą́ʼ; díí jı̨́ Diyin God éí diné yichʼįʼ yáltiʼgo áádóó diné tʼahdii hináago baa ákodaniidzı̨́ı̨́ʼ.
25 Éí bąą kʼad haʼátʼéegoshąʼ daniiʼnée doo? Jó, díí ayóó átʼéego kǫʼígíí ánihidoołdįįł. Bóhólníihii nihiDiyin God biinééʼ náádasidiitsʼą́ą́ʼ ládą́ą́ʼ tʼóó dadíníiʼnééł.
26 Jó, bitsʼíís dahólǫ́ǫgo kéédahatʼíinii tʼáá ałtso bitahgóó háísh éí Diyin God hináanii kǫʼ biiʼdóó yáłtiʼgo jidiiztsʼą́ąʼii nihí dasidiitsʼą́ʼígi átʼéego tʼahdiísh jiiná?
27 Nílááh, bitʼáahjįʼ ninínááh; Bóhólníihii nihiDiyin God yee hahidoodzihígíí yídííłtsʼįįł, áádóó Bóhólníihii nihiDiyin God yee nichʼįʼ hahaasdzíʼígíí tʼáá ałtso bee nihichʼįʼ hahidíídzihgo nihí ałdóʼ dadidiitsʼı̨́ı̨́ł áádóó bikʼeh ádaniitʼée doo.
28 Áádóó saad bee shichʼįʼ yádaołtiʼii Bóhólníihii yidiiztsʼą́ą́ʼ, áko Bóhólníihii áshidííniid, Díí dineʼé nichʼįʼ saad yee yádaałtiʼii disétsʼą́ą́ʼ; baa yádajiłtiʼii yáʼátʼéehgo bee hadadziisdzííʼ.
29 Dooládóʼ tʼóó laanaa da, dabijéí biyiʼdi tʼáá áłahjįʼ dashidósingo shibikʼeh óʼooʼníiłii yikʼeh dahółʼı̨́į laanaa, áko bí áádóó badaʼáłchíní náás daʼahílchíihii yáʼátʼéehgo bá áhooníiłgo ahóyéelʼáa doo.
30 Nílááh, bichʼįʼ dínáahgo kóbidiní, Nihiníbaal haalʼáágóó nídadohkááh.
31 Nidi ni, éí tʼáá kweʼé shíighahgi sínízı̨́, áko shibikʼeh óʼooʼníiłii tʼáá átʼé áádóó bee nihodiyíʼáanii índa bee nihodiishʼaahii bee nichʼįʼ yádeeshtih; éí bee nidanítin doo, áko yikʼeh dahółʼı̨́įgo kéyah baa diníʼánígíí bííʼ dadooleeł.
32 Éí bąą Bóhólníihii nihiDiyin God nihichʼįʼ yee haadzíiʼii bikʼeh dahonołʼı̨́įgo ádaa daahsįįh, áádóó nishʼnáajigo índa nishtłʼajigo doo hadoohkah da.
33 Deínóhkáah dooleełgóó ánóhtʼée dooleełgi Bóhólníihii nihiDiyin God nihichʼįʼ yee haadzíiʼii bidaʼíínóhsin, áko dahinohnáa doo, áádóó tʼáá ałtsojįʼ nihá yáʼátʼéehgo áhooníił doo, índa asʼahgóó anihídayiiłkaahgo kéyah bikáaʼgi kéédahohtʼı̨́į dooleełígíí nihííʼ dadooleeł.
