Exodus 5:1-23
5 Áádóó bikʼijįʼ Mózes éí Éran yił Féro yaa níʼáazhgo áyidííniid, Bóhólníihii éí Ízrel biDiyin God kóní, Shidineʼé bééʼníłnííh; éí honoojíidi hodílzingo áłah nídaadleehgo shichʼįʼ nidahodoołaał.
2 Nidi Féro ání, Háishąʼ Bóhólníihii nilı̨́įgo bizaakʼeh honishʼı̨́įgo Ízrel dineʼé bééʼdeeshnih. Bóhólníihii bidinínígíí doo bééhasin da, índa doo tʼáá kʼad Ízrel bééʼníłniiʼ da.
3 Áko ázhdííniid, Hííbrew dineʼé biDiyin God nihaa honíleʼ, áko baa nániikąąh; nihaʼdiʼníʼaahgo honoojíígóó tágí jı̨́ oonééł ánízahjįʼ nidiikah, áadi Bóhólníihii nihiDiyin God bichʼįʼ náádadiʼyiilnih, doodago éí naałniih índa diltłish yee atínihidoolííł.
4 Nidi Ííjip dineʼé aláahgo binanitʼaʼí áháłní, Mózes índa Éran nohłíinii, haʼátʼíísh biniyé diné naanish bitsʼáhóhnííł? Nihílááh, naałnish.
5 Áko Féro ánáádooʼniid, Jó, kʼad kéyah biyiʼ diné tʼóó ahóóyóí índa binaanish bitsʼą́ą́ʼ niʼkółééh.
6 Áko tʼáá éí bijı̨́ Féro éí naanish binanitʼaʼí danilíinii índa bikʼehgo nidaʼanishí yichʼįʼ haadzíiʼgo ání,
7 Kʼad kodóó tłʼoh naadą́ą́ʼ bitsǫz bis bił álʼíní átséédą́ą́ʼ ádaałʼínę́ęgi átʼéego diné tʼáadoo baa náádahołjoołí; bíniʼdii tʼáá bí tłʼoh naadą́ą́ʼ bitsǫz ádá ninádayiiłjooł.
8 Nidi bis átséédą́ą́ʼ ánéeltʼeʼ yę́ę tʼáá ákónéeltʼeʼgo ádeileʼ doo; tʼáá bichʼįʼgo éí dooda, háálá yídadiiłgisgo kódaaní, NihiDiyin God bichʼįʼ náádadiʼyiilnih biniyé nihééʼníłnííh.
9 Bíniʼdii naanish bidziilii bichʼįʼ diné bídaałnáago éí tsʼídá yéego nidaalnishgo ádeínóhsin. Áko saad tʼáá ádzaaí doo yaa áńdahodíltʼı̨́į da doo.
10 Áádóó naanish binanitʼaʼí danilíinii índa bikʼehgo nidaʼanishí chʼíkaigo diné ádeidííniid, Féro kóní, Tłʼoh naadą́ą́ʼ bitsǫz doo nihaa náádeeshjoł da.
11 Nihílááh tʼáá nihí tłʼoh naadą́ą́ʼ bitsǫz hádaahtʼı̨́, nidi nihinaanishígíí doo nihá biʼoh áńdoolníił da.
12 Áko Ííjip kéyahgóó tʼáá átʼéé nítʼééʼ diné nihinééstʼeʼgo tłʼoh naadą́ą́ʼ bitsǫz bitsʼáskʼehgi behégod áłah ánáádajidleʼ.
13 Naanish binanitʼaʼí danilíinii yídahoniłkadgo ádaaní, Tłʼoh naadą́ą́ʼ bitsǫz nihaa dahiiljołgo bindashoołnish yę́ęgi átʼéego nihinaanish ádaałʼı̨́.
14 Ízrel dineʼé bikʼehgo nidaʼanishígíí éí Féro bá nidaalʼaʼí naanish bee bídahólníihgo nidahasʼnilígíí nídahoneesxaalgo hachʼadahashkéego ádahodííniid, Haa néeltʼeʼgo bis áńdaałʼįįh yę́ę haʼátʼéegoshąʼ adą́ą́dą́ą́ʼ áádóó jı̨́ı̨́dą́ą́ʼ tʼáadoo ákónéeltʼeʼ ádaohłaa da?
15 Ákohgo Ízrel dineʼé bikʼehgo nidaʼanishí Féro yaa yíkaigo ádeiłní, Haʼátʼéegoshąʼ ninaalʼaʼí daniidlíinii kónihiinilaa?
16 Ninaalʼaʼí daniidlíinii doo tłʼoh naadą́ą́ʼ bitsǫz nihaa haljooł da, nidi bis ádaahłeʼ danihiłní; jó, ninaalʼaʼí daniidlíinii nídanihidiʼneesghaal, nidi tʼáá ni nidineʼé badaʼátʼeʼii ádaatʼé.
17 Nidi Féro ádííniid, Jó, bídadoołgis, bídadoołgis; éí bąągo ádadohní, Nihíniʼdii nihééʼnółníihgo Bóhólníihii bichʼįʼ náádadiʼyiilnih.
18 Nidi kʼad nihílááh, háálá tłʼoh naadą́ą́ʼ bitsǫz doo łaʼ nihaa náádadooljoł da, nidi bis tʼáá ákódanéeltʼeʼgo ádaahłeʼ.
19 Ízrel bidineʼé bikʼehgo nidaʼanishígíí bis tʼáá ákwíí jı̨́ ádaahłeʼ nítʼééʼ yę́ę tʼáadoo biʼoh ánéeltʼeʼgo ádaahłeʼí, hodooʼniidgo tʼáá íiyisí hachʼįʼ nidahwiiʼnáago baa ákodazniizı̨́ı̨́ʼ.
20 Féro bitsʼą́ą́ʼ chʼééjíkaigo Mózes áádóó Éran habaʼ sizı̨́įgo baa jíkai.
21 Áko ádahodííniid, Bóhólníihii éí nihiníłʼı̨́įgo nihá nihwiiʼaah, háálá Féro áádóó bá nidaalʼaʼí nihikʼijįʼ bá dahoołchįįd. Kʼad tʼóó diltłish yee nidanihidoołtsiłgo óołaa.
Móses bisodizin
22 Áko Mózes éí Bóhólníihii bichʼįʼ nínáádziisdzáago ábijiní, Bóhólníihii, haʼátʼíishąʼ biniyé díí diné bichʼįʼ nidahwiiʼnáago íinilaa? Haʼátʼíishąʼ biniyé kojįʼ ashííníłʼaʼ?
23 Jó, Féro baa níyáago nízhiʼ binahjįʼ bichʼįʼ hahásdzííʼdóó wóshdę́ę́ʼ doo aaníinii yee diné atííłʼı̨́įgo yaa nídiidzá, doo nidi nidineʼé yisdáníníił da.
