Hosea 14:1-9
14 Ízrel dineʼé danohłíinii, Bóhólníihii nihiDiyin God bichʼįʼ dah nídoohkááh, háálá doo ákwii ádaotʼįįdígíí biniinaa dadoogoʼ.
2 Bóhólníihii bichʼįʼ ninánohkáahgo tʼáá nihí kódabididoohniił, Doo ákwii ádeiitʼįįdii tʼáá ałtso nihá yóóʼadíʼaah áádóó nijoobaʼ bee náánihidiidlé, áko dóola yáázh náádahiilniihígi átʼéego tʼáá nihí naa dahwiiʼniih dooleeł.
3 Asíriya dineʼé nilíinii doo yisdánihidoonił da; łı̨́ı̨́ʼ doo bee náádadiibah da índa nihílaʼ bee bindashiilnishgo ádeiilyaii náásgóó doo bichʼįʼ kónáádadidiiʼniił da, Nihidiyin danohłı̨́. Niniitʼaa áłchíní bizhéʼé ádaadinii aa aʼááh hasin bee dahazlı̨́ı̨́ʼ.
4 Tʼą́ą́ʼ anídadziiskaii hashtʼéédahodeeshdlííł; tʼáádóo nídí ayóóʼádahwííníshʼníi doo, háálá tsʼídá doo bichʼįʼ shánááhodoochįįł da.
5 Ízrel dineʼé bichʼįʼ dahtooʼgi áníshtʼée doo, áko bí éí chʼilátah hózhóón baa hózhónígi átʼéego nooséeł dooleeł, áádóó hwehétłʼóól éí Dził Lébanangi gad bihétłʼóolgi átʼéego łeeh dahidínóosééł.
6 Hatsʼádaozʼaʼ hatsʼá dahidínóosééł áádóó áliv tsin sikaadii ánóoshónígi ájítʼée doo índa Dził Lébanangi gad halchinígi átʼéego łikání hojílchin doo.
7 Hachahaʼohgi kéédahatʼíinii ákwii tłʼoh naadą́ąʼgi átʼéego danéesée doo áádóó chʼil naʼatłʼoʼiigi átʼéego bílátah daʼiigáah doo; Dził Lébanangi wáin halchinígi átʼéego bee hwééhániih doo.
8 Íífreiyim ádidooniił, Edaʼalyaiishąʼ haa náádeeshdlííł? Shí hachʼįʼ ééhosésįįd áádóó haa áháshyą́. Shí chʼó tʼáá dootłʼizhgo sikaadii nahonishłin. Shitsʼą́ą́dóó nineestʼąʼ nąąh náhoodleeł.
9 Tʼáá háiida hojíyáanii díí bikʼizhdiʼyiitįįh doo. Tʼáá háiida hóyą́ągo nitsíkeesii díí bił bééhózin doo. Háálá Bóhólníihii yee átʼéii tsʼídá tʼáá ákogi átʼé áádóó tʼáá ákogi átʼéii yiiʼ deíkáah dooleeł. Bee hazʼáanii dayiitíihii chą́ą́h dahidínídééh.
