Galatians 4:1-31
4 Díí ááhdishní: hashchíinii bee hólóonii hóóʼ dooleełígíí tʼah doo baazniséégóó naalteʼ nilíinii doo tʼah biláhígo ájítʼée da, azhą́ hashchíinii bee hólóonii tʼáá átʼé hóóʼ nidi.
2 Aa ádahalyáanii índa naalyeʼé yaa ádahalyáanii hwee ádídahólnííh, hazhéʼé bee hólóonii łaʼa jı̨́ ałtso hwííʼ dooleełgo yee nihoníʼáanii baa nizhnísą́ąjįʼ.
3 Tʼáá ákótʼéego nihí ałdóʼ áłchínígi ádaniitʼéego Diyin God yee nihoníʼáanii tʼah doo bikʼidaʼdiitįįh yę́ędą́ą́ʼ nahadlá áłtsé bee nidanihidiʼneestą́ąʼii binaalteʼ daniidlı̨́ı̨́ nítʼééʼ.
4 Nidi tsʼídá baa hoolzhiizhgo Diyin God biYeʼ yiníłʼaʼ, éí asdzání bishchı̨́, áádóó yizhchı̨́įgo bee hazʼáanii yikʼeh hółʼı̨́įgo hináá nítʼééʼ.
5 Bee hazʼáanii dah dabiistłʼóonii nááhizhdoołnih biniyé, áádóó nihí éí Diyin God tʼáá bí baʼáłchíní daniidlı̨́į doo biniyé biʼdizhchı̨́.
6 Áádóó baʼáłchíní danohłínígíí bąą Diyin God éí haYeʼ biNíłchʼi Diyinii nihijéí yiih yiyííłʼaʼgo, Ába,* aTaaʼ, níigo náʼookąąh.
7 Éí bąą kʼad doo naalteʼ nílı̨́į da, nidi Diyin God baʼáłchíní nílı̨́. Áko baʼáłchíní nílı̨́įgo Christ binahjįʼ Diyin God yee akʼijidlíii nííʼ nilı̨́.
Daʼoodlání Galéíshiyadi kéédahatʼíinii Paul yąąh bíniʼ
8 Tʼah nagháí yę́ędi Diyin God doo béédahonohsin da yę́ędą́ą́ʼ, haʼátʼíhída doo diyin danilíinii bichʼįʼ nidahohłáá nítʼéʼígíí éí binaalteʼ danohłı̨́ı̨́ nítʼééʼ.
9 Nidi kʼad Diyin God béédahosoosįįd, doodaiiʼ Diyin God bídę́ęʼgo agháago nihééhoosįįdgo, haʼátʼéego lá nahadlá átsé bee nidanihidiʼneestą́ąʼii éí doo bee adziil da nidi, áádóó tʼáadoo nánídlíní da nidi bichʼįʼ tʼą́ą́ʼ dah nídaahkah lá? Éí binaalteʼ nídadiidleeł daatsʼí danohsin?
10 Jó yoołkáłígíí, áádóó nídahidizíidii, áádóó dahwéelzhíishiida índa nináháháahiida nihił dadiyingo ádeínóhsin lá!
11 Tʼáadoo yeeʼ ałdóʼ biniyéhígóó nihinshishnish yíshłí nisingo bąąh shíniʼ.
12 Shikʼisóó danohłíinii, áníshtʼéhígi ádanohtʼée dooleełígíí baa nánihooshkąąh, háálá shí ałdóʼ ádanohtʼéhígi áníshtʼé. Doo shichʼįʼ bąąhági ádaahdzaa da.
13 Shąąh dah hazʼánígíí biniinaa áłtséedi haneʼ yáʼátʼéehii bee nihił hweeshneʼígíí nihił béédahózin.
14 Azhą́ shąąh dah hazʼánígíí bee nanihíhodiʼnitaah, nidi tʼáadoo doo dashisooʼįįd da, tʼáadoo doo dashinoozı̨́įʼ da, nidi tʼáá Christ Jesus danoozı̨́ı̨́ʼ yę́ęgi átʼéego Diyin God bidiyingo naalʼaʼí nishłı̨́ nahalingo dashinoozı̨́ı̨́ʼ.
15 Íídą́ą́ʼ nihił dahóózhǫǫdígíishąʼ háájí silı̨́ı̨́ʼ? Háálá íídą́ą́ʼ nihá shił bééhózingo nihaa hashneʼ, bohónéedzą́ą́ ládą́ą́ʼ nihinááʼ nidi hadadoohniłgo shaa dadoohnił nítʼééʼ!
16 Daʼ ákoósh tʼáá aaníinii bee nihił hashneʼígíí biniinaa nihiʼanaʼí sélı̨́ı̨́ʼ?
17 Diné ayóogo nihídaneedlínígíí doo nihá yáʼátʼéehii biniyé tʼóó ádahodilʼı̨́įgo nihídaneedlı̨́. Tʼáá sahdii shitsʼąą nidanihiinilgo nihígo agháago danihidzíistsʼą́ąʼ doo danihóʼní.
18 Jó, nihá yáʼátʼéehii biniyé áłahjįʼ ayóogo nihídaneedlínígíí yáʼátʼééh, aadi naasháago, doo aadi naasháa da nidi.
19 Shaʼáłchíní yázhí, Christ átʼéhígi ádanohtʼée dooleełjįʼ amá awééʼ bídiiʼnaʼígi átʼéego nihá tiʼhooshníihgo hoolzhish.
20 Kʼad aadi nihił honishłǫ́ǫ laanaa nisin, áko łahgo átʼéego nihichʼįʼ hahasdziih doo nítʼééʼ, háálá shí nihá nitseeshdá!
Héígar áádóó Sarah binahjįʼ haneʼ bee akʼidiʼdootı̨́įłii
21 Jew dineʼé bibee hazʼáanii nihee ádíhólnííh danohsinii, bee hazʼáanii ánínígíí dasidootsʼą́ą́ʼ.
22 Éíbraham biyeʼké naaki nítʼééʼ, biyeʼ łaʼ éí asdzání naalteʼ nilínígíí bishchı̨́, biyeʼ łaʼígíí éí asdzání doo naalteʼ nilíinii bishchı̨́, níigo bee akʼeʼashchı̨́.
23 Asdzání naalteʼ nilínígíí biyáázh éí tʼáá atsʼíís kʼehgo jishchı̨́, nidi asdzání doo naalteʼ nilínígíí éí biyáázh Diyin God éí Éíbraham yee yá nihoníʼáanii bikʼehgo jishchı̨́.
24 Áko díí haneʼ chʼíníʼánígíí bee akʼidiʼdootı̨́įłii átʼé. Jó, díí asdzání naakiígíí éí bee ahaʼdeetʼáanii naakiígíí yaa halneʼ. Łaʼ éí Héígar, Dził Sáínaidę́ę́ʼ bee ahaʼdeetʼáanii yaa halneʼ, éí naalteʼ danilı̨́į doo biniyé áhoolchííł.
25 Díí asdzání Héígar wolyéhígíí, éí Aréíbiyadi Dził Sáínai siʼánígíí yaa halneʼ; tʼáá éí asdzání kʼad Jerúsalemgi hazʼánígíí yaa halneʼ. Éí baʼáłchíní tʼáá yił naalteʼ danilı̨́.
26 Nidi Jerúsalem wódahdi hólónígíí éí doo naalteʼ nilı̨́į da, éí nihimá nilı̨́.
27 Háálá Diyin God bizaad bee akʼeʼashchíinii ání:
Asdzání, naʼáłchíní tʼáadoo hazlı̨́įʼii, nił hózhǫ́ǫ leʼ,doo iʼniiltsąąhii awééʼ doo bídiiʼnéehii, nił hózhǫ́ǫgo dílwosh,háálá asdzání doo ałchíi daígíí asdzání bahastiin yee baʼáłchíní hólóonii biláahgo haʼáłchíní hodooleeł.
28 Kʼad lą́ą, shikʼisóó, Diyin God aidiníʼánígíí binahjįʼ Áízak éí Éíbraham biyeʼ nilínígi átʼéego nihí ałdóʼ Diyin God aidiníʼánígíí binahjįʼ tʼáá bí baʼáłchíní daniidlı̨́.
29 Íídą́ą́ʼ tʼáá atsʼíís kʼehgo yizhchíinii éí Níłchʼi Diyinii kʼehgo yizhchíinii atíyiilaa yę́ęgi átʼéego kʼad ałdóʼ tʼáá ákótʼé.
30 Nidi Diyin God bizaad bee akʼeʼashchíiniishąʼ haʼátʼíí ní?
Asdzání naalteʼ nilíinii biyáázh tʼáá bił chʼíninołchééh,háálá asdzání naalteʼ nilíinii biyáázh éí asdzání doo naalteʼ nilíinii biyáázh bííʼ dooleełii doo bił ałtsʼą́ą́ʼ ajíłkʼiiz da doo, ní.
31 Éí bąą, shikʼisóó, asdzání naalteʼ nilíinii doo baʼáłchíní daniidlı̨́į da, nidi asdzání doo naalteʼ nilíinii baʼáłchíní daniidlı̨́.
Footnotes
^ Ába, jiníigo éí Hííbrew bizaad kʼehgo, Shizhéʼé nílíinii, jiníigo óolyé.
