Genesis 6:1-22
6 Nahasdzáán bikáaʼgi diné tʼóó ahayóí silı̨́įʼgo bitsiʼké nidahaazhchı̨́,
2 áko Diyin God bitsʼą́ą́dę́ę́ʼ ayeʼké danilíinii nihokááʼ dineʼé bitsiʼké dayiiłtsą́ągo bił danizhóní, áko tʼáá bí deinízinígíí beʼasdzą́ą́ ádayiilaa.
3 Áko Bóhólníihii ádííniid, ShiNíłchʼi Diyinii doo tʼáá áłahjįʼ nihokááʼ dineʼé náyookąąh da doo, háálá atsʼíís kʼehgo nitsáhákees tʼéí daznízin; azhą́ ákótʼée nidi kodóó neeznádiindóó baʼaan naadiin nihwéédahaháah doo.
4 Éí yoołkááł yę́ędą́ą́ʼ nahasdzáán bikáaʼgi yéʼiitsoh dahólǫ́ǫ́ nítʼééʼ, áádóó bikʼijįʼ Diyin God bitsʼą́ą́dę́ę́ʼ ayeʼké danilíinii nihokááʼ dineʼé bitsiʼké yił ahaa dahaaskaigo baʼáłchíní dahazlı̨́ı̨́ʼ; éí ałkʼidą́ą́ʼ diné ayóó ádaatʼéii índa chʼídabiʼditʼáahii danilı̨́ı̨́ nítʼééʼ.
5 Áko Bóhólníihii éí doo yáʼádaashóonii ayóó átʼéego bee nihokáaʼgi tsiʼadeesdeeʼgo áádóó bił ádaatʼíinii tʼáá ałtso bijéí yee tʼááłáhígi átʼéego bąąhági átʼéii yaa nitsídaakeesgo yooʼı̨́.
6 Áko Bóhólníihii éí nihokáaʼgi diné ájiilaaígíí bąąh hániʼ, índa hajéí biyiʼdi tʼáá íiyisí hániʼ yiyiiłʼaʼ.
7 Áko Bóhólníihii ádííniid, Diné áshłaaígíí shíniʼ neisʼą́; éí bąą diné áádóó naaldlooshii áádóó nidaaʼnaʼii índa nidaatʼaʼii tʼáá bił nahasdzáán bikááʼ áhodeeshdįįł.
8 Nidi Bóhólníihii bibee ajoobaʼ yee Nóah yichʼooné.
Nóah éí tsinaaʼeeł áyiilaa
9 Díí Nóah baʼáłchíní náás daʼahílchíihii ádaatʼé: Nóah éí diné tʼáá ákogi átʼéii nilı̨́, índa bíyoołkááłdą́ą́ʼ tʼáadoo bee bikʼíhótʼahígóó Nóah éí Diyin God yił yiʼash.
10 Nóah hayeʼké tááʼ há niheezhchı̨́: Shem áádóó Ham índa Jéífeth daolyé.
11 Diyin God binááł éí nahasdzáán yíchxǫʼgo bikááʼgóó tʼáá átʼéé nítʼééʼ ádílááh nihinééstʼeʼ.
12 Diyin God éí nahasdzáán yiníłʼı̨́įgo tʼáá íiyisí yíchǫʼ lá, háálá atsʼíís kʼehgo yildahii nináneelʼą́ąjįʼ tʼáá íiyisí nidaʼiisíihgo ádadoolchxǫʼ.
13 Áko Diyin God éí Nóah áyidííniid, Atsʼíís kʼehgo yildahii nináneelʼą́ąjįʼ bá nihonítʼiʼ dooleeł, háálá nahasdzáán bikááʼgóó hó hwee tʼáá átʼéé nítʼééʼ ádílááh nihinééstʼeʼ, áko kʼad nahasdzáán bikáaʼgi áhodeeshdįįł.
14 Áko sáípres tsin bee tsinaaʼeeł ádíílííł. Biyiʼ nidahwiisdzą́ągo ádíílííł, índa biyiʼdę́ę́ʼ áádóó bikááʼdę́ę́ʼ łeejin dijéʼígíí bee dííjah.
15 Díí bikʼehgo ádíílííł: náásee dı̨́įdi neeznádiindóó baʼaan ashdladiindi ké siláago* naaniigo tsostsʼidiindóó baʼaan ashdladi ké siláago, índa dego éí dízdiindóó baʼaan ashdladi ké siláago ádíílííł.
16 Índa dego nineelʼą́ąjįʼ éí tsésǫʼ tʼááłáhídi ké siláádóó náʼáłníiʼgo ahéédíítsih; tsinaaʼeeł booshkʼiizhjígo dáádílkałgo ádíílííł; ayaaígíí áádóó ataʼgiígíí áádóó adeígíí biyiʼ nidahwiisdzą́ągo ádíílííł.
17 Áko shí, tʼáá shí shikʼehgo tó nahódoołkah; nahasdzáán bikáaʼgi nídídzihii nináneelʼą́ąjįʼ tʼáá bił yá biyaagi ádahodeeshdįįł, áko nahasdzáán bikáaʼgi tsʼídá ałtso dadínóonééł.
18 Nidi ni tʼéiyá bohoníłdzilgo nił ałhadiʼdeeshtʼááł, áko tsinaaʼeeł biih díínááł, ni áádóó niyeʼké áádóó neʼasdzą́ą́ índa niyeʼké bidaʼasdzą́ą́ ałdóʼ, éí bił yah adííkah.
19 Áádóó bitsʼíís dahináanii nináneelʼą́ąjįʼ bikąʼii índa biʼáadii naaki níláago tsinaaʼeeł biih hidííʼish, áko tʼáá níighahgóó dahináago baa áhólyą́ą doo.
20 Nidaatʼaʼii ałʼąą ádaatʼéii áádóó naaldlooshii ałʼąą ádaatʼéii índa nihokááʼ nidaaʼnaʼii tʼáá ałtso ałʼąą ádaatʼéii éí naaki níláago naa dahakáahgo dahináago íínísin dooleeł.
21 Chʼiyáán ałʼąą ádaatʼéii tʼáá ałtso áłah ádíílíiłgo yah ahidííyééł; éí nihichʼiyąʼ áádóó dabichʼiyąʼ doo.
22 Nóah díí biʼjiilaa; Diyin God áhodííniidígíí tʼáá ałtso biʼjiilaa.
Footnotes
^ Hííbrew bizaad kúbit éí tʼááłáʼídóó náʼáłníiʼgo ké silá jiníigo óolyé.
