Hebrews 1:1-14
1 Ałkʼidą́ą́ʼ Diyin God éí bá dahalneʼii binahjįʼ danihizhéʼé yę́ę ląʼídi índa ląʼígóó yichʼįʼ hahaasdzííʼ,
2 nidi díí nihooghááh bichʼįʼ yoołkáłígíí biyiʼ tʼáá bí biYeʼ yee nihichʼįʼ haadzííʼ. Tʼáá ałtsoní hóóʼ dooleełgo nihoníłtı̨́, tʼáá hó ałdóʼ hwee yádiłhił biyiʼdi dah hiníláii áyiilaa.
3 Tʼáá hó Diyin God yee ayóó átʼéii bee bitsʼádiʼnílíidii bee hatsʼádiʼnídíín, índa Diyin God átʼéhígíí tsʼídá tʼáá éí jílı̨́įgo, tʼáá náhwiizʼą́ą́ nítʼééʼ hazaad ayóó ábóodziilii bee hoogááł. Nihibąąhági átʼéii nihąąh táádzízgizdóó bikʼijįʼ aghánáhóóʼáadi Diyin God Ayóóʼátʼéii binishʼnáájígo dasneezdá.
Christ éí diyingo nidaalʼaʼí biláahdi ájítʼé
4 Diyingo nidaalʼaʼí dabízhiʼ ayóó ádanoolninii biláahdi átʼéii yízhí ayóó ánóolninii Diyin God haidiníʼą́. Éigi átʼéego diyingo nidaalʼaʼí biláahdi ájítʼé dzizlı̨́ı̨́ʼ.
5 Háálá Diyin God éí diyingo nidaalʼaʼí doo łaʼ kwíidííniid da,
ShiYeʼ nílı̨́,díí jı̨́ nishchíinii sélı̨́ı̨́ʼ.
Áádóó ałdóʼ,
Hó haTaaʼ nishłı̨́į doo,áko hó tʼéí shiYeʼ jílı̨́į doo.
6 Áádóó nááʼáłdóʼ, Diyin God éí áłtsé yizhchíinii nahasdzáán yikáaʼgi yiníłʼaʼdą́ą́ʼ ání,Bíniʼdii Diyin God bidiyingo nidaalʼaʼí tʼáá ałtso bichʼįʼ nidahałáa doo.
7 Diyin God éí diyingo nidaalʼaʼí kwííłní,
Bidiyingo nidaalʼaʼí níłchʼi danilı̨́įgo,índa bá nidaalʼaʼii kǫʼ dah nídadinoʼii danilı̨́įgo ánáyoodlííł.
8 Nidi biYeʼ nilíinii éí kwííłní,Diyin God nílíinii, bikááʼdóó nahóʼáii bikááʼdóó hóóʼáałgo hoolʼáágóó ahóyéelʼá,bee nóhólníihgo bił hazʼáanii biyiʼ nóhólníihgo bee nééhózingo naatʼá gish éí tsʼídá tʼáá ákogi átʼéego dah yítı̨́ı̨́ł.
9 Tsʼídá tʼáá ákogi éʼétʼé ayóóʼííníʼní índa bąąhági átʼéii éí jiiníłá,éí bąą Diyin God, niDiyin God nilíinii nándiiłtı̨́įgo akʼah nikʼi yayiiziidgobił daʼahíínítąʼii biláahdi átʼéego nił hózhǫ́ǫgo ániilaa.
10 Áádóó Diyin God ánáádíʼní,
Bóhólníihii nílíinii, ni lą́ą hodeeyáadi nahasdzáán nee niłdzil,índa nílaʼ bee yótʼááh hiníláii binishínílnishii átʼé.
11 Éí ádadoodįįł, nidi ni tʼéí honílǫ́;
éí tʼáá ałtso ééʼ nahalingo hadadootih,
12 beeldléí nahalingo dadíídis,áko łahgo ádadoonííł.Nidi ni tʼéí tʼááłáhígi ánítʼé,índa nee nináháháahii doo nidootʼih da.
13 Diyin God éí bidiyingo nidaalʼaʼí doo łaʼ kwíidííniid da,
Nidaʼanaʼí bikʼi díínílʼeezgo ániishłaajįʼshinishʼnáájí dah sínídá.*
14 Ákoshąʼ diyingo nidaalʼaʼí haʼátʼíí danilı̨́? Jó, níłchʼi danilı̨́įgo Diyin God yá nidaalʼaʼ áádóó yisdáʼiildééh hwííʼ dadooleełii háká anájah doo biniyé adabiʼdiisʼaʼ.
Footnotes
^ Bikʼi díínílʼeezgo ániishłaajįʼ, nínígíí éí, Ná bikʼeh díshdlı̨́įʼjįʼ, níigo ání. Ps. 110:1.
