Genesis 33:1-20
33 Áádóó Jéíkab hajííghalgo jidééʼı̨́ı̨́ʼ; nítʼééʼ Íísa aadę́ę́ʼ diné dı̨́įdi neeznádiin yił yinééł. Áko áłchíní ałtsʼájíínilgo Líyah áádóó Réíchel łaʼ baazhnínil, índa asdzání naaki á naalʼaʼí ałdóʼ łaʼ baazhnínil.
2 Áko á naalʼaʼí índa badaʼáłchíní alą́ąjįʼ nizhnínil, índa nááʼákééʼ góneʼ Líyah áádóó baʼáłchíní nináájíʼnil, áádóó Réíchel índa Jóseph éí tsʼídá akéédę́ę́ʼ nizhnínil.
3 Áádóó éí oonéłígíí bíighah chʼízhníyáago hánaaí baazhníyáajįʼ tsostsʼidi niʼjįʼ yaa ádziidzaa.
4 Nidi Íísa hadááh yílwodgo hazénázhchid, áádóó haztsʼǫs, áko tʼáá ájíłah jííchah.
5 Áádóó Íísa hajííghal, nítʼééʼ asdzání índa áłchíní yiyiiłtsą́ągo ání, Eiishąʼ bił yíkahígíí háí ádaatʼı̨́? Áko ájíní, Ná naalʼaʼí baʼáłchíní éí Diyin God joobaʼii beinínilígíí ádaatʼı̨́.
6 Ákohgo asdzání nidaalteʼ badaʼáłchíní yił áháníjįʼ hachʼįʼ niikaigo yaa ádaadzaa,
7 áádóó Líyah baʼáłchíní yił áháníjįʼ hachʼįʼ niikaigo ałdóʼ yaa ánáádaadzaa, áádóó bikʼijįʼ Jóseph índa Réíchel áháníjįʼ niníʼáazhgo yaa ánáánádzaa.
8 Áko Íísa ání, Haʼátʼíishąʼ biniyé tʼóó ahayóí shidááh daʼniiskaad? Áádóó ázhdííniid, Shinanitʼaʼí nílíinii, díí ajoobaʼ bee shichʼohaʼnéego shaa nitsíníkees doo biniyé danéelkaad.
9 Áko Íísa ánáádooʼniid, Shee hólónígíí tʼáá ákódígo nisin, shitsilí; éidíígíí bíniʼdii tʼáá ni dooleeł.
10 Áko Jéíkab ádííniid, Dooda, nánooshkąąh, kʼad ajoobaʼ bee shichʼohaʼnínígíí nił hóshǫ́ǫ́ ládą́ą́ʼ, naa diníʼánígíí ni doo biniyé nídiilé; Diyin God biniiʼ jiiłtsą́ nahalingo niniiʼ yiiłtsą́, háálá shaa nił hózhǫ́.
11 Tʼáá shǫǫdí nánooshkąąh, shibee akʼihojidlíii naa diníʼánígíí nídiinííł, háálá éí Diyin God yee shaa joozbaʼ; shee hólónígíí tʼáá ákódígo shił bíighah. Áádóó bee hozhniilteeʼgo índa nízhdiinil.
12 Áko Íísa ádííniid, Tįʼ nídidiiʼnéełgo yiiʼneeł doo; shí nihilą́ąjįʼ yisháał doo.
13 Áko ábizhdííniid, Shinanitʼaʼí bił bééhózin; áłchíní doo dadijáad da, índa ayázhí dahólǫ́ǫgo bił yishnééł, áko łaʼa jı̨́da tsı̨́įłgo dínéeskaadgoda ałtso dínóonééł.
14 Haaʼíshąʼ, shinanitʼaʼí nílíinii, ná naalʼaʼí bilą́ąjįʼ nááʼnééł, áko Síyerdi shinanitʼaʼí baa níyáajįʼ shilı̨́ı̨́ʼ índa shaʼáłchíní tʼáá bikʼehígo yiiʼnéeł doo.
15 Áko Íísa ádííniid, Haaʼíshąʼ diné bił naashkaígíí łaʼ nił ninishʼnííł. Áko ájíní, Éíshąʼ haʼátʼíí biniyé? Shinanitʼaʼí nílíinii, hániʼdii ajoobaʼ tʼéí bee shichʼohaʼnéego shąąh tsídíkees.
16 Áko índa tʼáá éí bijı̨́ Síyergóó Íísa dah nízhdiiʼná.
17 Áko Sákath* hoolyéejįʼ Jéíkab níná; ákweʼé dahasbįʼ, índa bilı̨́ı̨́ʼ ałdóʼ yá chahaʼoh ádayiilaa; éí biniinaa ákweʼé Sákath hoosyeʼ.
18 Áádóó Kéínan kéyahgi Shííkem kin haalʼáajįʼ tʼáadoo átʼéhígóó Jéíkab jiníná; Péídan-éíram hoolyéédę́ę́ʼ níjooʼnéełgo éí kin haalʼáhígíí bíighahgi haníbaal nizhnínil.
19 Áko haníbaal nizhʼnínil yę́ęgi kéyah łaʼ nidziisʼniiʼ; Shííkem bizhéʼé Héímor wolyéii baa nidziisʼniiʼ; éí neeznádiin béeso bikʼé nizhnínil.
20 Áko ákweʼé bikááʼ nááʼiiniihí ájiilaago El Élohi Ízrel* hoolyée doo, jidííniid.
Footnotes
^ Sákath jiníigo éí Hííbrew kʼehjígo chahaʼoh jiníigo óolyé.
^ El Élohi Ízrel jiníigo éí Hííbrew kʼehjígo Diyin God éí Ízrel biDiyin God jiníigo óolyé.
