Exodus 7:1-25
7 Áko Bóhólníihii éí Mózes ánéidooʼniid, Jó, Féro bichʼįʼgo diyin bidiʼníinii ániishłaa áádóó Éran nikʼis éí ná halneʼii nilı̨́į doo.
2 Bee nichʼįʼ haasdzíʼígíí tʼáá ałtso bee yáníłtiʼ doo índa Éran nikʼis éí Féro yichʼįʼ yáłtiʼgo hakéyahdóó Ízrel dineʼé béézhʼdoołnih.
3 Nidi shí éí Féro bijéí deestłʼis áádóó shibee éédahózinii índa shibikʼee tʼóó ił ahayóii Ííjip kéyahgi kʼeeʼąą yilzhishgo ádeeshłííł.
4 Féro doo nihíistsʼą́ąʼ da doo, áko Ííjip dineʼé bikʼijįʼ dah deeshʼnihgo áádóó shidineʼé dah deínéehii tʼáá éí shidineʼé, Ízrel dineʼé danilíinii biniinaa tsʼídá ayóó átʼéego haa nídéeshtʼįįłgo bee Ííjip kéyahdóó chʼídeeshʼish.
5 Shí Bóhólníihii nishłı̨́įgo Ííjip dineʼé hoł béédahodoozįįł biniyé Ííjip kéyah bikʼijįʼ dah didiishʼniiʼgo hatahdę́ę́ʼ Ízrel dineʼé chʼídeeshʼish.
6 Áko Mózes áádóó Éran éí Bóhólníihii hachʼįʼ yee haadzíʼígíí biʼjiilaa.
7 Ákohgo Mózes tseebídiin binááhai; Éran éiyá tseebídiindóó baʼaan tááʼ binááhai; íídą́ą́ʼ Féro bichʼįʼ hadziisdzííʼ.
Éran bigish
8 Áádóó Bóhólníihii éí Mózes áádóó Éran áyidííniid,
9 Féro ánihididooniił, Haaʼíyeeʼ tʼáá nihí álílee ayóó átʼé ááníiłii óhłééh, ákohgo Éran kóbididííniił, Nigish nídiitįįhgo Féro biyaajįʼ aniłtʼeʼ, áko tłʼiish dooleeł.
10 Mózes éí Éran bił dashdiiʼáazhgo Féro baazhníʼáázh, áko Bóhólníihii tʼáá hachʼįʼ yee haadzíʼígíí biʼjiilaa, áko Éran bigish éí Féro áádóó bá nidaalʼaʼí biyaajįʼ ayííłtʼeʼgo tłʼiish silı̨́ı̨́ʼ.
11 Ákohgo Féro éí diné dahóyáanii índa álíleego ádaʼoołʼįįłii hágo yidííniid; éí Ííjip kéyahdóó ayóó átʼéego álílee kʼehgo ídaʼoolíiłii danilı̨́, áko éí naʼadloʼgo álílee kʼehgo ídaʼoołʼįįłii ałdóʼ ákódaʼiilaa.
12 Háálá diné tʼááłáʼí danítínígo dabigish niʼjįʼ ádayiistʼeʼgo tłʼiish ninádahaasdlı̨́ı̨́ʼ, nidi Éran bigish éí dahagish ałtso ayiisʼnaʼ.
13 Nidi Bóhólníihii éí Féro yijéí yiyííłtłʼisgo Féro doo hwíistsʼą́ąʼ da; Bóhólníihii ádííniidígi ádziidzaa.
Dił bee atíʼályaaígíí
14 Áko Bóhólníihii éí Mózes áyidííniid, Féro bijéí yítłʼisgo diné doo yééʼdoołnihgóó yee nidooltih.
15 Nílááh, tʼah abínídą́ą́ʼ gish éí tłʼiish silı̨́ı̨́ʼ nítʼééʼ yę́ę yítı̨́įłgo Féro baa díínááł; éí tóógóó deeyá, áko toohgi jiníyáajįʼ tooh bibąąhgi bibaʼ sínízı̨́į doo.
16 Áko ábididííniił, Bóhólníihii, Hííbrew dineʼé biDiyin God nilíinii, nichʼįʼ shiníłʼaʼ kóníigo, Shidineʼé bééʼníłnííh, áko éí honoojíidi shichʼįʼ nidahałáa doo, jóʼakon, nidi tʼahdii doo shíísíníłtsʼą́ąʼ da.
17 Bóhólníihii kóní, Kótʼéego Bóhólníihii nishłı̨́įgo nił bééhodoozįįł: jó, gish dah yishtı̨́łígíí bee tooh nídideeshxałgo dił dooleeł.
18 Áko tooh biiʼ łóóʼ dínóonééł, áádóó tooh niłchxon dooleeł, áko Ííjip dineʼé tó yidlánígíí deidooʼįįł.
19 Áko Bóhólníihii éí Mózes áyidííniid, Éran ábididííniił, Ííjip hazʼą́ągi tó dadeezlínígíí áádóó tooh danílínígíí áádóó beʼakʼid dah naazyínígíí índa tó naazyínígíí dił dadooleeł biniyé bikááʼgóó nigish bił dah didiilnííh, áko Ííjip kéyahgi tʼáá átʼéé nítʼééʼ dił hólǫ́ǫ doo; azhą́ tsin łeetsʼaaʼ índa tsé łeetsʼaaʼ tó dabiyiʼígíí tʼáá átʼé dił dadooleeł.
20 Mózes áádóó Éran hachʼįʼ Bóhólníihii haadzíʼígíí biʼjiilaa. Táłkááʼgóó gish yił dah didiilniiʼgo Féro áádóó bá nidaalʼaʼí dabinááł tooh néidííłhaal, áko ałtso dił silı̨́ı̨́ʼ.
21 Áko tooh biyiʼ łóóʼ daneezná áádóó tooh niłchxon silı̨́ı̨́ʼ, áko Ííjip dineʼé toohdóó tó doo dayódlą́ą́ʼ átʼée da, índa Ííjip kéyahgi tó ałtso dił daazlı̨́ı̨́ʼ.
22 Nidi Ííjip kéyahdóó álíleego ádaʼoołʼįįłii beʼálííl yee tʼáá ákódaʼiilaa, ákohgo Bóhólníihii ádííniidígi áhoodzaa. Féro bijéí tʼahdii nitłʼizgo doo hwíistsʼą́ąʼ da.
23 Áko Féro názyizgo tʼóó yah anáádzá; díigi ádzaago tʼáadoo nidi bijéí bidiisnáaʼ da.
24 Áko Ííjip dineʼé tʼáá ałtso tooh bibąąhgóó tó doodlı̨́įłii yíkaʼdaʼageed, háálá tooh nílínígíí doo dayódlą́ą́ʼ átʼée da.
Chʼał bee atíʼályaaígíí
25 Bóhólníihii éí tooh néidííłhaaldóó bikʼijįʼ tsostsʼid yiską́.
