Hebrews 3:1-19
3 Éí bąą shikʼisóó, Diyin God bidiyı̨́ı̨́ʼ danohłíinii, yáʼąąshdę́ę́ʼ atah nihíká áhodooʼniidii, Christ Jesus hazhóʼó baa nitsídaahkees, éí naʼnitin woodláanii bihidiikaígíí yiniyé yilʼaadii índa yá aláahgo nááʼiiłniihii nilı̨́.
2 Ízrel dineʼé dajílíinii éí Mózes baa hodzódlíigo hwee ádíhólníihgo Diyin God bá honaalnish nítʼéʼígi átʼéego Jesus éí Diyin God nihoníłtı̨́įgo haa hodzódlíigo Diyin God bá nijilnish.
3 Diné kin ájíłʼíinii éí kin biláahgo diné bił jílı̨́. Tʼáá ákótʼéego Jesus éí Mózes yiláahgo aa haʼniih yą́ą́h nilı̨́.
4 Jó, kin tʼááłáʼí níʼánígo diné łaʼ ádayiilaa, nidi Diyin God éí tʼáá ałtsoní áyiilaa.
5 Mózes éí Ízrel dineʼé binjilnishgo haa hodzódlíí nítʼééʼ. Naalʼaʼí jílı̨́įgo náásgóó Diyin God yee hahidoodzihii baa hojilneʼ nítʼééʼ.
6 Nidi Christ, éí haa hodzódlíigo Diyin God biYeʼ jílı̨́įgo, Diyin God baʼáłchíní bee hóhólnííh. Jó, nihí tʼáá nihoolzhiizhjįʼ Diyin God hwee nihił chodahooʼı̨́įgo haa dadzííníidlíigo bee chánah daniidlı̨́įgo haʼáłchíní daniidlı̨́.
Hááʼáyı̨́ı̨́h Diyin God baʼáłchíní bá hólóonii
7 Háálá tʼáá Níłchʼi Diyinii ánínígi átʼéego bikʼehgo ádanohtʼé,
Díí jı̨́ Diyin God biinééʼ dadoohtsʼaʼgo,
8 shą́ą́ʼ, honoojíidi ałghadazhditʼááh yę́ędą́ą́ʼáádóó Diyin God nabídazhnitaahgo yoołkááł yę́ędą́ą́ʼ tʼą́ą́zhʼneezhjééʼ yę́ęgi átʼéego tʼáadoo nihijéí dantłʼizí.Doo akʼeh dahojíłʼı̨́ı̨́góó biniinaa tʼą́ą́zhʼneezhjééʼ.
9 Áadi azhą́ dízdiin nááhaijįʼ shinaanish dayooʼı̨́ı̨́ nítʼééʼ nididanihizhéʼé yę́ę shíkadaʼiisxilgo nashídaneeztą́ą́ʼ.
10 Éí bąą éí oochíiłii bichʼįʼ doo shił hóózhǫǫdgóó ádííniid,Diné tʼáá bí tʼáá áłahjįʼ bijéí yee ádił nidaʼílzííh, áníshtʼéii doo bił béédahózin da nítʼééʼ.
11 Áko tʼóó báhádzidgo atéʼéshʼíinii binahjįʼ ádee hadeesdzíiʼgo ádííniid,Hááʼáyı̨́ı̨́h bee hoołʼaʼígíí tsʼídá doo biih dazhdookah da.
12 Ádaa ádahołyą́, shikʼisóó, doo ádaa ádahołyą́ą́góó nihijéí biiʼ doo yáʼátʼééhgóó nitsídaahkees doo, índa doo daʼiinohdlą́ą́góó biniinaa Diyin God hináanii bitsʼáhidoohkah.
13 Nidi bąąhági átʼéii yee anóʼáahii doo łaʼ nihidoołtłʼisgo jéʼáhodołkałgo ánihidoolíłígíí biniyé tʼah jı̨́ haʼnínídą́ą́ʼ tʼáá ákwíí jı̨́ ahidiniłnáago chánah ádaʼahíínółzin.
14 Háálá átséedi daʼiisiidląądgo tʼáá nidasiildįįdjįʼ baa daʼiisiidlíʼígíí yéego dayíníitąʼgo Christ bił daʼahííníitąʼ doo.
15 Diyin God bizaad bee akʼeʼashchíinii kóní:
Díí jı̨́ Diyin God biinééʼ dadoohtsʼaʼgoshą́ą́ʼ diné doo akʼeh dahojíłʼı̨́ı̨́góó biniinaa tʼą́ą́zhʼneezhjééʼ yę́ęgi átʼéegotʼáadoo nihijéí dantłʼizí.
16 Łaʼ éí Diyin God bizaad deidiiztsʼą́ąʼ nidi doo yikʼeh dahółʼı̨́ı̨́góó tʼą́ą́ʼ neezhjééʼ. Ííjipdę́ę́ʼ Mózes chʼíiníʼeezhii doo tʼáá ałtso tʼą́ą́ʼ neezhjéeʼ da.
17 Háishąʼ dízdiin nááhaijįʼ Diyin God hachʼįʼ doo bił hóózhǫǫd da? Honoojíidi bąąhági ádajitʼı̨́įgo biniinaa nahózdįįdii lą́ą!
18 Áádóó, Hááʼáyı̨́ı̨́h bee hoołʼaʼígíí tsʼídá doo biih dazhdookah da, níigo háishąʼ Diyin God hachʼįʼ ádee haadzííʼ? Doo bikʼeh dahojííłʼįįdii lą́ą ni!
19 Doo daʼjoodlánígíí biniinaa hááʼáyı̨́ı̨́h Diyin God yee hoołʼaʼígíí biih dahizhdookahgo tsʼídá doo bídajíighahgóó nihił béédahoozin.
