Hosea 11:1-12
11 Ízrel áłchíní nilı̨́ı̨́dą́ą́ʼ ayóóʼííníshʼníí nítʼééʼ. Shiyeʼ Ííjip kéyahdę́ę́ʼ wóshdę́ę́ʼ chʼínínááh, bidííniid.
2 Diyin God yá dahalneʼii bíká ádaaníigo tʼah yówehgo tʼóó yitsʼą́ąjįʼ dah dahidiikai; Béíyal yichʼįʼ náádaʼiisniiʼ áádóó didlidgo náádahaniihii éí edaʼalyaii yichʼįʼ náádayiisniiʼ.
3 Shigaan bee Íífreiyim dineʼé ádídeíníshtąʼgo yikah dooleełgóó bínabiníłtą́ą́ʼ. Hadaałtʼé áńdeishdlaa, nidi tʼáadoo bił béédahoozin da.
4 Dinégi átʼéego ayóóʼóʼóʼní bee átʼááh hweeshʼnil. Haʼdeestsoł biniyé hachʼįʼ yaa ásdzaago hazáátʼiʼí haa diinil.
5 Ííjip kéyahgóó doo nídookah da, nidi doo shichʼįʼ tʼą́ą́ʼ níjíkáhígíí biniinaa Asíriya dineʼé aláahgo hondantʼáa doo.
6 Tʼáá bí kótʼéego daaníinii biniinaa bikin hadaasʼáágóó diltłish bee atíbidiʼdoolnííł áádóó bidáńʼdaʼditı̨́įhii bitsʼą́ą́ʼ ádooldįįł índa ádabidiʼdooldįįł.
7 Shidineʼé shitsʼą́ą́ʼ tʼą́ą́ʼ honídooʼnííłjí ahodiyííʼą́. Azhą́ Diyin God yá dahalneʼii, Aláahgo Ayóóʼátʼéii bichʼįʼ nináhóhkááh, dahałníi nidi, tʼááłáʼí nidi doo łaʼ haa haniih da.
8 Íífreiyim nílíinii, haash yitʼéego ninándideeshʼááł? Ízrel nílíinii, haash yitʼéego tʼóó niʼdeeshnih? Haash yitʼéego Ádmah hoolyéii atílyaa yę́ęgi átʼéego atíndeeshłííł? Haash yitʼéego Ziibówim hoolyéii atílyaa yę́ęgi átʼéego atíndeeshłííł? Shijéí bee nihaa yínííł nishłı̨́įgo nihaa aʼáhí néiniisdzįįh.
9 Yéego hashké néiniisdzįįhígíí doo bee atíhodeeshłíił da. Íífreiyim atíhodeeshłííł biniyé doo nááhodeeshłeeł da, háálá doo diné nishłı̨́į da, nidi Diyin God nishłı̨́. Tʼááłáʼí Diyinii nishłı̨́įgo nihitahgóó honishłǫ́ áádóó doo atíʼdeeshłííł biniyé hodeeshłeeł da.
10 Bóhólníihii yikééʼ dah didookah. Náshdóítsoh bitsiijįʼ ditłʼooígíí ání nahalingo yéego áníi doo; tʼáá aaníí, yéego áníigo eʼeʼaahdę́ę́ʼ Ízrel dineʼé bitah dahoditłidgo ninádahidookah.
11 Tsídii bitah hoditłid nahalingo Ííjip kéyahdę́ę́ʼ nináhidookah áádóó hasbídí bitah hoditłid nahalingo Asíriya kéyahdę́ę́ʼ nináhidookah índa dabighangi nináhideeshʼish, ní Diyin God.
Íífreiyim biyoochʼíidgo áníinii áádóó ade áhósinii biniinaa biʼdeesteh
12 Íífreiyim ayóogo shinóʼááh áádóó Ízrel dineʼé doo chohooʼı̨́ı̨́góó shindaʼaloʼ, Júdah éí Diyin God baʼahódlíii tʼahdii yitsʼą́ąjįʼ yigááł.
