Ezekiel 34:1-31
34 Bóhólníihii shichʼįʼ hanáánáádzíiʼgo kóní,
2 Diné nílíinii, Ízrel dineʼé yaa ádahalyáanii bikʼijįʼ nílı̨́įgo handziih; aa ádahojilyáanii tʼáá hó hachʼįʼ handziihgo áhodiní, Bóhólníihii Diyin God kóní, Ízrel dineʼé yaa ádahalyáanii tʼáá bí tʼéiyá tʼáá ádíighahígo tʼáá bí tʼéí daʼayą́ą́ nítʼéʼígíí doo hojoobaʼ ájíníi da! Dibé yaa áhályáanii yeeʼ dibé yaʼałtsoʼ dooleeł.
3 Neeskʼahii yeeʼ daołghał; aghaaʼ éí danihiʼééʼ; dabinołkʼahii éí nidaołtseed, nidi dibé éí doo badaʼiyołtsóod da.
4 Doo dabidziilii éí dabidziilgo tʼáadoo áńdaohdlaa da; ka deíkáahii éí tʼáadoo hadaałtʼé áńdaohdlaa da; nidaʼniłhodígíí éí azeeʼ yee nídoodzihii tʼáadoo bąąh ádaohłaago bá bikʼídaʼdoodiz da; yóóʼadabidiʼniiskaadii tʼáadoo ninádahishooʼeezh da; yóóʼadahaaskaii éí tʼáadoo hadasinootą́ąʼ da, nidi bídaʼnołkadgo índa tʼáá naʼníleʼdii bindanohtʼáá nítʼééʼ.
5 Áko baa áhodoolyąąłígíí ádingo biniinaa tʼóó taoskai áádóó naaldlooshii dahashkéii tʼáá ałtso yichʼiyąʼ daazlı̨́ı̨́ʼ.
6 Dził tʼáá ałtso naaznilgóó áádóó tʼáá ałtso dawókʼą́ą́góó índa nihokáaʼgi tʼáá ałtsogóó shidibé taoskai, áko shidibé haidínóotaałii índa háidídóoʼįįłii ádingo biniinaa nahasdzáán tʼáá náhaazʼą́ą́ nítʼééʼ bikááʼgóó ałtso taoskai.
7 Éí bąą nihí diné baa ádahołyáanii, Bóhólníihii áníinii deísółtsʼą́ą́ʼ:
8 Bóhólníihii Diyin God kóní, Tsʼídá tʼáá aaníí hinishná; ákótʼéego shidibé nidínóolcheełgo bił diʼdoodił daazlı̨́ʼígíí áádóó dibé yaa áhályáanii ádinígíí biniinaa naaldlooshii dahashkéii tʼáá ałtso dabidoolghał daazlı̨́ı̨́ʼ áádóó shá aa ádahalyáanii shidibé tʼáadoo hadeineeztą́ąʼ da, nidi dibé yaa ádahalyáanii tʼáá bí tʼéí daʼííyą́ą́ʼ áádóó dibé éí tʼáadoo yadaʼiistsood da,
9 éí bąą dibé baa ádahołyáanii, Bóhólníihii áníinii dadoohtsʼı̨́ı̨́h,
10 Bóhólníihii Diyin God kóní, Jó, dibé yaa ádahalyáanii tsʼídá bikʼijįʼ nishłı̨́ áádóó shidibé shaa nídazhdooʼnił índa dibé doo badaʼdziiłtsóódgóó áhodeeshłííł. Áko dibé baa ádahojilyáanii doo tʼóó áchʼįʼ nidazditsih da doo; shidibé doo hachʼiyąʼ da dooleełígíí biniyé hazééʼdóó hááhideeshʼnił.
11 Háálá Bóhólníihii Diyin God kóní, Tʼáá shí shidibé hadinéeshtaałgo bitah dídéeshʼįįł, jóʼakon.
12 Tʼáá dibé yaa áhályáanii bidibé taoskaigo háidéezʼı̨́ʼígi átʼéego ákótʼéego shidibé hádídéeshʼįįł, áko kʼos diilkǫʼgo chahóółhéél yę́ędą́ą́ʼ éí bijı̨́ tʼáá ałtsogóó taoskai yę́ędę́ę́ʼ yisdánáhideeshnił.
13 Índa dadineʼé bitahdę́ę́ʼ áádóó kédaayahdę́ę́ʼ áłah áńdeeshdlíiłgo tʼáá bí bikéyah biih nídeeshnił áádóó Ízrel dineʼé bidził naaznilgóó tó hadaazlínígóó índa diné kéédahatʼı̨́ı̨́góó tʼáá átʼé banídaʼastsoʼ doo.
14 Chʼil yílʼáagi daʼałchozh doo; dziłghą́ąʼdi chʼil yílʼáago éí daabígo ákwii daʼałchozh doo; ákwii chʼil yílʼáagi náhinoojah doo; Ízrel dineʼé bidził daníʼáii bighą́ą́ʼgóó chʼil deílʼáágóó daʼałchozh doo.
15 Tʼáá shí shidibé baa áháshyą́ą doo; tʼáá shí nábinishjah doo, ní Bóhólníihii Diyin God.
16 Yóóʼádahaaskaii hadínéeshtaał; tʼą́ą́ʼ anáhaazhjéeʼii nináhideeshʼish, nidaʼniłhodii dadiniihgóó bá bikʼídaʼdideesdis, doo bitah dahwiináanii bitah dahółdzilgo áńdadeeshdlííł, nidi daneeskʼahii áádóó dabidziilii áhodeeshdįįł; hainíshtʼínígíí bee haʼdeestsoł.
17 Bóhólníihii Diyin God kóní, Nihí shilı̨́ı̨́ʼ nohłı̨́įgo dah wohkahii éí alı̨́ı̨́ʼ ałʼąą átʼéii bił ałtsʼánihideeshniłgo nihainíshtʼı̨́į doo: deenástsʼaaʼ áádóó tłʼízíchǫǫh éí ałʼąą átʼéego beiníshtʼı̨́į doo.
18 Yáʼáhootʼéehgi daʼołchozhgo tʼįįhdígo átʼé danohsingóósh łahjįʼ tʼóó bikʼi naahkaigo áádóó łahjįʼ éí daołchozhgo chʼil yílʼáagi naohkai áádóó tó niłtólígíí daohdlą́ągo índa łahjįʼ éí tʼóó biiʼ naahkaigo tááchxąąʼgo ádaohłaa?
19 Chʼil tʼóó bikʼi nisoohkaii shidibé deiłchozh, áádóó tó tááchxąąʼgo ádaohłaii shidibé deidlą́.
20 Éí bąą Bóhólníihii Diyin God kóhodííniid, Shoo, tʼáá shí alı̨́ı̨́ʼ neeskʼahii áádóó alı̨́ı̨́ʼ bitsʼiinígíí baa nídéeshtʼįįł.
21 Háálá nooshkʼiizh áádóó niwos bee doo bitah dahółdzilii tʼáá ałtso nahjįʼ abíhíníyilii biniinaa áádóó doo bitah dahółdzilii tʼáá ałtso nideeʼ bee nahjįʼ abídziyínígoʼgo naa taozhjéeʼii biniinaa
22 shidibé naakaígíí yisdádeeshnił; bił diʼdoodiłgo dooghałígíí doo náádandlı̨́į da doo, áko alı̨́ı̨́ʼ tʼáá ałʼąą ádaatʼéii beiníshtʼı̨́į doo.
23 Áádóó shá naalʼaʼí David éí tʼááłáʼí dibé yaa áhályáanii nilı̨́įgo baa áhályą́ągo ádeeshłííł; éí baʼałtsoʼgo baa áhályą́ą doo.
24 Shí Bóhólníihii nishłíinii éí biDiyin God nishłı̨́į doo; shá naalʼaʼí David éí hatahgi naatʼáanii nilı̨́į doo; shí Bóhólníihii nishłı̨́įgo kótʼéego haasdzííʼ.
25 Áádóó bee achʼįʼ hózhǫ́ǫ́jí bee ahaʼdeetʼáanii éí hoł hashtʼedeeshłííł áádóó honoojíígóó tʼáadoo beinítʼíní kéédahatʼı̨́į doo índa tsiyiʼgóó hashtʼedadítʼéego daʼałhosh dooleełígíí biniyé naaldlooshii dahashkéii tʼáá ałtso nahgóó hadínéeshkał.
26 Áádóó shidah yiskʼid binaagóó tʼáá bił hakʼizhdeeshdliił; baa náhwiilzhíishgo hwee nináháłtı̨́įhgo íínísin doo; éí bee hakʼihojidlíigo nahałtinígíí átʼée doo.
27 Tsin deílʼáhígíí éí bineestʼąʼ bąąh nídahoodleeł doo, nahasdzáán éí bitsʼą́ą́dóó nínádaʼntʼı̨́įh doo áádóó bikéyahgi háádę́ęʼda doo baa hwiinítʼı̨́ı̨́góó nidaʼntʼąʼ doo; hazéédadéetání há nidahátiʼgo índa anaʼí dahasnáago binaaʼnil dajílíinii bighááhonishʼnilgo, áko índa Bóhólníihii nishłı̨́įgo hoł béédahodoozįįł.
28 Ałʼąą dineʼé doo hoł nináádahadeeł da doo; naaldlooshii dahashkéii doo náádahaldeeł da doo; tʼáadoo hainítʼínígóó tsʼídá yáʼátʼéehgo kééhojitʼı̨́į doo áádóó háádę́ęʼda doo łaʼ hayahodidoołyis da.
29 Éí kéyahdi doo dichin náádahodoogą́ął daígíí biniyé kéyah bikááʼgóó nidaʼntʼąʼgo bee hwééhodílzingo ádeeshłííł áádóó ałʼąą dineʼé hándahałtʼiʼii doo bikʼee tiʼnáádahojooʼníih da dooleeł.
30 Áko shí Bóhólníihii Diyin God nishłíinii hoł honishłǫ́ǫgo áádóó hó Ízrel dineʼé dajílíinii shidineʼé dajílı̨́įgo hoł béédahózin doo, ní Bóhólníihii Diyin God.
31 Shichʼil yílʼáagi dibé naakaígíí shidibé danohłínígíí éí diné danohłı̨́, áko nihiDiyin God nishłı̨́, ní Bóhólníihii Diyin God.
