Genesis 30:1-43
30 Áko Réíchel éí Jéíkab doo bá ajiłchíígóó hádí joołchʼı̨́ı̨́d, áko Jéíkab ábijiní, Áłchíní łaʼ shaa nínííł, doodago éí dadeestsaał.
2 Áko Jéíkab éí Réíchel bichʼįʼ hashkézniidzı̨́įʼgo ázhdííniid, Daʼ shíísh Diyin God sizínígi sézı̨́įgo doo íłchíígóó ániishłaa?
3 Áko Réíchel ádííniid, Shoo, shá naalʼaʼí Bílhah bił yah aninááh, áko azhdoołchíiłgo honiiłtʼaa shaʼáłchíní hodooleeł.
4 Áádóó há naalʼaʼí Bílhah hweʼasdzą́ą́ dooleeł biniyé haazhníłtı̨́, áko Jéíkab hoł yah ííyá.
5 Áko Bílhah iʼniiltsąądgo ashkii Jéíkab yá yishchı̨́.
6 Áádóó Réíchel ádííniid, Diyin God shá yaa nástʼįįd, áádóó shidiiztsʼą́ąʼgo shiyáázh sheiníłtı̨́; díí bąą ashkii éí Dan bee jíízhiʼ.
7 Réíchel bá naalʼaʼí Bílhah inááʼniiltsąądgo Jéíkab bá ashkii náájíshchı̨́.
8 Áko Réíchel ánáádooʼniid, Ayóó átʼéego shádí bił ahaa naashtʼaashgo baa honíłná, áko ashkii éí Náftalai bee jíízhiʼ.
9 Áko Líyah doo nááʼjílchíígóó haʼízhʼdeelʼı̨́ı̨́ʼ, áko há naalʼaʼí Zílpah éí Jéíkab beʼasdzą́ą́ dooleeł biniyé baazhníłtı̨́.
10 Áádóó Líyah bá naalʼaʼí Zílpah éí Jéíkab yá ashkii yishchı̨́.
11 Líyah ádííniid, Shichʼohasneʼ! Éí bąą ashkii éí Géed bee jíízhiʼ.
12 Áko Líyah bá naalʼaʼí Zílpah éí Jéíkab bá ashkii náájíshchı̨́.
13 Líyah ánáádooʼniid, Shił hózhǫ́! Háálá diné dabitsiʼ éí bikʼihojidlíii dashiłníi doo, áko ashkii éí Ásher bee jíízhiʼ.
14 Áádóó tłʼoh naadą́ą́ʼ ádaalneʼjįʼ ayííłką́ągo Rúben halgaigóó ííyá, áko chʼil bichʼįʼ niʼiichíhígíí yikʼíníyáago bimá Líyah yá néiníłjool, ákohgo Réíchel éí Líyah áyidííniid, Tʼáá shǫǫdí niyáázh chʼil néiníłjoolígíí łaʼ shaa níłjooł.
15 Líyah áhodííniid, Daʼ shahastiin shitsʼąą naníʼaahígíísh tʼįįhdígo íínítʼįįdgo baa nitsíníkees? Daʼ ákoósh shiyáázh bichʼil dah náádidííłjoł? Áko Réíchel ádííniid, Niyáázh bichʼil shaa níłjooł, áko díí tłʼééʼ Jéíkab nił dízhnóotish.
16 Áádóó iʼííʼą́ągo Jéíkab dáʼákʼehdę́ę́ʼ náádáałgo Líyah chʼíníyáago hadááh níyá, áko ádííniid, Tʼáá shił yah adíínáłí, háálá shiyáázh bichʼil bikʼé niníłjool. Áko tʼáá éí bitłʼééʼ hoł jineezhtéézh.
17 Áko Líyah ázhdííniidígíí Diyin God yidiiztsʼą́ąʼgo izhʼniiltsąąd, áádóó Jéíkab bá ashkii náájíshchı̨́; éí bił ashdladi ajishchı̨́.
18 Áko Líyah ání, Shá naalʼaʼí shahastiin baa níłtı̨́įgo bąą Diyin God shichʼįʼ naʼnílá, áko ashkii éí Ísakar bee jíízhiʼ.
19 Nááʼáłdóʼ Líyah inááʼniiltsąądgo Jéíkab bá ashkii náájíshchı̨́; éí bił hastą́ądi ajishchı̨́.
20 Áko Líyah ání, Diyin God éí aa yílyáii shá áyiilaa; kʼad shahastiin shił sikée doo, háálá biyeʼ hastą́ą́h bá shéłchı̨́, áko ashkii éí Zébyulan bee jíízhiʼ.
21 Áádóó bikʼijįʼ hachʼéʼé jishchı̨́įgo atʼééd éí Dáínah bee jíízhiʼ.
22 Áko índa Diyin God éí Réíchel yénáálniiʼ, áádóó Diyin God hodiiztsʼą́ąʼgo jooltsą́ągo áhoolaa.
23 Áko Réíchel izhʼniiltsąądgo ashkii jishchı̨́, áádóó ájíní, Doo ił nishłı̨́į da yę́ę Diyin God shitsʼáidiníʼą́;
24 ashkii éí Jóseph* bee jíízhiʼgo ájíní, Bóhólníihii bíniʼdii shiyáázh łaʼ shaa nááyółtééł.
Léíban éí Jéíkab yikʼé nidoolnishígíí yił ahaʼdeetʼą́
25 Ákódzaago Réíchel hayáázh Jóseph jishchı̨́įgo Jéíkab éí Léíban áyidííniid, Kééhashtʼı̨́ı̨́ nítʼéʼígóó shikéyahgóó nídeeshdleeł biniyé nihééshidííłʼaał.
26 Shaʼákéí índa shaʼáłchíní bideená ná nishishnish nítʼéʼígíí shaa nínííł, áko shíniʼ dah diishnééh, háálá ná nishishnishígíí nił bééhózin.
27 Nidi Léíban áháłní, Shichʼohaʼnéego shaa nitsíníkees ládą́ą́ʼ tʼáá shǫǫdí tʼáá kǫ́ǫ́ sínídá, háálá ląʼígóó shił niʼééhwiizįįdgo niniitʼaa Bóhólníihii shikʼijidlíigo shił bééhoozin.
28 Díkwíishąʼ bikʼé nanilnish doo éí bee shił hólneʼ, ákohgo nichʼįʼ niʼiishłée doo.
29 Áko ábizhdííniid, Nił bééhózingo ná choisíʼįįd, áádóó nilı̨́ı̨́ʼ baa áháshyą́ą́ nítʼééʼ.
30 Tʼah doo naa nishááhdą́ą́ʼ nilı̨́ı̨́ʼ áłchʼı̨́ı̨́dí yeeʼ nítʼééʼ, áko kʼad tʼóó ahayóí silı̨́ı̨́ʼ; naa níyáádóó índa Bóhólníihii nikʼijidlíigo hodideeshzhiizh, ákohgo hahgoshąʼ shaʼáłchíní daabí dooleełígíí nabikʼítsískees doo? jidííniid.
31 Áko ánáádooʼniid, Haʼátʼíishąʼ naa deeshłééł? Jéíkab ání, Doo haʼátʼíhída shaa dííléeł da; tʼóó kóshidíílíiłgo nilı̨́ı̨́ʼ ná ninááníshkaad doo índa baa áháshyą́ą doo.
32 Díí jı̨́ nilı̨́ı̨́ʼ bitahgóó deesháałgo áádę́ę́ʼ dibé daastłʼinígíí áádóó daalkizhígíí atsʼádeeshʼnił, áádóó dibé bitahdę́ę́ʼ dibéłchíʼí tʼáá ałtso, áádóó tłʼízí bitahdę́ę́ʼ tłʼízí daalkizhígíí índa daastłʼinígíí atsʼádeeshʼniłgo éí bikʼé ná naashnish doo.
33 Baa hoolzhiizhgo shichʼįʼ nidííléłígíí biniyé yíníyáago shaʼátʼeʼ ádingo nił bééhodoozįįł. Tłʼízí bitahdę́ę́ʼ tłʼízí doo daastłʼinígíí áádóó doo daalkizhígíí tʼáá ałtso índa dibé bitahdę́ę́ʼ doo dibéłchíʼígi ádaatʼéhígíí łaʼ shilı̨́ı̨́ʼ bitah yiniłtsą́ągo ííshją́ą́ neestʼı̨́įʼii ádaatʼée doo.
34 Áádóó Léíban ání, Shił tʼáá áko, tʼáá ádííníniidígi átʼée doo.
35 Ákohgo tʼáá éí bijı̨́ Léíban éí tłʼízíkąʼ danoodǫ́zígíí áádóó daalkizhígíí áádóó tłʼízí dabiʼáadii daalkizhígíí áádóó daastłʼinígíí tʼáá ałtso tʼáá haitʼéegoda dah daalgaígíí tʼáá ałtso, índa dibé bitahdę́ę́ʼ dibéłchíʼí tʼáá ałtso hayeʼké éí yaa ádahalyą́ą dooleełgo bá atsʼázhʼnínil,
36 áádóó tágí jı̨́ oodááł bíighah ánízáágóó Jéíkab bitsʼádzískai, áádóó Léíban bilı̨́ı̨́ʼ łahjįʼígíí éí tʼáá ákǫ́ǫ́ Jéíkab há yaa áhályą́.
37 Ákódzaago Jéíkab éí tʼiis áádóó tsin héízel wolyéii índa chésnat wolyéii bitsʼáozʼaʼ daditłéʼígíí néidiinilgo náhineeskʼęęʼgo yídayíízǫ́ǫzgo łigaigo noodǫ́ǫzgo áyiilaa.
38 Áko tsin bídzíízǫ́ǫzgo noodǫ́ǫzgo ájiilaaígíí dibé yiiʼ daʼadlánígíí biyiʼgi adadziztsih, áko dibé daʼadlą́ągo adadíʼnóoltsąął dzinízingo ájítʼı̨́.
39 Áko dibé índa tłʼízí ałdóʼ tsin yidááhdóó adaʼniiltsąąd; biyázhí daashtłizh áádóó daastłʼin índa daalkizhgo nidayiishchı̨́.
40 Áko Jéíkab éí dibé yázhí atsʼéinínil áádóó Léíban bilı̨́ı̨́ʼ bitahgóó dibé daashtłizhígíí índa dibéłchíʼígíí yił neiniłkaad. Áko Jéíkab tʼáá sahdii bilı̨́ı̨́ʼ neiniłkaadgo tʼáadoo Léíban bilı̨́ı̨́ʼ yitah yiinínil da.
41 Ákótʼéego alı̨́ʼígíí aláahgo dabidziilii adadíʼnóoltsąąłgo tsinígíí bíighahgi inídaʼniiltsąąh doo biniyé Jéíkab éí alı̨́ʼígíí binááł tsinígíí éí tsé yiiʼ nídaʼadlı̨́hígíí yiih néíʼnił.
42 Nidi alı̨́ı̨́ʼ doo dabidziilígíí éí doo tsin yá ninéíʼnił da, áko doo dabidziilígíí éí Léíban bí; dabidziilígíí tʼéiyá Jéíkab bí.
43 Áko Jéíkab tʼáá íiyisí azdeestʼįįd; halı̨́ı̨́ʼ áádóó asdzání há nidaalteʼ áádóó diné há nidaalteʼ áádóó ghą́ą́ʼaskʼidii índa télii tʼóó ahóóyóí.
Footnotes
^ Jóseph jiníigo éí Hííbrew kʼehjígo łaʼ aa nádooltééł jinínígi átʼéego nahalin.
