Hosea 7:1-16
7 Ízrel dineʼé náádabidideeshłááł niizı̨́įʼgo Íífreiyim dineʼé doo ákwii ádáátʼįįdii áádóó Samériya bidoo yáʼáshǫʼ tʼáadoo bahatʼaadí silı̨́ı̨́ʼ; jó, éí ayóogo bindaʼadloʼ áádóó daʼniʼįįh índa tʼáá tłʼóóʼdóó aghadaʼiiʼnííł.
2 Bidoo yáʼáshǫʼ tʼáá ałtso bénáshniihígíí doo yaa ákodanízin da; yaa nidaakaígíí tʼáá ałtsodę́ę́ʼ bináshzhiizhgo yishʼı̨́.
3 Bidoo yáʼáshǫʼ éí aláahgo naatʼáanii baa bił nihoozhǫǫh índa dabiyoochʼíidii éí naatʼáanii danilíinii baa bił dahózhǫ́.
4 Tʼáá ałtso daʼdiléii dajílı̨́. Bááh ííłʼíní éí dííkʼǫsh yił taʼoozniiʼgo niilyooljįʼ kǫʼ yił naʼashshiish yę́ę tʼóó yikʼi deeyáago bááh bighan góneʼ tʼóó honeezílígíí nidahojílin.
5 Aláahgo nihinanitʼaʼí ádaʼazįįd niiníʼą́ą́ góneʼ naatʼáanii danilíinii yił wáin deidlą́ągo nídadíʼnéesdlą́ą́ʼ; nidahałtʼiʼígíí yił ahił dandlı̨́.
6 Yindahaʼáhígíí bee bijéí daniilchxiiʼgo haa dahéeshjééʼ; tłʼééʼ bíighah kǫʼ diltłiʼgo abínígo tʼóó tséʼédin diiltłiʼígíí nahalin.
7 Bááh bighan góneʼ honiilchiiʼígi átʼéego ánihwiiʼaahii bá danilíinii* dayooldéél; aláahgo binanitʼaʼí tʼáá ałtso ábiʼdisdįįd, áko doo łaʼ shíká áníní da.
8 Íífreiyim éí ałʼąą dineʼé danilíinii yił ałtah níjééʼ; Íífreiyim éí abeʼ bee aneezmasí doo náhastʼáanii nilı̨́.
9 Déʼéyóní danilíinii doo hadziilgóó ádahoolaa, áko doo hoł bééhózin da; hatsiiʼ yiibaʼ nidi, doo hoł bééhózin da.
10 Ízrel bibee ádaa hodzódliʼ baa halneʼ, nidi Bóhólníihii biDiyin God nilı̨́įgo doo yichʼįʼ dah nídahidiikáah da; azhą́ ákódaatʼée nidi, doo tʼáá kʼad hádaatʼı̨́į da.
11 Íífreiyim éí hasbídí nahalingo doo áhályą́ą́góó tsʼídá doo bił áhootʼée da; Ííjip dineʼé yíká ádaaní; Asíriya kéyahgóó ałnáádaakah.
12 Nidi ákǫ́ǫ́ deeskaigo tłʼóół yistłʼóonii bikʼídeeshtihgo wótʼáahdi tsídii nidaatʼaʼii nahalingo niʼjįʼ bidahodeestsos; áłah nilı̨́įgo deidiiztsʼą́ąʼii bikʼehgo atíhodeeshłííł.
13 Shitsʼą́ąjįʼ yóóʼadahaazhjéʼígíí atíhíláaneʼgo bá hazʼą́. Atíhodoolíiłii hólǫ́, háálá shichʼįʼ ádił nidadzisteeʼ; nááhideeshnihgo béédahidideeshchił nisin, nidi woochʼííd yee shikʼijįʼ yádaałtiʼ.
14 Bitsáskʼeh yikáaʼgi chaał yáádaniitʼáahgo bijéí tłʼááhdę́ę́ʼ doo shichʼįʼ ádaaníi da; áłah nádleehgo tłʼoh naadą́ą́ʼ índa wáin ániidíii dayókeed, nidi shichʼįʼ nidaalteeh.
15 Azhą́ bíká aashwod índa bidziilgo áńdeishdlaa nidi, tʼahdii tʼóó shikʼijįʼ nidahaʼá.
16 Nináhákáah nidi, Aláahgo Ayóóʼátʼéii bichʼįʼ éí dooda; ałtı̨́ı̨́ʼ binaʼadloʼii nidahalin. Ayóó ádaalzaadgo biniinaa binanitʼaʼí danilíinii diltłish bee nidadootsił. Ííjip kéyahgi tsʼídá tʼóó bee bá nidahatʼiʼ doo.
Footnotes
^ Aláahgo naatʼáanii tsostsʼidgo bizéédadeestʼą́ągo naaztseed.
