Genesis 15:1-21
15 Díí bikʼijįʼ Éíbram bił áhoodzaago Bóhólníihii bizaad yidiiztsʼą́ąʼgo ání, Tʼáadoo nił yéʼí, Éíbram; shí ninaageʼ nishłı̨́, índa ayóó átʼéego nichʼįʼ nináʼdoodléełii nishłı̨́.
2 Áko Éíbram ázhdííniid, ShiBóhólniihii Diyin God, shaʼáłchíní tʼah doo haleehgóó haʼátʼíí lá shaa nílé? Áko shee hólóonii Damáskasdóó Eliyíízer nilíinii bííʼ dooleeł.
3 Áádóó Éíbram ádííniid, Shoo, áłchíní tʼáadoo shéínínil da, áko shighangi yizhchínígíí tʼéiyá shee hólóonii bííʼ dooleeł.
4 Áádóó jóʼakon, Bóhólníihii bizaad náázdiiztsʼą́ąʼgo ánááhodooʼniid, Díí doo hóóʼ dooleeł da; tʼáá ni niyeʼ bííʼ dooleeł.
5 Áádóó hoł chʼíníʼáazhgo áháłní, Níléí góde yádiłhił biyiʼgóó díníʼı̨́ı̨́ʼ; sǫʼ yíníłtaʼ; bíninilʼą́ągo yíníłtaʼ, áádóó ánááhodooʼniid, Ákótʼéego naʼáłchíní náás daʼahílchíihii ákónéelą́ą́ʼ dooleeł.
6 Áko Bóhólníihii joosdląąd, áko tʼáá ákogi ájítʼéego há haadzííʼ.
7 Áko áhodííniid, Shí Bóhólníihii áshtʼı̨́; Er kin haalʼáii éí Kaldíya dineʼé bikéyahdę́ę́ʼ nił chʼíníʼáázh, áko díí kéyahígíí naa dideeshʼááł.
8 Áádóó ázhdííniid, Bóhólníihii Diyin God nílíinii, haʼátʼéegoshąʼ éí shił bééhodoozįįłgo shííʼ dooleeł?
9 Áko ánááhodooʼniid, Béégashii biʼáadii tááʼ binááhaígíí índa tłʼízí biʼáadii tááʼ binááhaígíí ałdóʼ, deenástsʼaaʼ tááʼ binááhaígíí ałdóʼ, hasbídí ałdóʼ, hasbídí łigaii biyázhí ałdóʼ shá nídidíínił.
10 Áko díidíígíí tʼáá ałtso baazhnínil, áko ałnííʼ gónaa ałtsʼáyiizhgizhgo ałtsʼą́ąjįʼ niyiiznil; tsídii éí tʼáadoo ałtsʼáinígizh da.
11 Áko tsídii daʼalghałii atsįʼ siniljįʼ anájahgo Éíbram éí nahgóó anéiniłkaʼ nítʼééʼ.
12 Áko jı̨́honaaʼéí bikáʼájįʼ ííyáago Éíbram tʼáá íiyisí hoʼdiilghaazh, áko tʼóó báhádzidgo hakʼijįʼ chahóółhéél.
13 Áko Bóhólníihii éí Éíbram áyidííniid, Tʼáadoo naaki nilíní nił bééhoozįįh; naʼáłchíní náás daʼahílchíihii déʼéyóní danilı̨́įgo kéyah tʼáadoo daabíiʼii yiyiʼdi nidaalʼaʼ doo; atídabiʼdilʼı̨́įgo dı̨́įdi neeznádiin nídoohah,
14 áádóó éí dineʼé danilíinii binaalteʼ dajílı̨́į dooleełígíí baa nídéeshtʼįįł, áádóó bikʼijįʼ tʼáá íiyisí daʼjitʼı̨́įgo chʼízhdoonééł.
15 Áko ni tʼéí nił hózhǫ́ǫgo danizhéʼé yę́ę bichʼįʼ díínááł; są́ niisxı̨́įgo łeeh nidiʼdooltééł.
16 Nidi dı̨́įdi są́ náʼoogą́ąʼgo kweʼé nináhidookah, háálá Ámor dineʼé doo ákwii átʼéii tʼah doo bide ánéeh da.
17 Áádóó ákódzaago iʼííʼą́ągo chahóółhéél, áádóó jóʼakon, ásaaʼ biiʼ déédíljahígíí biyiʼdę́ę́ʼ łidgo áádóó honooyééł diltłiʼii atsįʼ ałtsʼádaasʼnilígíí bitaʼgóó hadiildoh.
18 Tʼáá éí bijı̨́ı̨́dą́ą́ʼ Bóhólníihii kóníigo Éíbram yił ahaʼdeetʼą́, Naʼáłchíní náás daʼahílchíihii díí kéyah Ííjip tooh nílínídóó ayóó átʼé Yufréítiiz tooh nílíníjįʼ baa diníʼą́:
19 Kííni dineʼé áádóó Kííniz dineʼé áádóó Kádmon dineʼé
20 áádóó Het dineʼé áádóó Píírez dineʼé áádóó Ríífem dineʼé
21 áádóó Ámor dineʼé áádóó Kéínan dineʼé áádóó Gírgas dineʼé índa Jííbas dineʼé, díí tʼáá ałtso dabikéyah nítʼééʼ.
