Hosea 5:1-15
5 Náádaʼiiłniihii danohłíinii, daʼíísínółtsʼą́ą́ʼ; Ízrel dineʼé danohłíinii, daʼdoohtsʼı̨́ı̨́h; aláahgo naatʼáanii baʼáłchíní danohłíinii, daʼíísínółtsʼą́ą́ʼ: jó, nihá nihootʼaah, háálá Mízpah kin haalʼáagi łohígi ádanohtʼéé nítʼééʼ áádóó Dził Téíborgi* tłʼóół yistłʼónígi ádanohtʼéé nítʼééʼ.
2 Nidaalteehii tʼáá íiyisí doo yáʼáshóonii yiih níídeeʼ, áko tʼáá ádzíłtso tʼáá shí dadideeshteh.
3 Íífreiyim dineʼé bééhasin índa Ízrel dineʼé tsʼídá doo shitsʼąą nízhdótʼı̨́ı̨́ł átʼée da. Íífreiyim nílíinii, kʼad ayóogo íłjił. Ízrel éí ádoolchxǫʼ.
4 Ádaaníłígíí bąą doo biDiyin God yichʼįʼ ninádahókááh átʼée da, háálá ajił tʼéí bíniʼ dadineesdlı̨́įʼgo Bóhólníihii doo yéédahósin da.
5 Áádóó Ízrel bibee ádaa hodzódliʼ bidáahgi hólǫ́ǫgo baa halneʼ. Éí bąągo Ízrel áádóó Íífreiyim baʼátʼeʼ yiiʼ didoogoh, áádóó Júdah dineʼé ałdóʼ ákódoonííł.
6 Bidibé áádóó bibéégashii nideiniłkaadgo Bóhólníihii hádaatʼı̨́į doo biniyé dah didookah, nidi tʼáadoo bikʼídazhdookah da; jó, Bóhólníihii hatsʼáhoníleʼ.
7 Áko Bóhólníihii naʼadloʼ yindayiiłdeełgo dahináá nítʼééʼ; jó, wótashkiʼ nidajiishchı̨́. Índa lą́ą dah néitı̨́įhgo dáʼákʼehgóó nidazhniłtʼąʼii tʼáá bił hó ałdóʼ haa nahodidoodaał.
8 Gíbiyah kin haalʼáagi deenástsʼaaʼ bideeʼ bee íʼdílzoołí bee ádadohniih áádóó Réímah kin haalʼáagi béésh dilní bee íʼdílzoołí bee ádadohní. Beth-éíven kin shijaaʼgi hadadołgháásh, Bénjamin nílíinii, tʼą́ą́ʼ nídínítʼı̨́ı̨́ʼ.
9 Íífreiyim dineʼé biʼdeesteh bijı̨́įdi tʼáadoo nídoodleełí da. Tʼáádóo nídí ádooníłígíí Ízrel dineʼé danilíinii bitahgóó baa hashneʼ.
10 Júdah binanitʼaʼí danilíinii éí bee dahoodzoii nahjįʼ kódeileʼii nidahalin; éí bąągo bee hashké nísdzinii tó adáálı̨́ nahalingo hakʼi yeideeshkááł.
11 Íífreiyim bide áhólzin áádóó ánihwiitʼaah bá ninázhnítłizh, háálá tʼáádóo nídí diné bibee hazʼáanii bee akééʼ nizhníyá.
12 Éí bąągo Íífreiyim bichʼįʼgo chʼosh ałchozhiigi áníshtʼé áádóó Júdah dineʼé, Éí dííłdzidii, dashóʼní.
13 Íífreiyim daatsaahgo ádaa ákoniidzı̨́įʼgo áádóó Júdah éí hadadeeznihgo ádaa ákoniidzı̨́įʼgo Íífreiyim éí Asíriya kéyahgóó ííyá; aláahgo naatʼáanii ayóó átʼéii* yichʼįʼ iʼííłʼaʼ; ákondi nándidoołáłígíí doo yíneelʼą́ą da, áádóó hadadínínihę́ęgi doo náyółdziih átʼée da.
14 Jó, Íífreiyim dineʼé bichʼįʼ náshdóítsoh bitsiijįʼ ditłʼooígíigi áníshtʼée doo áádóó Júdah dineʼé bichʼįʼ náshdóítsoh bitsiijįʼ ditłʼooígíí biyázhígi áníshtʼée doo. Tʼáá shí nihodiyeeshnishgo índa yisháał doo; dahodideeshhéełgo doo łaʼ yisdáhodoołtéeł da.
Ízrel dineʼé tʼóó ádaatʼı̨́įgo łahgo átʼéego tsíńdadeezkééz
15 Bee ádił nidaʼdziisíiʼii baa ákódazniizı̨́įʼjįʼ áádóó shíká dazdéezʼı̨́ı̨́ʼ dadzizlı̨́įʼjįʼ hatsʼą́ą́ʼ dah dideesháałgo tʼóó shighangóó nídeeshdááł. Hachʼįʼ hodiiznáaʼgo haleebee shíká dazdéezʼı̨́įʼ dooleeł.
Footnotes
^ Gálilii beʼekʼidóó eʼeʼaahjígo dził.
^ Asíriya dineʼé aláahgo binanitʼaʼí éí Tíglath-pilíízer wolyé. Éí Hííbrew kʼehjí Jéíreb wolyé.
