Galatians 3:1-29
3 Galéíshiyadi oodlání danohłíinii, haʼátʼíí lá yówééh átʼéego doo ádahosoołyąąd da lá! Tsin ałnáoszid bąąhjįʼ Jesus Christ bił oʼoolkaalígíí tʼáadoo bahatʼaadí nihinááł baa hóóneʼ nidi, háí lá nihíniʼ nideizgizgo naʼnitin tʼáá aaníinii doo bikʼeh dahonołʼı̨́į da dasoolı̨́ı̨́ʼ?
2 Haaʼíshąʼ díí tʼéiyá bínanihídídéeshkił: Daʼ Jew dineʼé bibee hazʼáanii bikʼeh dahonołʼínígíísh binahjįʼ Níłchʼi Diyinii nihee dahazlı̨́ı̨́ʼ, éí doodago haneʼ yáʼátʼéehii dadoohtsʼaʼgo deinohdlánígíísh binahjįʼ nihee dahazlı̨́ı̨́ʼ?
3 Haʼátʼíí lá yówééh átʼéego doo ádahosoołyąąd da! Daʼ Níłchʼi Diyinii bee nínáádanihiʼdizhchı̨́įgo dahisidoonaadgo kʼadísh éí bee hazʼáanii bikʼeh hólʼı̨́ bee hadaałtʼé ídaʼdołnééh lá?
4 Łą́ą́góósh tʼáadoo biniyéhígóó tiʼdahwiisooniiʼ? Tʼáá aaníí tʼáadoo biniyéhígóogo ákótʼé!
5 Éí bąą Diyin God éí Níłchʼi Diyinii nihiiʼ hólǫ́ǫgo ánihósinii, áádóó nihitahgóó álílee kʼehgo ádahooníiłii yaa naagháii éí bee hazʼáanii bikʼeh dahonołʼíinii daatsʼí yinahjįʼ átʼı̨́? Éí doodago haneʼ yáʼátʼéehii dadoohtsʼaʼgo deinohdlánígíí daatsʼí yinahjįʼ átʼı̨́?
6 Éíbraham éí Diyin God joosdląąd, áko tʼáá ákogi átʼéii jílı̨́įgo há haadzííʼ.
7 Éí bąą díí baa ákodanoosįįh: diné éí Diyin God yaa dadzólíhígíí tʼáá ałtso Éíbraham baʼáłchíní danilı̨́.
8 Náás hoolzhishgóó doo Jew dineʼé danilíinii biʼoodląʼ bee tsʼídá tʼáá ákogi átʼéego Diyin God bá hadoodzihgo tʼáá átséedi Diyin God bizaad bee akʼeʼashchíinii bee bééhoozin. Jó, tʼáá átséedi Diyin God bizaad bee akʼeʼashchíinii biyiʼdóó haneʼ yáʼátʼéehii bee Éíbraham yił hoolneʼgo kóní, Ałʼąą dineʼé tʼáá ałtso ninahjįʼ bikʼihozhdoodliił.
9 Áko Éíbraham éí Diyin God yoosdląądgo bikʼihojidlíhígi átʼéego Diyin God dayoodlánígíí tʼáá ałtso bikʼidahojidlí.
10 Nidi bee hazʼáanii Mózes baa deetʼáanii bikʼeh dahoniilʼı̨́įgo tʼéí bee yisdádahidiikah dajinínígíí éí atídahodiʼdoolníiłgo há haʼoodzííʼ. Háálá Diyin God bizaad bee akʼeʼashchíinii kóní,
Bee hazʼáanii biyiʼ bee akʼeʼashchíinii tʼáá ałtso doo bikʼeh ádajítʼéiiáádóó doo bikʼeh ádajooníiłii atídahodiʼdoolníiłgo há haʼoodzííʼ.
11 Áko tʼáadoo bahatʼaadí bee hazʼáanii yikʼeh hółʼíinii binahjįʼ diné doo łaʼda tsʼídá tʼáá ákogi átʼéego Diyin God bá hadoodzih da, háálá Diyin God bizaad bee akʼeʼashchíinii ání, Tsʼídá tʼáá ákogi ájítʼéii hweʼoodląʼ bee aʼódlí bee jiináa doo.*
12 Nidi bee hazʼáanii éí oodlą́ doo yił ółtaʼ da, háálá kóní, Bee hazʼáanii biʼjiłʼíinii tʼáá éí bee jiináa doo.
13 Bee hazʼáanii bee hóyéeʼjįʼ nihá haʼoodzííʼ yę́ę bitsʼą́ąjįʼ Christ náánihiisniiʼgo éí nihá haʼoodzíiʼii Christ bikʼijįʼ silı̨́ı̨́ʼ, háálá Diyin God bizaad bee akʼeʼashchíinii ání, Tʼááłáʼí jinítínígo tsin bąąhjįʼ nijiyííłtínígíí hóyéeʼjįʼ há hadaʼiisdzííʼ.
14 Éí Jesus Christ átʼı̨́, éí binahjįʼ Éíbraham bee bikʼihodzisdliʼii doo Jew dineʼé danilíinii bee dahodooleeł, áko Jesus Christ deiniidlą́ągo baa dadzííníidlíhígíí bee Diyin God yee nihá nihoníʼáanii Níłchʼi Diyinii nihiih dahwiileeh.
Bee hazʼáanii Diyin God éí Mózes yeidiníʼáanii áádóó Diyin God biYeʼ doogáałgo yee haadzíiʼii
15 Shikʼisóó, diné ájooníłígíí binahjįʼ nihił ííshją́ą́ áháshłééh: diné łaʼda haʼátʼíhída nidizhníʼą́ągo bee lą́ azlı̨́ı̨́ʼdóó bikʼijįʼ diné náánáłaʼ doo hatsʼą́ą́ʼ kʼééʼiidoołchxǫǫł da, doo nidi saad łaʼ há yínéidooʼáał da.
16 Jó, Diyin God yee nihwiizʼáanii éí Éíbraham índa bitsʼą́ą́dóó yizhchíinii yá haadzííʼ. Áko, Nitsʼą́ą́dóó dayíchíihii ląʼígo, doo níi da, nidi, Nitsʼą́ą́dóó yizhchíinii, níigo tʼááłáʼí yeinítʼínígíí éí Christ ááhyiłní.
17 Díí ááhdishní: bidziilgo Christ bee ahaʼdeetʼáanii Diyin God tʼáá íídą́ą́ʼ yee lą́ asłı̨́įʼii, dı̨́įdi neeznádiindóó baʼaan tádiin nááhaidóó bikʼijįʼ bee hazʼáanii Mózes yeidiníʼáanii doo łahgo ánéidoodlíił da, áko éí yee nihwiizʼáanii doo tʼáadoo nídoodleełí da.
18 Háálá Éíbraham bííʼ dooleełii éí bee hazʼáanii bikʼeh hólʼínígíí binahjįʼ hwee nidahwiileehgo, Diyin God éí Éíbraham yá yee nihoníʼáanii doo binahjįʼ da doo nítʼééʼ. Nidi yá yee nihoníʼáanii binahjįʼ baa deetʼą́.
19 Ákoshąʼ haʼátʼíí biniyé Jew dineʼé bee hazʼáanii bá ályaa? Ádił nidaʼiilzíihii ádaa ákodadínóodzįįł biniyé doochíiłii aa deetʼánígíí yizhchı̨́įjįʼ* há ályaa. Áko díí bee hazʼáanii Diyin God éí diyingo nidaalʼaʼí binahjįʼ Jew dineʼé yá sizíinii* baa deetʼą́.
20 Nizhdiltʼéego tʼéiyá hataʼ sizínígíí hólǫ́ǫ doo. Jó nidi Diyin God éí tʼááłáʼí.
Bee hazʼáanii biniyé átʼéii
21 Áko daatsʼí bee hazʼáanii éí Diyin God yee nihoníʼáanii yikʼijįʼ naalnish? Tsʼídá dooda lą́ą! Háálá bee hazʼáanii hinááh ádaʼaleʼ dooleełígíí nihaa yílyáago, tsʼídá tʼáá ákogi éʼétʼéego óʼoolíił doo nítʼééʼ.
22 Nidi Diyin God bizaad bee akʼeʼashchíinii áníigo tʼáá ádzíłtso bąąhági átʼéii biyaa nazhnideeh, éí bąą Jesus Christ dajoodląąhgo tʼéiyá Diyin God yee nihoníʼáanii hwee dahodooleeł.
23 Nidi Christ deidiidląąłígíí tʼah doo yichííhdą́ą́ʼ bee hazʼáanii nihee ádíhólnííh nítʼééʼ. Nihidaʼoodląʼ bee yisdánihidiʼdooʼniłígíí yitʼíní áyiilaajįʼ nihee ádíhólnííh nítʼééʼ.
24 Niheʼoodląʼ bee tsʼídá tʼáá ákogi ádaniitʼéego Diyin God nihá hadoodzih biniyé Christ níyáago bee hazʼáanii biyaa háánihooʼniljįʼ biyaa siiʼnil nítʼééʼ.
25 Nidi kʼad Christ deiniidlą́ągo bee hazʼáanii doo nihee ádíhólníih da.
26 Háálá Christ Jesus deinohdlánígíí bee tʼáá ánółtso Diyin God baʼáłchíní danohłı̨́.
27 Háálá nohłąʼí Christ bił łáʼí soolı̨́įʼgo tó bee danihiʼdoolzı̨́ʼígíí Christ bee hadadoohdzaago tʼáá binoołtʼé dasoolı̨́ı̨́ʼ.
28 Éí bąą Jew dineʼé índa Gríik dineʼé nohłíinii doo ałʼąą ádanohtʼée da; naalteʼ índa doo naalteʼ nohłíinii doo ałʼąą ádanohtʼée da; bikąʼii índa biʼáadii nohłíinii doo ałʼąą ádanohtʼée da, háálá tʼáá ánółtso Christ Jesus bee łáʼí nohłı̨́.
29 Áko Christ bííʼ danohłı̨́įgo Éíbraham baʼáłchíní danohłı̨́, áko Éíbraham baa deetʼáanii danihí.
Footnotes
^ Éí doodago kótʼé, Hweʼoodląʼ bee aʼódlí bee tsʼídá tʼáá ákogi ájítʼéii éí jiináa doo. Hab. 2:4.
^ Éí Jesus yizhchı̨́įjįʼ ááhyiłní.
^ Yá sizíinii níigo éí Mózes ááhyiłní.
