Hebrews 13:1-25
13 Christ bee tʼáá łaʼ haoojéeʼgo ayóóʼádaʼahíínóhʼníi doo.
2 Déʼéyóní danilíinii nihaa nídaakahígíí bichʼįʼ nihá ádahwiinítʼı̨́ʼígo nihił danilı̨́į dooleełígíí béédaałniih, háálá łaʼ ákódaatʼı̨́įgo diyingo nidaalʼaʼí ádaatʼı̨́įgo doo bił béédahózingóó yaa dajoozbaʼ.
3 Awáalyaaí danilínígíí tʼáá bił awáalyaaí danohłı̨́ nahalingo baa nitsídaahkees, áádóó tiʼdahooníhígíí ałdóʼ bił tiʼdahoohnííh nahalingo baa nitsídaahkees, háálá nihí ałdóʼ atsʼíís bee dahinohná.
4 Bíniʼdii tʼáá ádzíłtso agééh hoł danilı̨́į leʼ, áádóó ahéʼáské dílzin leʼ. Naʼageh bee tsiʼnidajikaii, índa dazhʼdiléii éí Diyin God há nihodiyooʼááł.
5 Béeso tʼáadoo bíchą́deídółniʼgo dahinohnání, áádóó nihee dahólónígíí nihił daasih leʼ. Háálá Diyin God ání,
Tsʼídá doo nihikʼi dínéeshchéeł da; tsʼídá doo yóóʼanihidideeshʼáał da.
6 Éí bąą tʼáadoo yéʼí ádadiiʼníi doo,Bóhólníihii shíká análwoʼí nilı̨́,doo násdzid da doo!Dinéshąʼ haa dashizhdoolííł?
7 Diné nihá naazı̨́ı̨́ nítʼéeʼii béédaałniih. Éí Diyin God bizaad yee nihił dahoolneʼ. Haash yitʼéego dahináá nítʼééʼ índa haash yitʼéego nidaʼiisdįįd éí nabikʼítsídaałkees, áko bidaʼoodląʼ yę́ę bidaʼołʼı̨́į leʼ.
8 Jesus Christ éí adą́ą́dą́ą́ʼ áádóó díí jı̨́ índa hoolʼáágóó tʼááłáhígi áyéetʼéego ahoolʼá.
9 Ałʼąą átʼéego índa doo bééhózingóó naʼnitin danilíinii tʼáadoo yóóʼadanihiniiʼáhí. Diyin God bee ajoobaʼ hweʼoodląʼ bitsxeʼgo áyiiłʼįįhjí yáʼátʼééh, tʼáadoo leʼé daadą́ągo bee nidaʼnitinii tʼáadoo yáʼátʼéehgo hodahideezyįįd da.
10 Jew dineʼé yá náádaʼiiłniihii níbaal biiʼ hodílzinii biyiʼ nidaalʼaʼígíí éí bikááʼ nááʼiiniihí nihee hólónígíí bikáaʼgi nááhaazniiʼii deidooyı̨́įłgo doo bee bá hazʼą́ą da.
11 Naaldlooshii dabidił éí aláahgo nááʼiiłniihii ádił niʼiidzííhjí nááhániihii átʼéego aláahgo hodiyingo hazʼą́ą́ góneʼ yah iikáah łeh, nidi dabitsįʼ níbaal haalʼáhídóó bitsʼáhwiiníʼą́ądi dadidlid łeh.
12 Éí bąą Jesus ałdóʼ tʼáá bí bidił yee diné dadiyingo áyoolíił doo biniyé Jerúsalem kin haalʼáhígíí bitsʼáhwiiníʼą́ądi tiʼhoozniiʼgo daaztsą́.
13 Jesus baa yáhásingo nihá tibidiʼyoosniiʼ, áko nihí ałdóʼ baa yáhásingo bá tiʼhwiidiiʼnihgo níbaal haalʼáhídóó bitsʼáhwiiníʼą́ą́góó bichʼįʼ deíníikáah doo.
14 Háálá kweʼé hoolʼáágóó kin haalʼáii doo biiʼ kéédahwiitʼı̨́į da, nidi hoolʼáágóó kin haalʼáii biiʼ kéédahwiitʼı̨́į dooleełígíí bíká dadéetʼı̨́ı̨́ʼ.
15 Éí bąą haaʼíshąʼ Jesus bee Diyin God baa dahwiiʼniihígíí tʼáá áłahjįʼ bichʼįʼ náádahiilniih doo. Bízhiʼ deíníijíigo bee bichʼįʼ ahééh daniidzingo ádee hadahidiidziihii bineestʼąʼ átʼé.
16 Yáʼátʼéehgo ádadoohníłígíí índa nihee dahólóonii náádaałaʼ bił ałtsʼą́ą́ʼ daʼnołkʼiiz dooleełígíí baa dayoohnééh lágo, háálá ákójítʼínígíí éí nááhániihii Diyin God yaa bił hózhónígíí átʼé.
17 Nihá aląąjįʼ naazíinii bikʼeh dahonołʼı̨́ áádóó bídahwíínółnííh. Háálá éí nihiiʼ naazíinii tʼáá áłahjįʼ nihá yikʼi hadaʼídéesʼı̨́įʼgo yee nihindaalnishígíí Diyin God yee yił nídahalneʼ. Bikʼeh dahonołʼı̨́įgo bił dahózhǫ́ǫgo nihindaalnishgo yáʼátʼééh, doodaiiʼ doo bikʼeh dahonołʼı̨́ı̨́góó éí yínííł danilı̨́įgo tʼáadoo nihá nídoodleełí da.
18 Nihá sodadołzin. Tʼáá ákwii ádeiitʼínígíí baa ákodaniidzingo, tʼáá ałtsojįʼ yáʼátʼéehgo dahiniiʼnáa dooleełgo laanaa daniidzin.
19 Tʼáá tsı̨́įłgo Diyin God nihichʼįʼ nihééshidoołʼaałígíí bíká sodadołzin doogo baa nánihooshkąąh.
Kʼé haʼníigo bee naaltsoos niiltʼiʼii
20 Diyin God, bitsʼą́ą́dóó achʼįʼ hózhǫ́ náhásdlı̨́įʼiiʼ, éí nihiBóhólníihii Jesus daaztsą́ą́dę́ę́ʼ néidiisá. Jesus, dibé yaa áhályáanii ayóó átʼéii, bidił bee ahaʼdeetʼą́ doo ninítʼiʼii ályaa.
21 Diyin God íinízinii bikʼehgo ádaahníił doo biniyé hadaałtʼé ánihidoolííł. Éí Jesus Christ biniitʼaa nihiiʼ naalnishgo bił hóshǫ́ǫ doo. Hoolʼáágóó ahóyéelʼáágóó baa haʼniih doo. Tʼáá ákótʼée doo.
22 Shikʼisóó, hadaʼíínółní, saad bee chánah ádanihishłeʼígíí deídóołtsʼįįłgo baa nánihooshkąąh, háálá tʼáá áłtsʼíísígo nihichʼįʼ akʼeʼshéłchı̨́.
23 Nihikʼis Timothy bá hóóshdleeʼígo béédoochidígíí nihił chʼíníshʼaah. Éí tʼáá tsı̨́įłgo shaa níyáá ládą́ą́ʼ akǫ́ǫ́ bił deeshʼashgo danihiidiiltsééł.
24 Nihá aląąjįʼ naazíinii tʼáá ałtso áádóó Diyin God bidiyı̨́ı̨́ʼ tʼáá ałtso shá kʼé dabijiniih. Ítalidę́ę́ʼ danilíinii kʼé danihiłní.
25 Tʼáá ánółtso Diyin God bibee ajoobaʼ yee nihikʼijidlíi doo.
Tʼáá ákótʼée doo.
